ފްލައިމީން އައްޑޫ އާއި ފުވައްމުލަކަށް ފަށާ ދަތުރުތަކަށް މިއަދު ޓިކެޓް ވިއްކަން ފަށަައިފި އެވެ.
އައްޑޫ ފުވައްމުލަކަށް ކުރަމުންދިޔަ ދަތުރުތައް ހުއްޓާލާފާއި އޮތްއޮތުން ނިމުމަކަށް ގެނެސް މިމަހުގެ 15 ވަނަ ދުވަހު ވިލާ އެއާ އިން ދަތުރުތައް ފަށާއިރު މިއަދުން ފެށިގެން ޓިކެޓް ބުކް ކުރެވޭނެ ކަމަށް ވިލާ އެއާ އިން ނެރުނު ބަޔާނެއްގައި ބުނެފައިވެއެވެ.
އައްޑޫ އާއި ފުވައްމުލަކަށް ފްލައިމީގެ ދަތުރުތައް ކުރުމަށް ހަމަޖެހިފައިވަނީ އާދީއްތަ އިން ބުދަ އަށް މެންދުރު ފަހު 1:00 ގަ އަދި ބުރާސްފަތި ދުވަހުން ހޮނިހިރަށް ދަތުރުތައް ބާއްވަނީ ހަވީރު 6:00 ގަ އެވެ.
ފަސިންޖަރުން ވީހާވެސް ފަސޭހަވާނެ ގޮތަކަށް ދަތުރުތައް ހަމަޖައްސެވުމަށް ފްލައިމީގެ ދަތުރުތައް އައްޑޫ އައި ފުވައްމުލަކަށް ކުރުމަށް ހަމަޖެހިފައިވާ ފެއަރ ރޭޓަކީ ކޮޅަކަށް 999 ރުފިޔާއެވެ.
އައްޑުއާއި ފުވައްމުލަކުގެ ދަތުރުތައް އަލުން ފެށުމަށް އެ އެއާލައިނުން މިހާރު ތައްޔާރުވަމުންދާ ކަމަށާއި ޝެޑިއުލް ކޮށްފައިވާ ތާރީހުގައި ދަތުރުތައް ފެށޭނެ ކަމަށް އުއްމީދުކުރައްވާ ކަމަށް ވިލާއެއާއިން ބުނެއެވެ.
ވިލާ އެއާގެ ދަތުރުތައް އައްޑޫ އާއި ފުވައްމުލަކަށް ފެށުމަށްޓަކައި ގަން އެއާޕޯޓާއި ފުވައްމުލަކު އެއާޕޯޓަށް ގްރައުންޑް ސްޓާފުން ހޯދަންވެސް ވިލާ އެއާ އިން މިހާރު ވަނީ އިއުލާނުކޮށްފަ އެވެ.
ފްލައިމީގެ ދަތުރުތައް މީގެކުރިން 2013 އިން 2015 އަހަރުގެ މެއި މަހުގެ 23 ވަނަ ދުވަހުގެ ނިޔަލަށް އައްޑު އާއި ފުވައްމުލަކާއި ގދ. ކާޑެއްދޫގެ އިތުރުން ގއ. ކޫއްޑޫއަށް ވެސް ކޮށްފައިވެ އެވެ.
ވިލާ އެއާ އިން މިވަގުތު ދަތުރުތައް ކުރަމުން ގެންދަނީ ވެލާ އިންޓަނޭޝަނަލް އެއާޕޯޓުން އދ. މާމިގިލި އެެއާޕޯޓަށާއި ބ. ދަރަވަންދޫ އެއާޕޯޓަށެވެ.
އައްޑު އާއި ފުވައްމުލަކަށް މިހާރު ޑޮމެސްޓިކް ދަތުރުތައް ކުރަނީ ހަމައެކަނި ގައުމީ އެއާލައިން މޯލްޑިވިއަނުންނެވެ. އައްޑޫއަށް ފްލައިމީން ދަތުރުތައް ކުރަމުންދިޔައިރު، ހިދުމަތުގެ އަގަށް ހެޔޮ ބަދަލުތަކެއް އައިކަން ވަރަށް ގިނަ ބަޔަކު ވަނީ ފާހަގަކޮށްފަ އެވެ.