އިނގިރޭސި ލީގު ކަޕްގައި ރޭ ކުޅުނު މެޗުތަކުން މޮޅުވެ އާސެނަލް އާއި ޗެލްސީ އަދި ޓޮޓެންހަމް ހޮޓްސްޕާ މިމުބާރާތުގެ ކުއާޓާ ފައިނަލުން ޖާގަ ހޯދައިފިއެވެ.
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗުގައި ބްލެކްޕޫލްގެ ގޯލް ހުޅުވާލަދިނީ 33 ވަނަ މިނެޓުގައި މަޓެއޯ ގެންޑޫޒީ ތަނަވަސްކުރި ފުރުޞަތަކުން ސްޓެފަން ލީޗްސްޓެއިނާ އެވެ. މިމެޗުގެ ފުރަތަމަ ހާފު 1-0 އިން އާސެނަލް ކުރީގައިއޮވެގެން ނިންމާލިއިރު ދެވަނަ ހާފު ފެށިގެން ފަސްވަނަ މިނެޓުގައި އާސެނަލްގެ ލީޑް ފުޅާކޮށްދިނީ އެމީލް ސްމިތު-ރޯވް އެވެ.
މެޗުގެ 56 ވަނަ މިނެޓުގައި އާސެނަލްގެ ޒުވާން މިޑްފީލްޑަރު ގެންޑޫޒީ އަށް ދެވަނަ ރީނދޫ ކާޑަކަށްފަހު ރަތް ކާޑު ދައްކާ ދަނޑުން ފޮނުވާލުމުން އެޓީމަށް މައްސަލަތައް ދިމާވިއެވެ.
އޭގެ ނަތީޖާއެއްގެ ގޮތުން، ބްލެކްޕޫލުން މެޗުގެ ނަތީޖާގެ ފަރަގު ކުޑަކުރިއެވެ. މެޗުގެ 66 ވަނަ މިނެޓުގައި އެޓީމުގެ ޖޯޑަން ތޯމްސަން ދިން ބޯޅައަކުން މިލަނޑު ޖަހައިދިނީ ޕޯޑީ އޯކޮނާ އެވެ.
އޭގެފަހުން، މެޗު ނިމެން ހަ މިނެޓަށްވެފައިވަނިކޮށް އާސެނަލްގެ ފޯވާޑް ޕިއޭރް-އެމެރިކް އޯބާމަޔަން އަށް ކުރި ނުރައްކާތެރި ފައުލަކަށް ބްލެކްޕޫލްގެ އޯކޮނާ އަށް ދެއްކި ރަތް ކާޑާއެކު އެޓީމުވެސް މެޗު ނިންމާލީ 10 ކުޅުންތެރިންނާއެކު އެވެ.
ކަރަބާއޯ ކަޕްގައި ރޭ ކުޅުނު އަނެއް މެޗުގައި ޗެލްސީގެ ދަނޑުގައި އެޓީމުގެ ކުރީގެ ތަރި ފްރޭންކް ލަމްޕާޑްގެ ކޯޗުކަމުގައި ކުޅޭ ޑާބީ ކައުންޓީ އަތުން މޮޅުވީ 3-2 އިންނެވެ. މިމެޗުގައި ޗެލްސީ އިން ކާމިޔާބުކުރި ތިން ގޯލްގެ ތެރެއިން ދެ ލަނޑަކީ ޑާބީގެ ފިކާޔޯ ޓޮމޯރީ އާއި ރިޗަޑް ކިއޯ އަތުން ބައިކޮޅަށް ވަން ގޯލެވެ. ޑާބީގެ ލަނޑުތައް ޖަހައިދިނީ ޖެކް މެރިއަޓް އާއި މާޓިން ވޭގަން އެވެ. މިމެޗުގެ ފުރަތަމަ ހާފު ނިމުމުގެ ކުރީން ޗެލްސީ މޮޅުކޮށްދިނީ ސެސް ފަބްރެގާސް އެވެ.
މިމުބާރާތުގައި ރޭ ކުޅެވުނު އެހެން މެޗުތަކުގެ ނަތީޖާއަށް ބަލާއިރު، ވެސްޓްހޭމް ޔުނައިޓެޑް އަތުން 1-3 އިން ޓޮޓެންހަމް ހޮޓްސްޕާ މޮޅުވިއިރު މިޑްލްސްބަރާ ވަނީ 1-0 އިން ކްރިސްޓަލް ޕެލަސް ބަލިކޮށްފައެވެ.
ވެސްޓްހޭމްގެ ދަނޑުގައި ކުޅުނު މެޗުގައި ޓޮޓެންހަމްގެ ތިން ލަނޑުގެ ތެރެއިން ދެލަނޑު ޖަހައިދިނީ ދެކުނު ކޮރެއާގެ ފޯވާޑް ސޮން ހެއުން-މިން އެވެ. އެޓީމުގެ އަނެއް ލަނޑު ފެނާންޑޯ ލޮރެންޓޯ ޖަހައިދިންއިރު ވެސްޓްހޭމްގެ ހަމައެކަނި ލަނޑު ކާމިޔާބުކޮށްދިނީ އާސެނަލުން އެޓީމަށް ބަދަލުވި ލޫކަސް ޕެރޭޒް އެވެ.
މިމުބާރާތުގެ ކުއާޓާ ފައިނަލުގެ ގުރުއަތުލުން ރޭ ބޭއްވުނުއިރު އާސެނަލް އާއި ޓޮޓެންހަމް ބައްދަލުކުރާގޮތަށް ހަމަޖެހުނުއިރު ޗެލްސީ ނިކުންނާނީ ބޯންމައުތާ ދެކޮޅަށެވެ. މިޑްލްސްބަރާ އާއި ދެކޮޅަށް ބާޓަން ނިކުންނައިރު، ދެން ކުޅޭ މެޗުގައި ބައްދަލުކުރާނީ މެންޗެސްޓަރ ސިޓީ އާއި ފުލަމް ކުޅެގެން މޮޅުވާ ޓީމަކާއި ލެސްޓާ ސިޓީ އާއި ސައުތެމްޓަން ކުޅެގެން މޮޅުވާ ޓީމެކެވެ.
ލީގުކަޕްގައި މިރޭ ކުޅޭ މެޗުގައި ބައްދަލުކުރާނީ އެންމެ ފަހުގެ ޗެމްޕިއަން ސިޓީ އާ ފުލަމް އެވެ. މިމެޗު ފަށާނީ މާލޭގަޑިން މިރޭ 12:45 ގައެވެ.