ސުޕްރީމް ކޯޓުން މިދިޔަ ފެބްރުއަރީ މަހު ނެރުނު އަމުރާ ގުޅިގެން ދައުލަތުން އުފުލި ރިޝްވަތުގެ ދައުވާތައް ކްރިމިނަލް ކޯޓުން ބާތިލްކުރި މައްސަލަ އިސްތިއުނާފް ނުކުރަން ނިންމާފައިވާ ޕްރޮސެކިއުޓާ ޖެނެރަލްގެ އޮފީހުން މިއަދު ބުނެފި އެވެ.
މައްސަލަ އިސްތިއުނާފް ނުކުރަން ނިންމާފައިވާ ފަރާތްތަކުގެ ތެރޭގައި ހިމެނެނީ ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދާއި ކުރީގެ ޖުޑީޝަލް އެޑްމިނިސްޓްރޭޓަރު ހަސަން ސައީދުގެ އިތުރުން ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ ދަރިކަލުން ސިޔާދު ގާސިމްއެވެ.
އަބްދުﷲ ސައީދާއި އަލީ ހަމީދާއި ހަސަން ސައީދުގެ އިތުރުން ސިޔާދު ގާސިމްގެ މައްޗަށް އުފުލާފައިވާ ރިޝްވަތު ދިނުމުގެ ދައުވާ ކްރިމިނަލް ކޯޓުން ބާތިލްކޮށްފައިވަނީ އޮކްޓޯބަރު 10 ވަނަ ދުވަހުއެވެ.
ބުރާސްފަތި ދުވަހު އެ އޮފީހުން ނެރުނު ބަޔާނެއްގައި ބުނެފައިވަނީ އެ މައްސަލަ މޯލްޑިވްސް ޕޮލިސް ސާރވިސްއިން ދިރާސާ ކުރުމަށްފަހު އެ އޮފީހަށް ފޮނުވުމާއި ގުޅިގެން އެ އޮފީހުން ކުރި ދިރާސާތަކަށް ބަލާއިރު އެ މައްސަލައަކީ މަދަނީ މިންގަނޑުން ކުރިއަށް ގެންދެވޭނެ މިންވަރަށް ހެކި ހުރި މައްސަލެއް ކަމުގައި ދެކޭ ކަމަށެވެ.
އެ މައްސަލައާ ގުޅިގެން އެ އޮފީހުން ހުށަހަޅާފައިވާ ހެކި ގަރީނާއަށް ބަލައި މައްސަލައަކީ މަދަނީ މިންގަނޑުން ކުރިއަށް ގެންދެވޭނެ މައްސަލައެއް ނޫންކަމަށް ޝަރީއަތުން ކަނޑައަޅުއްވާފައިވަނީ ރަނގަޅަށް ކަމަށް އެ އޮފީހަށް ނުފެންނަ ކަމަށް ވެސް އެބަޔާނުގައި ބުނެފައިވެއެވެ. ނަމަވެސް، ޝަރީއަތުގެ ނިންމުމުގައި ފާހަގަކުރައްވާފައިވާ ކަންކަމަށާއި މައްސަލައާއި ގުޅިގެން މިހާތަނަށް ލިބިފައިވާ އެންމެހާ ލިޔެ ކިޔުމަށާއި މައްސަލައިގައި މިހާތަނަށް ކަންހިނގާފައިވާ ގޮތަށް ބަލާއިރު ޝަރީއަތުގެ ނިންމުން މަތީ މަރުހަލާގެ ކޯޓެއްގައި އިސްތިއުނާފްކުރި ނަމަވެސް ،ނިންމުމަށް ބަދަލެއް އައިސްދާނެ ކަމަށް ނުފެންނާތީ، އެ މައްސަލާގައި ކްރިމިނަލް ކޯޓުން ނިންމެވި ނިންމެވުން އިސްތިއުނާފު ނުކުރުމަށް އެ އޮފީހުން ނިންމާފައިވާ ކަމަށް އެ ބަޔާނުގައި ވެއެވެ.
ބަންދުގައި ތިއްބެވި އަބްދުﷲ ސައީދާއި އަލީ ހަމީދާއި ހަސަން ސައީދު ހާޒިރުކޮށްގެން ކުރިއަށް ގެންދިޔަ ކްރިމިނަލް ކޯޓުގެ ޝަރީއަތުގައި، އެ ތިން ބޭފުޅުން ރިޝްވަތުގެ ފައިސާގައި ހިފާފައިވާކަން ޝަރީއަތަށް އެނގެން ނެތް ކަމަށް މައްސަލަ ބެއްލެވި ގާޒީ، އަދި ކްރިމިނަލް ކޯޓުގެ އިސް ގާޒީ އަހުމަދު ހައިލަމް ވިދާޅުވި ކަމަށް އަބްދުﷲ ސައީދުގެ ގާނޫނީ ވަކީލު ހިސާން ހުސައިން ވަނީ ވިދާޅުވެފައެވެ. އަބްދުﷲ ސައީދާއި އަލީ ހަމީދުގެ މައްޗަށް ކުރި ރިޝްވަތުގެ ދައުވާ ބާތިލު ކުރިނަމަވެސް، ތިން ދައުވާއެއް ސާބިތުވެ، ތިން އަހަރަށް ވުރެ ދިގު މުއްދަތުގެ ޖަލު ޙުކުމެއް އެ ބޭފުޅުން ތަންފީޒު ކުރައްވަމުން ގެންދަވާތީ، އެ ބޭފުޅުން މިނިވަނެއް ނުވެއެވެ.
އަބްދުﷲ ސައީދާއި އަލީ ހަމީދުގެ އިތުރުން ހަސަން ސައީދުގެ މައްޗަށް ކުރި ރިޝްވަތުގެ ދައުވާތައް ބާތިލް ކުރިޔަސް، އެހެން މައްސަލަތަކެއްގައި ކުށް ސާބިތުވެފައިވާތީ އެ ބޭފުޅުން މިހާރު ވެސް ގެންދަވަނީ ޖަލު ހުކުމް ތަންފީޒު ކުރަމުންނެވެ. އަބްދުﷲ ސައީދާއި އަލީ ހަމީދުގެ މައްޗަށް ދެ ދައުވާއެއް ސާބިތުވެ، ތިން އަހަރުގެ ވުރެ ދިގު ޖަލު ހުކުމެއް އައިސްފައިވާއިރު، ހަސަން ސައީދު ގެންދަނީ ހަތަރު މަހާއި 24 ދުވަހުގެ ޖަލު ހުކުމެއް ތަންފީޒު ކުރަމުންނެވެ.
ސިޔާދުގެ މައްޗަށް ރިޝްވަތު ދިނުމުގެ ދައުވާ އުފުލީ އޭނާގެ ސޮއިކޮށް، ވިލާ ކުންފުނިން ދީފައިވާ ލިޔުމެއްގައި އުއްތަމަ ފަނޑިޔާރު އަބްދުﷲ ސައީދާއި، ފަނޑިޔާރު އަލީ ހަމީދު ރާއްޖެއިން ބޭރުން ބައްލަވައިގަތް މުދާތަކަކަށް ފައިސާ ދައްކަން 2.4 މިލިއަން ޑޮލަރު ދީފައިވާ ކަމަށް ބުނެއެވެ.
ވިލާ ކުންފުނީގެ ފަރާތުން އެކަމަށް ދީފައިވާ ލިޔުމުގައި ސޮއިކޮށްފައި ވަނީ އެ ކުންފުނީގެ މެނޭޖިން ޑިރެކްޓަރު ސިޔާދު ކަމަށް ދައުލަތުން ޝަރީއަތުގައި ބުނެފައިވެއެވެ. އެ މައްސަލާގައި ޝަރީއަތް ނިމެންދެން ސިޔާދު ބަންދުގައި ބެހެއްޓުމަށް ފަހު އޭނާ މިނިވަން ކުރީ ޖުލައި މަހުގެ 19 ވަނަ ދުވަހުއެވެ.