މާލޭގައި ތިއްބެވި އެމްޑީޕީއަށް ނިސްބަތްވާ ކައުންސިލަރުންނާއި ކުރީގެ ރައީސް މުހައްމަދު ނަޝީދު ބައްދަލުކުރައްވައިފިއެވެ.
މި ބައްދަލުވުން ކުރިޔަށް ގެންދެވީ އިއްޔެ ހަވީރު މާބަލް ހޮޓަލްގައެވެ. އެ ބައްދަލުކުރެއްވުމުގައި މާލޭގައި މިވަގުތު ތިބި ގިނަ އަދަދެއްގެ ކައުންސިލަރުންނާއި ރައީސް ނަޝީދު ވަނީ ބައްދަލުކުރައްވާފައެވެ. އެގޮތުން އެބައްދަލުވުމުގައި ރައީސް ނަޝީދާއެކު އެމްޑީޕީގެ ބައެއް އިސްވެރިން ވެސް ބައިވެރިވެ ވަޑައިގެންފައިވެއެވެ.
މިއީ އެމަނިކުފާނު ރާއްޖެ ވަޑައިގަތުމަށްފަހު ރަށު ކައުންސިލަރުންނާއި ބައްދަލުކުރެއްވި ފުރަތަމަ ފަހަރެވެ.
ތިން އަހަރު ދުވަހު އިނގިރޭސި ވިލާތުން ހިމާޔަތް ހޯއްދަވައިގެން އުޅުއްވުމަށް ފަހު ނޮވެމްބަރު މަހުގެ 1 ވަނަ ދުވަހު ރައީސް ނަޝީދު މާލެ ވަޑައިގެންނެވިއިރު ރާއްޖޭގެ އެކި ރަށްރަށުން ގިނަ އަދަދެއްގެ ގެ ބަޔަކު މާލެ އައިސް އެމަނިކުފާނަށް ވަނީ ވަރަށް ހޫނު މަރުހަބާއެއް ދަންނަވާފައެވެ. އެ މަނިކުފާނު ވަޑައިގެންނެވި މަގުތައް ފުރި ބާރުވެގެން ދިޔައެވެ. ހިތާއި ހިތުގެ ގުޅުމެއް ކަމަށް ބުނަމުން ގިނަ އަދަދެއްގެ ރައްޔިތުން އުފާ ފާޅުކުރަމުންދިޔައެވެ.