ކޮރަޕްޝަނާއި މާދިއްޔަތުގެ ނުފޫޒު ބިރުގަންނަން ޖެހޭހާ ދަރަޖައަށް ބޮޑުވެފައިވާ ކަމަށް ޑިފެންސް މިނިސްޓަރު އާދަމް ޝަރީފު އުމަރު ވިދާޅުވެއްޖެއެވެ.
މި އަހަރުގެ ނަސްރުގެ ދުވަހުގެ މުނާސަބަތުގައި ހޮނިހިރު ދުވަހުގެ ރޭ ބޭއްވި ރަސްމިއްޔާތުގައި ވާހަކަ ދައްކަވަމުން އާދަމް ޝަރީފު ވިދާޅުވީ ކޮރަޕްޝަންގެ ވާހަކައަކީ އާ ވާހަކައެއް ނޫން ކަމަށެވެ.
އާދަމް ޝަރީފް ވިދާޅުވީ ކޮރަޕްޝަން އާއްމުވުމުގެ ސަބަބުން އިސްލާމްދީނާއި ގައުމުގެ ސިޔާދަތާއި ރައްޔިތުންގެ މަސްލަހަތު ހިމާޔަތް ނުކުރެވޭ ވަރަށް ބައެއް ތަންތަނުގެ ހާލަތު ދަށްވެފައި އެބަހުރި ކަމަށެވެ. އަދި ކޮރަޕްޝަން މަދުކޮށް ނުފޫޒުގެ ބޭނުން ކުރުން ހުއްޓާލުމާއެކު އާހިތްވަރަކާއެކު މިގައުމު އާރާސްތު ކުރުމުގެ މަސައްކަތް ކުރަންޖެހޭ ކަމަށެވެ. އެހެން ނޫން ކަމަށް ވާނަމަ ސިޔާދަތު ގެއްލި އަޅުވެތިވެދާނެ ކަމަށް އާދަމް ޝަރީފު ވިދާޅުވިއެވެ.
ނަސްރުގެ ދުވަސް ފާހަގަ ކުރަމުންދާ އިރު ކޮރަޕްޝަނާއި ދުރުވެ ނުފޫޒުން އެއްވެސް ކަމެއް ނުކުރުމުގެ އަޒުމު އާ ކުރަން ޖެހޭ ކަމަށް ވެސް އާދަމް ޝަރީފު ވިދާޅުވިއެވެ.
އެހެންކަމުން މާތްވެގެންވާ އިސްލާމްދީނާއި ގައުމު ސިޔާދަތާއި މިނިވަންކަމާއި އިސްތިގުލާލާއި، ރައްޔިތުންގެ މަސްލަހަތުތަކަށް ރައްކާތެރިވުމަށްޓަކައި ކޮރަޕްޝަނާއި ދުރުހެލިވެ، ނުފޫޒުން އެއްވެސް ކަމެއް ނުކުރުމުގެ މަތިވެރި އަޒުމުގައި ތިއްބެއްވުމަށް މިނިސްޓަރު ވަނީ އިލްތިމާސްކުރައްވާފައެވެ.