މިއަދުވެސް ދެކުނުގެ އަތޮޅުތަކަށް ވިއްސާރަކޮށް، ބޯކޮށް ވާރޭ ވެހުން އެކަށީގެންވާ ކަމަށް މޫސުމާއި ބެހޭ ގައުމީ އިދާރާއިން ބުނެފިއެވެ.
ދެކުނުގެ އަތޮޅުތަކަށް މޫސުމް ގޯސްވިކަމުގައި ވިޔަސް މެދުތެރޭ ރަށްތަކަށް މޫސުމް އާންމުގޮތެއްގައި ރަނގަޅުވާނެ ކަމަށް ގައުމީ އިދާރާއިން ބުނެއެވެ. އަދި އުތުރުގެ އަތޮޅުތަކަށް ކެރީގެ އަސަރު ފޯރާނެ ކަމަށް ވެސް މޫސުމާއި ބެހޭ ގައުމީ އިދާރާއިން ހާމަކުރެއެވެ.
ހުޅަނގުއުތުރާއި އުތުރުން ގަޑިޔަކު މޭލާއި 10 މޭލަށް ވައިޖެހޭނެ ކަމަށާއި، ކެރިގަނޑުގައި ގާތްގަނޑަކަށް 30 މޭލު ބާރުމިނަށް ދެކުނުގެ އަތޮޅުތަކަށް ވައި ބާރުވާނެ ކަމަށް ލަފާ ކުރެވޭ ކަމަށް ވެސް މޫސުމާއި ބެހޭ ގައުމީ އިދާރާއިން ބުނެއެވެ.
ކަނޑު މަޑުވެފައި ކެރިގަނޑުގައި އާދައިގެ ވަރަކަށް ގަދަވާނެ ކަމަށް އެ އިދާރާއިން ބުނެއެވެ.
އައްޑޫއަށް މިހާރު ކުރަމުންދާ ވިއްސާރަގައި ފެން ބޮޑުވުމުގެ ސަބަބުން ގިނަ އަދަދެއްގެ ގޭބިސީތަކަށް ބޮޑެތި ގެއްލުންތަކެއް ވަނީ ލިބިފައެވެ. 'އައްޑޫލައިވް' އަށް ސިފައިން އަދި ފުލުހުންގެ ފަރާތުން ލިބުނު މައުލޫމާތު ތަކަށް ބަލާއިރު ގެއްލުން ލިބުނު ގެތަކުގެ އަދަދު އުޅެނީ 80 އަށް ވުރެ މަތީގައެވެ.