ރޫނީގެ ފަހު މެޗުގައި އިނގިރޭސީން ނިކުންނާނީ އެމެރިކާ އާ ދެކޮޅަށް

ވޭން ރޫނީގެ ފުޓްބޯޅަ ކެރިއަރުގައި ޤައުމީޓީމަށް ކުޅޭ ފަހު މެޗުގައި މިމަހުގެ 15 ވަނަ ދުވަހު އިނގިރޭސިވިލާތް ނިކުންނާނީ އެމެރިކާ އާ ދެކޮޅަށެވެ. އެކުވެރިކަމުގެ މިމެޗު ކުޅުމަށް ހަމަޖެހިފައިވަނީ އިނގިރޭސި ވިލާތުގެ ވެމްބްލީގައެވެ.

މިހާރު އުމުރުން 33 އަހަރުވެފައިވާ މެންޗެސްޓަރ ޔުނައިޓެޑްގެ ކުރީގެ ފޯވާޑް، ގައުމީޓީމަށް އެންމެ ފަހުން ކުޅުނީ 2016 ވަނަ އަހަރުގެ ނޮވެންބަރު މަހުގައި ސްކޮޓްލަންޑް އަތުން 3-0 އިން އިނގިރޭސީން މޮޅުވި މެޗުގައެވެ.

އެއަށްފަހު، ގައުމީޓީމަށް އޭނާ ކުޅުން ހުއްޓާލައިފައިވާއިރު ރަޝިޔާގައި ބޭއްވުނު އެންމެފަހުގެ ވޯލްޑްކަޕްގައި ބައިވެރިވި އިނގިރޭސި ޓީމުގައިވެސް އޭނާ ހިމެނިފައެއްނުވެއެވެ.

އެމެރިކާ އާ ދެކޮޅަށް އިނގިރޭސިވިލާތް ކުޅުމަށް ހަމަޖެހިފައިވާ މެޗުން ލިބޭ ފައިސާ ރޫނީ ފައުންޑޭޝަނަށް ހަދިޔާކުރުމަށް ވަނީ ނިންމާފައެވެ.

މިވަގުތު ރޫނީ ކުޅެމުންދަނީ އެމެރިކާގެ މޭޖާ ލީގު ސޮކާގެ ޓީމެއް ކަމަށްވާ ޑީސީ ޔުނައިޓެޑަށެވެ. އޭނާގެ އެހީތެރކަމާއެކު އެޓީމު ވަނީ އެމުބާރާތުގެ ޕްލޭއޮފަށް ދަތުރުކޮށްފައެވެ. ޑީސީ ޔުނައިޓެޑް ބަލިވީ ޕްލޭއޮފްގެ ފުރަތަމަ ބުރުގައި ކޮލަމްބަސް ކްރޫ އަތުން ޕެނަލްޓީ ޖަހައިގެންނެވެ.

އެމެރިކާ އާ އިނގިރޭސިވިލާތް ބައްދަލުކުރާ މެޗުގައި ކުޅުމުގެ ފުރުޞަތުލިބުމުން ރޫނީގެ ރަސްމީ ޓުވިޓާ އެކައުންޓުން ކުރި ޓުވީޓެއްގައި ވަނީ މިއީ އޭނާ ވަރަށް ޝައުގުވެރިވާކަމެއް ކަމަށާއި އެކަމާއި އުފާކުރާކަމަށެވެ.

އެމެރިކާ އާ ދެކޮޅަށް އިނގިރޭސިވިލާތް ކުޅުމަށް ހަމަޖެހިފައިވާ މެޗު ވާނީ ގައުމީ ޖާޒީ ލައިގެން ރޫނީ ނިކުންނަ 120 ވަނަ މެޗެވެ. އޭނާ ވަނީ ގައުމީ ޓީމަށް 53 ގޯލް ކާމިޔާބުކޮށްދީފައެވެ.