އިޓާލިއަން ސެރިއޭގައި ރޭ ފަހު ވަގުތު އަލެސިއޯ ރޮމަނޯލީ ކާމިޔާބުކުރި ގޯލުން ރަށުން ބޭރުގައި ކުޅެ އުދިނޭޒީގެ މައްޗަށް 1-0 އިން އޭސީ މިލާން ކުރި ހޯދައިފިއެވެ.
ލީގުގައި މިލާން އެންމެ ފަހުން ކުޅުނު މެޗުގައި އެޓީމު މޮޅުވި ލަނޑު، އެމެޗުގެ އިތުރުވަގުތުގައި ކާމިޔާބުކޮށްދިނީ ވެސް އިޓަލީގެ އިތުބާރު ޑިފެންޑަރު ރޮމަނޯލީ އެވެ. މީގެއިތުރުން، މިއީ ލީގުގައި މިލާން އެންމެ ފަހުން ކުޅުނު ހަމެޗުގެ ތެރެއިން މޮޅުވި ފަސްވަނަ މެޗެވެ.
މިމޮޅާއެކު މިލާން މިހާރު އޮތީ 21 ޕޮއިންޓާއެކު ލީގުގެ ހަތަރުވަނައިގައެވެ. ލާޒިއޯ އަށް ވެސް މިއަދަދަށް ޕޮއިންޓް ލިބިފައިވާއިރު މިލާނަށް ކުރިލިބެނީ ފައިދާ ގޯލްގެ ތަފާތުންނެވެ. ތާވަލްގެ އެންމެ ކުރީގައި އުޅޭ ޔުވެންޓަސް އަށް 11 މެޗުން 31 ޕޮއިންޓް ލިބިފައިވާއިރު ދެވަނައިގައި އޮތް އިންޓަ މިލާނާއި ތިންވަނައިގައި އޮތް ނަޕޯލީ ވަނީ 11 މެޗުން 25 ޕޮއިންޓް ހަމަކޮށްފައެވެ. އިންޓަ އަށް ކުރިލިބެނީ ފައިދާ ގޯލުންނެވެ. މިމެޗުން މިލާން އަތުން ބަލިވި އުދިނޭޒީ އޮތީ 9 ޕޮއިންޓާއެކު 16 ވަނައިގައެވެ.
އުދިނޭޒީގެ ދަނޑުގައި ކުޅުނު މިމެޗުގައި މިލާނުން ގިނަ ވަގުތު ބޯޅަ ހިފަހައްޓައިގެން އިދިކޮޅު ޓީމުގެ ގޯލަށް އަމާޒުކޮށް ގިިނަ ހަމަލާތަކެއް ފޮނުވާލައިފައިވާއިރު ފުރަތަމަ ހާފުގައި އެޓީމުގެ ސޫސޯ އާއި ޕެޓްރިކް ކުޓްރޯނޭ ފޮނުވާލި ހަމަލާތައް އުދިނޭޒީގެ ގޯލްކީޕަރު ހުއާން މޫސޯ ވަނީ މަތަކޮށްފައެވެ.
މިމެޗުގެ ފުރަތަމަ ހާފުގައި މިލާންގެ އާޖެންޓީނާ ފޯވާޑް ގޮންޒާލޯ ހިގުއައިން އަށް ލިބުނު އަނިޔާއަކާއި ގުޅިގެން ބަދަލުކުރުމުން އެޓީމަށް މައްސަލަތައް ކުރިމަތިވިއެވެ. އޭނާގެ ބަދަލުގައި ކުޅެން ނިކުތީ ސަމޫ ކަސްޓިލޭހޯ އެވެ. މިހާފު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
ދެވަނަ ހާފުގެ ކުރީކޮޅު އުދިނޭޒީގެ ރޮޑްރިގޯ ޑެ ޕައުލް އަށް ވަނީ ލަނޑުޖެހުމަށް ރަނގަޅު ދެފުރުޞަތުލިބިފައެވެ. އޭނާ ފޮނުވާލި ދެހަމަލާވެސް މިލާންގެ ގޯލްކީޕަރު ޖިއަންލުއިޖީ ޑޮނަރުއްމާ މަތަކުރިއިރު މިލާންގެ ކަސްޓިލޭހޯ އާއި ސޫސޯ ފޮނުވާލި ހަމަލާތަކުގެ ހުރަހަކަށްވީ އުދިނޭޒީގެ ކީޕަރު މޫސޯ އެވެ.
މިމެޗުގެ ފަހު ހާފުގެ ފަހުބައި އުދިނޭޒީ ކުޅުނީ 10 ކުޅުންތެރިންނާއެކުއެވެ. އެއީ، މެޗުގެ އިތުރުވަގުތުގެ ފަސްވަނަ މިނެޓުގައި މިލާންގެ ކަސްޓިލޭހޯ އަށް މިހާފުގައި ކުޅެން ނިކުތް އުދިނޭޒީގެ ބްރޭމް ނުއިޓިންކް ކުރި ފައުލަކަށް ރެފްރީ ސީދާ ރަތް ކާޑެއް ދެއްކުމުންނެވެ.
އޭގެނަތީޖާއެއްގެގޮތުން، މެޗުގެ އިތުރުވަގުތުގެ ހަތްވަނަ މިނެޓުގައި މިލާންގެ ކުޅުންތެރިން ކައުންޓައެޓޭކެއްގައި ތަނަވަސްކުރި ފުރުޞަތަކުން ސޫސޯ ދިން ބޯޅައަކުން ރޮމަނޯލީ ވަނީ ގޯލެއް ކާމިޔާބުކޮށް މިލާނަށް ތިން ޕޮއިންޓް ކަށަވަރުކޮށްދީފައެވެ. މިއީ ގޯލެއް ނޫންކަމަށް މެޗުގެ ރެފްރީ ނިންމުމުން އެކަމާއި ދެކޮޅުހެދުމުން މިލާންގެ ކޯޗު ޖެނާރޯ ގަޓޫސޯ ވަނީ ބެންޗުން ފޮނުވާލައިފައެވެ. ނަމަވެސް، ފަހުން ވީއޭއާރްގެ އެހީ ހޯދުމަށްފަހު ރެފްރީ ވަނީ ގޯލެއްކަމަށް ނިންމައިފައެވެ.
މިމުބާރާތުގައި އިއްޔެ ކުޅުނު އެހެން މެޗުތަކުގެ ނަތީޖާއަށް ބަލާއިރު، ސްޕަލް އަތުން 4-1 އިން ލާޒިއޯ މޮޅުވިއިރު އަމިއްލަ ދަނޑުގައި ޓޮރީނޯ އަތުން ސަމްޕްޑޯރިއާ ބަލިވީވެސް ހަމަ މިނަތީޖާއިންނެވެ. ކިއޭވޯ ވެރޯނާ އަތުން 2-0 އިން ސަސުއޮލޯ މޮޅުވިއިރު އެޓަލާންޓާ އަތުން ބޮލޯނިއާ ބަލިވީ 2-1 އިންނެވެ. ފްރޮސިނޯނޭ އާ ޕާމާ ބައްދަލުކުރި މެޗު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.