ރާއްޖެއިން ބޭރަށް ގިނަ އަދަދެއްގެ ފައިސާ ގެންދަން އުޅުނު ބަޔަކު ކަސްޓަމުން ހުއްޓުވައިފިއެވެ.
ރާއްޖެއިން ބޭރަށް ގިނަ އަދަދަކަށް ފައިސާ ގެންދަން އުޅުނީ އިންޑިއާގެ ތިން މީހެއް ކަމަށާއި އެ ތިން މީހުންނަކީ މިމަހުގެ ހަތަރު ވަނަ ދުވަހުގެ ރޭ 18:30 ގައި ސިންގަޕޫރަށް ފުރަން އުޅުނު ބަޔެއް ކަމަށް މޯލްޑިވްސް ކަސްޓަމްސް ސާވިސް އިން ބުނެއެވެ.
އެ ތިން މީހުން ބަލާ ފާސްކޮށްފައިވަނީ ރިޕޯޓްނުކޮށް ގިނަ އަދަދަކަށް ފައިސާ ރާއްޖެއިން ބޭރަށް ގެންދަން އުޅޭ ކަމުގެ މައުލޫމާތު ކަސްޓަމަށް ލިބުމާއި ގުޅިގެންނެވެ. އެގޮތުނއ އެ ތިން މީހުންނާއި ސުވާލުކޮށް ބަލައިފާސްކުރިއިރު އެ މީހުން އަތުން ތަފާތު ގައުމުތަކުގެ ގިނަ އަދަދެއްގެ ފައިސާ ފެނިފައިވާ ކަމަށް ކަސްޓަމުން ބުނެއެވެ. ނަމަވެސް އޭގެ ތަފުސީލެއް ކަސްޓަމުން އަދި ހާމައެއް ނުކުރެއެވެ.
ކަސްޓަމުން ބުނީ އެކަން ހިނގާފައިވާ ގޮތަށް ބެލުމަށްފަހު ދިވެހިރާއްޖެއަށް އެތެރެކުރާ ނުވަތަ ބޭރުކުރާ ނަގުދު ފައިސާ ބޭރުކުރުމުގެ ގަވާއިދުގެ ދަށުން ބަޔާންކުރެވުނު ފައިސާތައް ހިފެހެއްޓުމަށްފަހު، އެކަން އިތުރަށް ތަހުގީގު ކުރުމަށް ތުހުމަތު ކުރެވޭ ފަރާތްތަކާއި އެމީހުން އަތުން ފެނުނު ފައިސާ ފުލުހުންނާއި ހަވާލުކޮށްފައިވާ ކަމަށެވެ. އެކަމާ ގުޅޭ ގޮތުން ފުލުހުންގެ ބަހެއް އަދިވަނީ ލިބޭ ގޮތް ނުވެފައެވެ.