އދ. މާމިގިލީގައި ބަޔަކު އެރަށު ކައުންސިލްގެ ނައިބު ރައީސް ޝިހާމް މުހައްމަދަށް ހަމަލާދީ މާރާމާރީ ހިންގާ މަރުގެ އިންޒާރު ދީފިއެވެ.
ޝިހާމް މުހައްމަދަށް ހަމަލާދީފައިވަނީ މިމަހުގެ ހަވަނަ ދުވަހުގެ ރޭ 10:45 ހާއިރު މާމިނގިލީ ވަށްތުނޑި ބީޗް ސަރަހައްދުގައެވެ.
ޝިހާމްއާއި ހަވާލާދެއްވާ ދިވެހި އޮންލައިން ނޫސް "ސީއެންއެމް" އިން ރިޕޯޓް ކޮށްފައިވާ ގޮތުގައި މާރާމާރީ ހިންގާ "ފުހެލާނެ" ކަމުގެ އިންޒާރު އެ މީހުން ދިން ކަމަށާއި އެ މައްސަލަ ފުލުހުންނަށް ހުށަހަޅާފައިވާ ކަމަށެވެ.
މާމިގިލީ އިތުރު މީހަކާއި ހަވާލާދެއްވާ އެ ނޫހުން ރިޕޯޓްކޮށްފައިވާ ގޮތުގައި ޝިހާމަށް ހަމަލާދީ މާރާމާރީ ހިންގާފައިވަނީ ޕީޕީއެމްގެ ދެ މީހެކެވެ. އޭގެ ތެރެއިން އެކަކީ ޕޯޓްގައި މަސައްކަތް ކުރާ މީހެއް ކަމަށާއި އަނެއް މީހާއަކީ އެއާޕޯޓުގައި މަސައްކަތް ކުރާ މީހެއް ކަމަށް އެ މީހާ ބުނެފައިވާ ކަމަށް އެ ނޫހުން ރިޕޯޓް ކުރެއެވެ.
މާރާމާރީ ހިނގީ، އެ މާރާމާރީގައި ބައިވެރިވި މީހެއްގެ އާއިލާގެ މެންބަރެއް ވަޒީފާއިން ވަކިކުރި ކަމަށް ބުނެ ކަމަށް ވެސް މާމިގިލިން މައުލޫމާތު ދިން މީހާ ބުނެފައިވާ ކަމަށް އެ ނޫހުގައި ވެއެވެ.
އެކަމާ ގުޅޭ ގޮތުން ފުލުހުން އަދި ވަކިއެއްޗެއް ވިދާޅެއް ނުވެއެވެ.