އިންތިހާބީ ރައީސް އިބްރާހިމް މުހައްމަދު ސޯލިހު ހުވާކުރެއްވުމަށް ބާއްވާ ހަފްލާއަށް އިންޑިއާގެ ބޮޑު ވަޒީރު ނަރެންދުރަ މޯދީ ވަޑައިގަންނަވާނެ ކަމަށް، އެ ގައުމުގެ ސަރުކާރުން ރަސްމީކޮށް މިއަދު ހާމަކޮށްފި އެވެ.
އިބޫ ހުވާކުރެއްވުމުގެ ހަފްލާ އޮންނާނީ، ނޮވެމްބަރު 17 ވަނަ ދުވަހު، ގަލޮޅު ބޯޅަދަނޑުގަ އެވެ. އެ ހަފްލާއަށް އެތައް ހާސްބަޔަކަށް މިހާރު ވަނީ ދައުވަތު ދީފަ އެވެ. އޭގެ ތެރޭގައި އެކި ގައުމުތަކުގެ އިސްވެރިންގެ ތެރޭގައި ހިމެނިވަޑައިގަންނަވާ ފަރާތްތައް ވެސް ހިމެނެއެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީއިން މިއަދު ބޭއްވި ނޫސްވެރިންގެ ބައްދަލުވުމުގައި، ވިދާޅުވީ އިންތިހާބީ ރައީސް އިބްރާހިމް މުހައްމަދު ސޯލިހުގެ ހުވާކުރައްވާ ޖަލްސާއަށް ވަޑައިގަތުމަށް އެމަނިކުފާނު މޯދީއަށް ދެއްވި ދައުވަތު ގަބޫލުފުޅު ކުރައްވާ އެ ހަފްލާއަށް ވަޑައިގަތުމަށް މޯދީ ނިންމަވާފައިވާ ކަމަށެވެ.
މޯދީ ރާއްޖެ ވަޑައިގަތުމުގެ ތައްޔާރީތައް ދެ ގައުމު ގުޅިގެން ފަށާފައިވާ ކަމަށް ވެސް އެ ނޫސް ކޮންފަރެންސްގައި ބުންޏެވެ. އަދި ބުނީ، މޯދީ ހުވާކުރައްވާ ހަފްލާއަށް ރާއްޖެ ވަޑައިގަތުމަށް ފަހު ހަމަ އެ ދުވަހު އެމަނިކުފާނު އެނބުރި އިންޑިއާއަށް ވަޑައިގަންނަވާނެ ކަމަށެވެ.
މިއީ މޯދީ ރާއްޖެ ވަޑައިގަންނަވާ ފުރަތަމަ ފަހަރެވެ. އިންޑިއާގެ ބޮޑުވަޒީރު ނަރޭންދްރަ މޯދީ ވަޑައިގަތުމުގެ ތައްޔާރީތަކަށް އެޤައުމުގެ އެޑްވާންސް ޓީމެއް ވެސް ވަނީ ރާއްޖެ އައިސްފައެވެ.