އުމްރާގެ އަޅުކަން ފުރިހަމަ ކުރެއްވުމަށްފަހު އިންތިޚާބީ ރައީސް އިބްރާހިމް މުހައްމަދު ސާލިހް(އިބޫ) ހުކުރު ދުވަހުގެ ރޭ ރާއްޖެ ވަޑައިގެންފި އެވެ.
އިންތިޚާބީ ރައީސްގެ މި ދަތުރުފުޅުގައި އެމަނިކުފާނުގެ އަނބިކަނބަލުންގެ އިތުރުން ރައްޔިތުންގެ މަޖިލީހުގެ ރައީސް ގާސިމް އިބްރާހީމާއި އަދާލަތު ޕާޓީގެ ނައިބް ރައީސް އަލީ ޒާހިރާއި، ރައްޔިތުންގެ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑެ) އާއި އެމްޑީޕީގެ ޗެއާޕާސަންގެ ކުރީގެ ނައިބު އަލީ ޝިޔާމާއި އަލިފުށީ ދާއިރާގެ މެންބަރު މުހައްމަދު ރަޝީދާއި، ރައީސް ނަޝީދުގެ ކޮއްކޯފުޅު ނާޒިމް ސައްތާރު ވެސް ވަނީ ބައިވެރިވެ ވަޑައިގަންނަވާފައެވެ.
އުމްރާގެ އަޅުކަމަށް އިބޫ ވަޑައިގެންފައިވަނީ މިދިޔަ ބުދަ ދުވަހުއެވެ. އެމަނިކުފާނުގެ މި ދަތުރުފުޅުގައި ސައުދީ ސަރުކާރުގެ އިސްބައެއް ބޭފުޅުންނާއި ސައުދީގައި ތިބޭ ދިވެހި ކިޔަވާކުދިން ވެސް އެމަނިކުފާނާ ބައްދަލު ކުރައްވާފައި ވެއެވެ.
ގައުމާއި ހަވާލުވުމުގެ ކުރިން އުމްރާއަށް ވަޑައިގެންނެވުމުން ރާއްޖޭގެ ދީނީ އިލްމުވެރިންގެ އިތުރުން އެތައް ދިވެހި ރައްޔިތެއްގެ ތައުރީފް އެ މަނިކުފާނަށް ވަނީ އޮހިފައެވެ.
އަންނަ ހޮނިހިރު ދުވަހު އިބްރާހިމް މުހައްމަދު ސޯލިހް ރައީސްކަމުގެ ހުވާ ކުރެއްވުމުގެ ކުރިން އުމްރާ އަޅުކަން އަދާކުރެއްވުމުން ގިނަ ބަޔަކު ދަނީ އެކަން ފާހަގަ ކުރައްވައި ތައުރީފު ކުރައްވަމުންނެވެ.