އަބުރު ރައްކާތެރިކޮށްދިނުމާއި ހިޔާލުފާޅުކުރުމުގެ މިނިވަންކަމުގެ ގާނޫނު އުވާލުމުގެ ބިލަށް ބަހުސް ކުރުމަށް ހޯމަ ދުވަހުގެ މަޖިލީސް ޖަލްސާއަށް އެޖެންޑާ ކޮށްފިއެވެ.
ހިޔާލުފާޅު ކުރުމުގެ މިނިވަންކަމުގެ ގާނޫނު އުވާލުމަށް މަޖިލީހަށް ބިލް ހުށަހަޅާފައިވަނީ ހެންވޭރު އުތުރު ދާއިރާގެ މެންބަރު އަބްދުﷲ ޝާހިދެވެ. މި ބިލް މަޖިލީހަށް ހުށަހަޅާފައިވަނީ އޮކްޓޫބަރު 25 ވަނަ ދުވަހުއެވެ.
ހޯމަ ދުވަހުގެ ޖަލްސާގައި އަބުރު ރައްކާތެރިކޮށްދިނުމާއި ހިޔާލުފާޅުކުރުމުގެ މިނިވަންކަމުގެ ގާނޫނު އުވާލުމުގެ ބިލަށް ބަހުސް ކުރުމުގެ އިތުރަށް ސަރުކާރުގެ ފަރާތުން އުނގޫފާރު ދާއިރާގެ މެންބަރު ޖައުފަރު ދާއޫދު ހުށަހަޅާފައިވާ މޯލްޑީވްސް މީޑިއާ ކޮމިޝަނުގެ ބިލަށް ބަހުސް ކުރުންވެސް އޮންނާނެ އެވެ. އޭގެ އިތުރަށް ސަރުކާރުގެ ފަރާތުން ގެމަނަފުށީ ދާއިރާގެ މެންބަރު ޖަމީލް އުސްމާނު ހުށަހަޅުއްވާފައިވާ ރާއްޖޭގެ ބޭންކިންގ ބެހޭ ގާނޫނަށް އިސްލާހު ގެނައުމުގެ ބިލަށް ބަހުސް ކުރުން ކުރިއަށްދާނެއެވެ.
ވައިކަރަދޫ ދާއިރާގެ މެންބަރު މުހައްމަދު ނާޒިމް ހުށަހަޅުއްވާފައިވާ ރައްޔިތުންގެ މަޖިލީހުގެ މެންބަރުން ތެރެއިން ޖުޑިޝަލް ސަރވިސް ކޮމިޝަނަށް ކަނޑައަޅާފައިވާ މެންބަރު ގުރައިދޫ ދައިރާގެ މެންބަރު އިބްރާހިމް ރިޒާ ގާނޫނު އަސާސީގައިވާ ގޮތުގެ މަތިން މަގާމުން ވަކި ކުރުމަށް ހުށަހަޅާފައިވާ މައްސަލަ ވަނީ މަޖިލީސް ތަޅުމަށް ހުށަހަޅާފައެވެ.
އަބުރުގެ ގާނޫނު އުވާލުމަށް ހުށަހަޅާ ސަބަބަކީ ގާނޫނު އަސާސީގެ 27 ވަނަ މާއްދާގެ ދަށުން ލިބިދޭ ޚިޔާލުފާޅުކުރުމުގެ މިނިވަންކަމާއި ގާނޫނު އަސާސީގެ 33 ވަނަ މާއްދާގެ ދަށުން މީހުންގެ ނަމާއި އަބުރު ރައްކާތެރިކުރުމުގެ ހައްގާއި އަދި ބައިނަލްއަގްވާމީ އިންސާނީ ހައްގުތަށް ރައްކާތެރިކޮށް ދިނުމުގެ ހައްގާއި އުސޫލްތަކާއި ތައާރުޒުވާތީ ކަމަށް ޝާހިދު ވިދާޅުވިއެވެ.