2019 ވަނަ އަހަރަށް ލަފާކޮށްފައިވާ ދައުލަތުގެ ބަޖެޓަށް ބަހުސް ކުރުމަށް ކޮންމެ މެންބަރަކަށް 15 މިނެޓު ދޭން އާއްމު ކޮމިޓީން ނިންމައިފިއެވެ.
އަންނަ އަހަރަށް ލަފާކޮށް 29.6 ބިލިއަން ރުފިޔާގެ ބަޖެޓު ހުށަހަޅާފައިވަނީ އިއްޔެއެވެ.
މިއަދު 9:30 ގައި ފެށިގެން ކުރިޔަށްދާ މަޖިލީހުގެ މިއަދުގެ ޖަލްސާ ފައްޓަވާ ދެއްވަމުން އާއްމު ކޮމިޓީން އެގޮތަށް ނިންމާފައިވާކަން އިއުލާން ކުރެއްވީ މަޖިލީހުގެ ރައީސް ގާސިމް އިބްރާހީމެވެ. ގާސިމް ވިދާޅުވީ ބަހުސް މަރުހަލާގައި ކޮންމެ މެންބަރަަށް 15 މިނެޓު ދޭން ހުށަހަޅާފައިވާ ކަމަށެވެ. އަދި ކޮމިޓީ ރިޕޯޓަށް ބަހުސް ކުރުމަށް ކޮންމެ މެންބަރަކަށް ހަތް މިނެޓު ދޭން ވެސް އާއްމު ކޮމިޓީން ނިންމާފައިވާ ކަމަށް ވެސް މަޖިލީހުގެ ރައީސް ގާސިމް އިބްރާހީމް ވިދާޅުވިއެވެ.
ބަޖެޓު ދިރާސާ ކުރުމަށް ކޮމިޓީއެއް ހޮވާ ކޮމިޓީގެ މުގައްރިރަކަށް މަރަދޫ ދާއިރާގެ މެންބަރު އިބްރާހީމް ޝަރީފު އަދި ނައިބު މުގައްރިރަކަށް ވިލިފުށީ ދާއިރާގެ މެންބަރު ރިޔާޒު ރަޝީދު ވަނީ އައްޔަން ކުރައްވާފައެވެ.
ފިނޭންސް މިނިސްޓަރު އަހުމަދު މުނައްވަރު ހުށަހެޅުއްވި ބަޖެޓުގައި އަންނަ އަހަރަށް ހިނގާނެ ކަމަށް ލަފާކުރެވެނީ 26.7 ބިލިޔަން ރުފިޔާ އެވެ. އެހެންކަމުން މިނިސްޓަރު ވިދާޅުވީ ބަޖެޓް ޑެފިސިޓް ނުވަތަ ދަރަނި ވާނީ 3.7 ބިލިޔަން ރުފިޔާ އިންނެވެ.
އަންނަ އަހަރު ދައުލަތުގެ އާމްދަނީ އާއި ދައުލަތަށް ލިބޭނެ ކަމަށް ލަފާކުރެވޭ ހިލޭ އެހީގެ ޖުމްލަ 23 ބިލިޔަން ރުފިޔާ އަށް އަރާނެ ކަމަށް މިނިސްޓަރު ވިދާޅުވި އެވެ. އަދި އަންނަ އަހަރުގެ ބަޖެޓުގައި 2.9 ބިލިޔަން ރުފިޔާ، ބޭރުގެ ދަރަނި އަދާކުރުމަށް ހިމަނާފައިވާ ކަމަށް މުނައްވަރު ވިދާޅުވި އެވެ.