މަޖިލީހަށް މިހާރު ހުށަހަޅާފައިވާ ބަޖެޓަކީ، މިބަޖެޓާ ހަވާލުވާނެ އެއްވެސް ފަރާތެއް ނެތް ބަޖެޓެއް ކަމަށް ނޮޅިވަރަމް ދާއިރާގެ މެންބަރު ހުސައިން އަރީފް ވިދާޅުވެއްޖެއެެވެ.
މިއަދު ކުރިޔަށްދާ ރައްޔިތުންގެ މަޖިލީހުގެ ޖަލްސާގައި 2019 ވަނަ އަހަރުގެ ބަޖެޓަށް ކުރެވޭ ބަހުސްގައި ވާހަކަ ދައްކަވަމުން އަރީފް ވިދާޅުވީ ބަޖެޓުގައި ހައްލުކުރަންޖެހޭ ކަންތައްތަކެއް ހުރިއިރު ބަޖެޓާ ހަވާލުވާނެ ފަރާތެއް ނެތި "ރަށްމެދަށް" ބަޖެޓް އޮތުމަކީ ކަންބޮޑުވެވަޑައިގަންނަވާ ކަމެއް ކަމަށެވެ.
ހުސައިން އަރީފް އިތުރަށް ވިދާޅުވީ ބަޖެޓާ ގުޅޭގޮތުން އޭނާގެ ކަންބޮޑުވުންތަކެއް ހުރުމުން އެކަމަށް ހައްލެއް ހޯދައިދިނުމަށް މަޖިލީހުގެ މެންބަރުން މަސައްކަތް ކޮށްދެއްވާނެ ކަމަށް އުއްމީދުކުރައްވާ ކަމަށެވެ. އަދި އާ ސަރުކާރާއެކު ބަޖެޓު ތަންފީޒު ކުރުން ރަނގަޅަށް ކުރިއަށްދާނެ ކަމަށް އުއްމީދުކުރައްވާ ކަމަށް ވެސް އޭނާ ވިދާޅުވިއެވެ. އާސަރުކާރަށް ކުރެވޭ އުއްމީދު ބޮޑު ކަމަށްވެސް ހުސައިން އަރީފް ވަނީ ވިދާޅުވެފަ އެވެ.
އަންނަ އަހަރުގެ ބަޖެޓުގެ ޖުމްލަ އަދަދަކީ 29.6 ބިލިއަން ރުފިޔާ ކަމަށް ރައްޔިތުންގެ މަޖިލީހުގެ އިއްޔެގެ ޖަލްސާގައި ބަޖެޓް ހުށަހަޅުއްވަމުން ފިނޭންސް މިނިސްޓަރު އަހްމަދު މުނައްވަރު ވަނީ ވިދާޅުވެފައެވެ.