ހައުސިން މިނިސްޓްރީގައި މިވަގުތުވެސް ސިޔާސީ މަގާމުތަކުގައި 42 މީހަކު އެބަތިބި ކަމަށާއި، އެއީ ވަރަށް ގިނަ އަދަދެއްގެ ބައެއް ކަމަށް ކުރީގެ ހައުސިން މިނިސްޓަރު މުހައްމަދު އަސްލަމް ވިދަޅުވެއްޖެ އެވެ.
ސަރުކާރު ބަދަލުކުރުމުގެ މަރުހަލާގައި އެކުލަވާލާފައިވާ ޓްރާސްސިޝަަން ކޮމިޓީތަކުން ބާއްވަމުންގެންދާ ނޫސްވެރިންގެ ބައްދަލުވުންތަކުގެ ތެރެއިން ހައުސިން މިނިސްޓްރީއާއި ގުޅޭގޮތުން ބޭއްވި ބައްދަލުވުމުގައި އަސްލަމް ވިދާޅުވީ، ފްލެޓް ދިނުމުގައި ސިވިލްސާވަންޓުންގެ ދައުރު ނިމުމަށްފަހު ފޯމްތައް ދަނީ ހައުސިންގެ ސިޔާސީ މަގާމުތަކުގައި ތިއްބެވި ބޭފުޅުންގެ ކޮމިޓީއަކަށް ކަމަށެވެ. އެ ކޮމިޓީން ނިންމާ ގޮތެއް ސިވިލް ސާވަންޓުންނަކަށް ނޭގެ ކަމަށާއި އެހެން ކަމުން އެކަމުގައި ޓްރާންސްޕޭރެންޓް ޕްރޮސެސްއެއް ނެތްކަން ފާހަގަ ކުރެވުނު ކަމަށް އަސްލަމް ވިދާޅުވިއެވެ.
ސިވިލް ސާވިސްއިން އެޕްރޫވް ކޮށްފައިވާ އޮނިގަނޑާ ގާތް ކުރާ އަދަދަކަށްވެސް ހައުސިންގެ ޑިޕާޓްމަންޓްތަކަށް މުވައްޒަފުން ނުނަގާ ކަމަށް އަސްލަމް ވިދާޅުވިއެވެ. އެކަމުގެ ސަބަބުން ގިނަ އަދަދެއްގެ ޕްރޮޖެކްޓްތަކެއް ކުރިޔަށް ނުގެންދެވި މަޑުޖެހިފައި ހުރިކަން ވެސް ފާހަގަ ކުރެއްވިއެވެ.
މީގެ އިތުރުން އެމްއާރުޑީސީ ފަދަ ބޮޑެތި ކުންފުނިތައް ހައުސިންގެ ދަށަށް ގެނެސް މާސިންގާ އިންސްޓިޓިއުޝަންއަކަށް އެތަން ހަދާފައިވާ ކަމަށާއި، ހައުސިން މިނިސްޓްރީ ވަނީ މެނޭޖް ނުކުރެވޭވަރުގެ ތަނަކަށް ހަދާފައި ކަމަށް އޭނާ ވަނީ ވިދާޅުވެފަ އެވެ.