އައްޑޫގެ ސުވާދިވް ކެފޭގައި ވެއިޓަރެއްގެ ގޮތުގައި މަސައްކަތްކުރަމުންދާ ޒުވާން މުހައްމަދު ނާސިފަކީ އާދައިގެ ވެއިޓަރެއްނޫނެވެ. އުމުރުން އެންމެ 17 އަހަރުގައި އޭނާ ވެއިޓަރެއްގެ ގޮތުގައި ކަސްޓަމަރުންނަށް ފޯރުކޮށްދޭ ޚިދުމަތަކަކީ ގިނަ ބައެއްގެ މެދުގައި މަޤުބޫލު، އަދި ގިނަ ބަޔަކު ބަލައިގަންނަ ޙިދުމަތެކެވެ.
މިދާއިރާއަށް ޝައުޤުވެރިވީ ކިހިނެއް؟
ކުޑައިރު ބޭނުންވީ ސިފައިންގެ މީހަކަށް ނުވަތަ ފުލުހަކަށް ވާން. މިދާއިރާއަށް ޝައުޤުވެރިކަން އުފެދުނީ ގުރޭޑު 9 ގަ. އޭރު ކިޔަވަމުން ދިޔައީ ސައިންސް އަދި ޓުއަރިޒަމް. އެކަމަކު އޭގައި ކިޔަވަން ޖެހޭ މާއްދާއެއްކަމަށްވާ ކެމިސްޓްރީ އަޅުގަނޑަށް ވަރަށް އުނދަގޫވި. އަޅުގަނޑު ބޭނުންވީ އަޅުގަނޑުގެ ހުނަރުވެރިކަން ހުރި ދާއިރާއަކުން ކިޔަވައިގެން އެކަން މުޖުތަމައަށް އަންގާދޭން. ދެން އެދުވަސްކޮޅު ސްކޫލްގަ ހޮސްޕިޓޭލިޓީ ޑިޕްލޮމާ ލެވެލް 2 ގެ ނަމުގައި އާ ކޯހެއް ފެށި. އޭރު ނޭނގޭ އެއީ ކޯޗެއްކަމެއްވެސް. އެކަމަކު ބޭނުންވީ ތަޖުރިބާކޮށްލަން.
އެކަމަކު ފުރަތަމަ ކޮޅު އެއްވެސް ވަރަކަށް ކިޔަވާ ހިތެއް ނުވޭ. ފަހުން ފަހުން އައިސް ކިޔަވާދިން ފިލާވަޅުތަކަށް ބޮޑަށް ޝައުގުވެރިވާން ފެށީވެސް. އެއްދުވަހު ސްކޫލްގެ ޑެޕިއުޓީ ޕްރިންސިޕަލް އަޅުގަނޑާ ބައްދަލުކޮށްފަ ބުނުއްވީ މިކޯހުން ޑިސްޓިންކްޝަން ސްޓަރ ހޯދާ ދަރިވަރުންނަށް މިދާއިރާއިން ވަރަށް ފުރުސަތު ލިބޭނެވާހަކަ އާއި، އަދި ދާއިރާގެ މުހިންމުކަން ކިޔައިދީ ވަރަށް ބޮޑަށް މޯޓިވޭޓްކޮށްދިން. އެހާ ހިސާބުން އަޅުގަނޑާ އަދި އެހެން ތިން ދަރިވަރަކު ވެގެން ޑިސްޓިންކްޝަން ހޯދަންވެގެން މަސައްކަތްފެށީ. އެކަމަކު ކަންދިމާކުރިގޮތުން ލިބުނީ ޑިސްޓިންކްޝަން ސްޓަރއެއް. އެއީ ހިތަދޫ ސްކޫލަށް ލިބުނު ފުރަތަމަ ޑިސްޓިންކްޝަން ސްޓަރ
މިދާއިރާއިން ކުރިއަށް ދިއުމަށް އެންމެ ބޮޑަށް އެހީތެރިކަން ލިބެނީ ކޮންބައެއްގެ ފަރާތުން؟
ކިޔަވަމުން ދިޔައިރު ބޮނޑަމައްމާ އަދި ދޮންތަގެ އެހީ ވަރަށް ބޮޑަށް ލިބުނު. އޭރު އިންޓަނެޓެއްވެސް ނުހުރޭ ގޭގަ. ލެޕްޓޮޕެއް އަދި ކޮމްޕިއުޓަރެއްވެސް ނުހުރޭ. ފުރަތަމަކޮޅު އަތުން އެސައިންމެންޓްތައް ވެސް ލިޔެހަދާ އުޅުނީ. އެހެން ނޫނީ ރައްޓެއްސެއްގެ ގެއަކަށް ގޮސްސަ ނޫނީ ބީޓެކް ޓީޗަރ ނޫނީ ކުލާސް ޓީޗަރުގެ އެހީތެރިކަމާއެއްކޮށް އެސައިންމެންޓްތައް ނިންމާއުޅުނީ. ދެން ދޮންތަ ކައިރީ ޑިސްޓިންކްޝަންއެއް ހޯދަން މަސައްކަތްކުރާ ވާހަކަ ބުނީމަ ދޮންތަ ބުނި ބޭނުން އިރަކު އެގެއަށް އެސައިންމެންޓްތައް ނިންމަން އަންނާށޭ. ދެން މިހާރު މަސައްކަތް ކުރާ ސުވާދިވް ކެފޭގެ މެނޭޖްމެންޓާއި ހުރިހާ ސުޕަވައިޒަރުންގެ ފަރާތުންވެސް ވަރަށް ބޮޑު އެއްބާރުލުމެއް ލިބޭ. ފުރަތަމަ ފެށިއިރު ކިޔަވަމުން ވަޒީފާއަށް ނިކުތީވެސް. އެންމެ ފުރަތަމަ މިތާ މަސައްކަތްކުރަންފެށިއިރު އަޅުގަނޑުގެ ސަރވިސް އެހާ ރަނގަޅެއް ނުވާނެ. ދެން މިތާގެ ފްރޮންޓް އިންޗަރޖް ތާއިލް، ހުސައިން އަދި ޝިފާޒް ސުޕަވައިޒަރގެ އެހީ ކަންކަން ދަސްކުރުމުގަ އާއި ރަގަޅުކުރަން ޖެހޭ ކަންކަން ފާހަނގަކުރުމުގައި ވަރަށް އެހީތެރިވެދިން. އެހާ ހިސާބުން މިކަމުގެ ތެރެއަށް ވަރަށް ބޮޑަށް ވަދެވިގެން މިކަން ވަރަށް ކުރާހިތުން ކުރެވެން ފެށުނީ.
ނާސިފްގެ ޚިދުމަތް އެހެން ވެއިޓަރުންނާއި ތަފާތު ވަނީ ކިހިނެތް؟
އަޅުގަނޑު އެންމެ ބޮޑު އަހަންމިއްޔަތުކަމެއްދެނީ ކަސްޓަމަރ މިތަނަށް އައިސް ޚިދުމަތް ހޯދައިގެން ދާއިރު، ލިބުނު ޚިދުމަތާ ދޭތެރޭ ހިތްހަމަޖެހޭ ސަރވިސްއެއް ދެވޭތޯ. އަބަދުވެސް ކަސްޓަމަރުންނާ ހިތުންވެ ހުރެ މުޚާތަބުކޮށް، ފީޑްބެކް ހޯދާ، ކަސްޓަމަރުންނަށް އަބަދުވެސް ކަމޭ ހިތާ، ވީހާވެސް އަވަހަކަށް އަދި ރަގަޅު އޯޑަރދެވޭތޯ ޔަގީންކުރަން. އަދި ކަސްޓަމަރުންގެ ޝަކުވާއެއް ލިބިއްޖެއްޔާ ވީހާވެސް އަވަހަކަށް އެކަން ހައްލުކުރެވޭތޯ ޔަގީންކުރަން. މީގެ އިތުރުން އަޅުގަނޑު ކިޔަވާފަ ހުރި ތަކެއްޗާ، ސުޕަވައިޒަރުންގެ އިރުޝާދުތައް އަބަދުވެސް ހަނދާން ބަހައްޓައި، ސެލްފް ގްރޫމިންގް އަދި ސެލްފް ޑިސިޕްލިންއަށްވެސް ވަރަށް ބޮޑަށް އަހަންމިއްޔަތުކަންދެން. މިގޮތުން ސެލްފް ޑިސިޕްލިންއަށް އަޅުގަނޑު ވަޒީފާއިން ބޭރުގައިވެސް ވަރަށް ބޮޑު އަހައްމިޔަތުކަމެއްދެން. އެގޮތުން ދުންފަތުގެ އިސްތިއުމާލެއްވެސް ނުކުރަން. އަދި 18 އަހަރު ނުވާތި ލައިސެންސް ނެތި ނުދުއްވަންވެގެން ވަޒީފާއަށް އައިސްގޮސް ހަދަނީ ވެސް، އަދި ބޭރު ތެރޭގައި އުޅެހަދަނީވެސް ބައިސްކަލުގަ.
މިދާއިރާއިން ކުރިއަށް ދާން ވިސްނަނީ ކިހިނެތް؟
އަޅުގަނޑު އެއްގޮތަކަށްވެސް ބޭނުމެއް ނުވޭ ރަލާބެހޭ މަސައްކަތެއް ކުރާކަށް. އެހެންވެ ކުރިއަށް އޮތް ތަނުގައި އަޅުގަނޑު ބޭނުންވަނީ ޕޭސްޓްރީ ޝެފަކަށް ވާން. އަދި އިރާދަ ކުރެއްވިއްޔާ އައްޑޫގައި ޕޭސްޓްރީ ޝޮޕެއް ހުޅުވާނަން. އަޅުގަނޑުގެ މިހުވަފެން ހަޤީޤަތަކަށް ހެދުމަށްޓަކާ އަޅުގަނޑު މިހާރު މިހިރީ ފޯ ސިޒަންސް ގެ އެޕްރެންޓިސްޝިޕް ޕްރޮގްރާމަށް އެޕްލައިކޮށްގެން. އިރާދަކުރެއްވިއްޔާ ފުރުސަތު ލިބިގެން އަޅުގަނޑު މިދާއިރާއިން ކުރިއަށް ދާނަން.
މިދާއިރާއިން ކުރިއަށް ދާން ބޭނުން ފަރާތްތަކަށް ބުނެލަން އޮތީ ކީކޭ؟
އަޅުގަނޑު ބުނެލަން އޮތީ ވެއިޓަރުކަމަކީ އަދި ހޮސްޕިޓޭލިޓީ ދާއިރާއަކީ އެއްގޮތަކަށްވެސް ދަށް ނުވަތަ ކަޑަ ވަޒީފާއެއް، ނުވަތަ ދާއިރާއެއް ނޫނޭ. ވަރަށް ބޮޑެތި ކުރިއެރުންތައް ލިބި، އާ ކަންކަން ދަސްވެ، އާ މީހުންތަކަކާ ދިމާވެ، އަދި އަމިއްލަ މީހާ ހަރުދަނާ ކުރުމަށްވެސް ލިބޭ ވަރަށް ބޮޑު ފުރުސަތެކޭ. މިވަޒީފާގެ ސަބަބުން ވަޒީފާއިން ބޭރުގައިވެސް ވަގުތައް ކަމޭހިތާ، މީހުންނާ ރަގަޅަށް މުހާތަބު ކުރެވި، މީހުންނާ ހިނިތުންވުމާއެކު ބައްދަލުކޮށް، އަދި މުޅި މުޖުތަމައުގެ ލޯބި ލިބޭ މަސައްކަތެއް ކުރެވޭ ދާއިރާއެކޭ. އެހެންވީމަ ހަމަ މިދާއިރާއިން ކުރިއަށް ދާށޭ ބުނެވޭނީ.
އަޅުގަނޑުމެން އައްޑޫލައިވްގެ ފަރާތުން އެދެނީ ނާސިފްއަށް އުފާވެރި ކާމިޔާބު މުސްތަގުބަލަކަށެވެ. ގަދައަޅައި މަސައްކަތްކޮށް ތިމާގެ ހުވަފެން ހަގީގަތަކަށް ހަދާނެ ހިތްވަރެވެ.