އިންތިހާބީ ރައީސް އިބްރާހިމް މުހައްމަދު ސޯލިހު އަދި އިންތިހާބީ ނައިބް ރައީސް ފައިސަލް ނަސީމް ހުވާ ކުރައްވާ ރަސްމިއްޔާތަށް 46 ގައުމެއްގެ އިއްޒަތްތެރިން ބައިވެރިވެވަޑައިގަންނަވާނެ ކަމަށް ފޮރިން މިނިސްޓްރީން ބުނެފިއެވެ.
17 ނޮވެމްބަރުވާ ހޮނިހިރު ދުވަހު ގަލޮޅު ދަނޑުގައި އޮންނަ ހުވާކުރެއްވުމުގެ ރަސްމިއްޔާތަށް ވަޑައިގަންނަވާނެ ކަމަށް ފޮރިން މިނިސްޓްރީން ނެރެފައިވާ ލިސްޓުގައި 17 އިއްޒަތްތެރި ބޭފުޅުން ހިމެނިވަޑައިގަންނަވައެވެ.
އޭގެ ތެރޭގައި އިންޑިއާގެ ބޮޑުވަޒީރު ނަރެންދުރަ މޯދީގެ އިތުރުން ސްރީލަންކާގެ ކުރީގެ ރައީސާ ޗަންދްރިކާ ބަންޑާރަނަޔަކަ ކުމާރުތުންގާ ހިމެނިވަޑައިގަންނަވައެވެ. އެގޮތުން ޗަންދްރިކާ ވަނީ ބުރާސްފަތި ދުވަހު ރާއްޖެ ވަޑައިގަންނަވާފައެވެ. މޯދީ ވަޑައިގެންނެވުމަށް ހަމަޖެހިފައިވަނީ ހޮނިހިރު ދުވަހުއެވެ.
މި 17 ބޭފުޅުންގެ އިތުރުން އެކި ގައުމުތަކުން އެމްބަސެޑެރުންނާއި، އޮފިޝަލުން އަދި ވިޔަފާރިވެރިންގެ ބައެއް ލީޑަރުންވެސް ހުވާ ކުރުމުގެ ރަސްމިއްޔާތުގައި ބައިވެރިވެވަޑައިގަންނަވާނެ ކަމަށް ފޮރިން މިނިސްޓްރީން ބުންޏެވެ.
ހުވާ ކުރެއްވުމުގެ ރަސްމިއްޔާތަށް ސައުދީ އަރަބިއްޔާ، ފަލަސްތީނު، ޕާކިސްތާނު، ސްރީލަންކާ، ޗައިނާ، ޖަޕާން، މޮރޮކޯ، އެމެރިކާ، ޗައިނާ، ޝީޝެލްސް، މޮރިޝަސް، އަދި ޔޫއޭއީގެ އިސްވެރިން ބައިވެރިވެ ވަޑައިގެންނެވުމަށް ވަނީ ހަމަޖެހިފައިވެއެވެ.
ހުވާ ކުރެއްވުމުގެ ރަސްމިއްޔާތު ހޮނިހިރު ދުވަހު ހަވީރު 17:00 ޖަހާއިރު ފެށުމަށް ހަމަޖެހިފައިވާއިރު، މި ރަސްމިއްޔާތުގައި 11،500 ބޭފުޅުން ބައިވެރިވެވަޑައިގަންނަވާނެ އެވެ.
މިއަދަކީ ޖަޒީރާ ރާއްޖެއަށް އާ ދުވަހަކަށް ވެގެން ދާނެއެެވެ.