ޔުއެފާ ނޭޝަންސް ލީގުގައި އެންމެ ފަހުން ސްޕެއިން އާ ދެކޮޅަށް ކްރޮއޭޝިއާ ކުޅުނު މެޗުގައި އެޓީމުގެ މިޑްފީލްޑަރު އިވާން ރަކިޓިޗް އަށް ލިބުނު އަނިޔާއަކާއި ގުޅިގެން މި މުބާރާތުގައި މާދަމާ ރޭ އިންގްލެންޑް އާ ބައްދަލުކުރާ މެޗުގައި ނުކުޅެވޭނެކަމަށް ކްރޮއޭޝިއާގެ ކޯޗު ލަޓްކޯ ޑަލިޗް ބުނެފިއެވެ.
ކްރޮއޭޝިއާގެ ޒަގްރެބްގައި 3-2 އިން ސްޕެއިން އަތުން މޮޅުވި މެޗުގެ 67 ވަނަ މިނެޓުގައި ލިބުނު އަނިޔާއަކާއި ގުޅިގެން ރަކިޓިޗް ބަދަލުކޮށްފައިވާއިރު އޭނާގެ ބަދަލުގައި ކުޅެން ނިކުތީ ނިކޮލާ ވްލަސިޗް އެވެ.
"އޭނާ އަށް ލިބިފައިވާ އަނިޔާ ސީރިއަސް. އެހެންވުމުން އޭނާ ވަނީ އެނބުރި ބާސެލޯނާ އަށް ގޮސްފައި. މީގެކުރީން ކުޅުންތެރިއަކަށް އަނިޔާއެއް ލިބުނު ނަމަވެސް އަހަރެން ރިސްކު ނަގާފައި ހުންނާނެ. އެކަމަކު، މި ފަހަރު އޭނާ އަށް ލިބިފައިވާ އަނިޔާ ސީރިއަސްކަމަށް ޤަބޫލުކުރެވޭތީވެ އަރާމުކުރަން ފުރުޞަތު ދިނީ." ސްކައި ސްޕޯޓްސް އަށް ދިން އިންޓަވިއުގައި ޑަލިޗް ބުންޏެވެ.
މި މުބާރާތުގެ ލީގު އޭގެ ހަތަރެއްގައި ހިމެނޭ ތިން ޓީމުކަމަށްވާ އިންގްލެންޑާއި ސްޕެއިން އަދި ކްރޮއޭޝިއާ އަށްވެސް ފައިނަލް ބުރުން ޖާގަ ހޯދުމުގެ ފުރުޞަތު އޮތްއިރު މިވަގުތު އެއްވަނައިގައި އޮތީ ހަތަރު މެޗުން ހަ ޕޮއިންޓް ހަމަކޮށްގެން ސްޕެއިން އެވެ. އިންގްލެންޑް އަދި ކްރޮއޭޝިއާ އަށް ތިން މެޗުން ލިބިފައިވަނީ ހަތަރު ޕޮއިންޓެވެ. މި ދެ ޓީމު ބައްދަލުކުރާ މެޗުން މޮޅުވާ ޓީމަކަށް އަނެއް ބުރުން ޖާގަ ލިބޭނެއެވެ. މި މެޗު އެއްވަރުވެއްޖެނަމަ މި ގްރޫޕުގެ އެއްވަނައިގައި ގޮތުގައި ކޮލިފައިވާނީ ސްޕެއިން އެވެ.
އިންގްލެންޑް އާ ކްރޮއޭޝިއާ ބައްދަލުކުރާ މެޗު ކުޅުމަށް ހަމަޖެހިފައިވަނީ މާދަމާ ރޭ ރާއްޖޭގަޑިން 19:00 ގައެވެ. މިމެޗު ކުޅެވޭނީ އިނގިރޭސި ވިލާތުގެ ވެމްބްލީ ސްޓޭޑިއަމްގައެވެ.