އަލުން ކޮމަންވެލްތުގެ މެމްބަރު ޤައުމަކަށް ވުމަށްޓަކައި އަންނަ ހަފްތާގައި ހުށަހެޅުމަށް އައު ސަރުކާރުން ނިންމައިފިއެވެ.
އަލުން ކޮމަންވެލްތުގެ މެމްބަރެއްގެ ގޮތުގައި ރާއްޖެވުމަށް ނިންމާފައިވަނީ، އައު ސަރުކާރުގެ ފުރަތަމަ ސަތޭކަ ދުވަހުގެ ލަނޑުދަނޑިތަކުގެ ތެރޭގައި ހިމަނައިގެންނެވެ.
ޚާރިޖީ ދާއިރާއިން ފުރަތަމަ 100 ދުވަހުގެ ތެރޭގައި އައު ރައީސް އިބުރާހިމް މުހައްމަދު ޞޯލިޙް ކަނޑައަޅުއްވާފައިވާ ކަމަކީވެސް ހަމައެކަނި ކޮމަންވެލުތުގައި ރާއްޖެއިން ބައިވެރިވުމެވެ. ރާއްޖެއިން ކޮމަންވެލްތުގައި ބައިވެރިވީ ރައީސް މައުމޫނުގެ ވެރިކަމުގައި 1982 ވަނަ އަހަރުގައެވެ.
ކޮމަންވެލުތުން ރާއްޖެ ވަކިވުމަށް ރައީސް ޔާމީނުގެ ސަރުކާރުން ނިންމީ 13 އޮކްޓޫބަރު 2016 ގައެވެ. ކޮމަންވެލްތުން ރާއްޖެ ވަކިވިކަން އިއުލާނު ކުރެއްވީ ރައީސް އޮފީހުގައި ބޭއްވި ރަސްމިއްޔާތެއްގައި އޭރުގެ ފޮރިންގ މިނިސްޓަރ ޑރ މުހައްމަދު އާސިމެވެ.
ރައީސް ޔާމީނުގެ ސަރުކާރުން ސިޔާސީ ލީޑަރުން ހައްޔަރުކޮށް ޖަލަށް ލަމުން ދިޔަ ދަނޑިވަޅުގައި ރާއްޖެ ކޮމަންވެލްތުން ވަކިވީ ބައިނަލްއަޤުވާމީ ފިއްތުންތަކާއި ގުޅިގެން ކަމަށް ސިޔާސީ ފަރާތްތަކުން ބުނި ނަމަވެސް، ރައީސް ޔާމީނުގެ ސަރުކާރުން ބުނެފައިވަނީ ކޮމަންވެލްތުން ވަކިވީ އެޖަމާއަތުން ރާއްޖެއާ މެދު ބޭއިންސާފުން އަމަލުކޮށް، ދާޚިލީ ކަންކަމާ ބެހެން ވެސް މަސައްކަތް ކުރާތީ ކަމަށެވެ.
އިއްޔެ އައު ސަރުކާރުން ވަނީ ހުވާ ކުރެއްވުމަށްފަހު ސަރުކާރާއި ހަވާލުވެފައެވެ.