މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަންގެ ނަމުގައި ނޮވެމްބަރ 17 ގައި ރައީސުލްޖުމްހޫރިއްޔާ އިބްރާހިމް މުޙަންމަދު ޞޯލިޙް އުފައްދަވާފައިވާ ކޮމިޝަނުން 29 މައްސަލައެއްގެ ތަހުގީގު ކުރިއަށް ގެންދިއުމަށް އެބައޮތްކަމަށް އެ ކޮމިޝަނުގެ ރައީސް ހުސްނުއްސުއޫދު ވިދާޅުވެއްޖެއެވެ.
ހުސްނުއްސުޢުދު މިކަން ހާމަ ކުރެއްވީ ވީޓީވީގައި ވާހަކަ ދައްކަވަމުންނެވެ. ކުރިން ބަންޑާރަ ނައިބުކަން ވެސް ކުރައްވާފައިވާ ގާނޫނީ ވަކީލު ސުއޫދު ވިދާޅުވީ އެ ކޮމިޝަނުން ބަލާ މައްސަލަތަކަށް ތަހުގީގީ ބަޔާން ނަގަންޖެހުނު ކޮންމެ މީހެއްގެ ބަޔާން ނަގާނެ ކަމަށެވެ. އަދި ސަރުކާރަށް ނިސްބަތްވާ މީހެއްކަމުގައި ވިޔަސް ބަޔާން ނަގާނެ ކަމަށް ވެސް ސުޢޫދު ވިދާޅުވިއެވެ. ކޮމިޝަނުން ބަލާ މައްސަލަތަކުގެ ތެރޭގައި ގިނަ ދުވަހު އިންސާފު ނުލިބި ހުރި މައްސަލަތައް ހިމެނެއެވެ . އެ ގޮތުން ޑރ. އަފްރާޝީމް އަލީ އަވަހާރަކޮށްލި މައްސަލަ އާއި މީސް މީޑިއާ އެކްޓިވިސްޓް ޔާމީން ރަޝީދު މަރާލި މައްސަލަ އަދި ނޫސްވެރިޔާ އަޙްމަދު ރިލްވާން އަބްދުﷲ ގެއްލިފައިވާ މައްސަލަ ހިމެނެއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާ އަށް ލިބިދޭ އިޚްތިޔާރުގެ ދަށުން، ރައީސުލްޖުމްހޫރިއްޔާގެ ޤަރާރު ނަންބަރު 2018/13 އިން، ރައީސުލްޖުމްހޫރިއްޔާ މި ކޮމިޝަން އުފެއްދެވީ، 1 ޖަނަވަރީ 2012 އިން ފެށިގެން 17 ނޮވެންބަރު 2018 ގެ ނިޔަލަށް ހިނގާފައިވާ، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތަކުގެ ތެރެއިން، އެކިއެކި ސަބަބުތައް މެދުވެރިވެގެން، އެކަށީގެންވާ މިންވަރަށް ތަޙުޤީޤު ނުކުރެވި ހުރި މައްސަލަތަކުގައި މިނިވަން، މުސްތަޤިއްލު އަދި އިތުބާރު ހިފޭ ތަޙުޤީޤެއްކޮށް، ޙަޤީޤަތް ހޯދައި، ޢާންމުކުރުމަކީ އިންސާފު ޤާއިމުކުރުމަށްޓަކައި ދައުލަތުން އުފުލަންޖެހޭ ޒިންމާއެއްކަމަށް ރައީސުލްޖުމްހޫރިއްޔާ ދެކިވަޑައިގަންނަވާތީއެވެ.
މި ކޮމިޝަނަކީ، ކޮމިޝަނުން ތަޙުޤީޤުކުރެވޭ މައްސަލަތަކާ ގުޅިގެން ތަޙުޤީޤީ އިދާރާއަކުން އަޅަންޖެހޭ އެންމެހައި ފިޔަވަޅުތަކެއް އެޅުމާއި، ޖިނާއީ މައްސަލަތައް ތަޙުޤީޤުކުރާ އިދާރާއަކަށް ލިބިދޭ އެންމެހައި ބާރުތަކެއް ލިބިގެންވާ ކޮމިޝަނެއްކަން ފާހަގަކޮށްލެވެއެވެ.
ކައިރި މުސްތަޤްބަލެއްގައި މިފަދަ މައްސަލަތައް ތަޙުޤީޤް ކުރެވި ކުށްވެރިވާ ފަރާތްތަކަށް ހައްޤު އަދަބު ދެވިގެން ދިޔުމަކީ އިންސާފަށް ނުހަނު ބޭނުންވެފައި ތިބި އެތައް ދިވެހިންނެއްގެ އިންތިޒާރެވެ.