ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި މެއި 16، 2013 ވަނަ ދުވަހު ޝާއިއުކޮށްފައިވާ ލިއުމެކެވެ. ކިޔުންތެރިން އިންސާފުކޮށްލައްވާށެެވެ.
—————————————————-
މެއި 3، 2013 ވީ ހުކުރު ދުވަހަކީ ފާހަގަކޮށްލެވޭ ދުވަހެކެވެ. ދުވަހުގެ ހަވީރު ހުޅުމީދޫގެ ބޮޑު މަގުން ފެނިގެން ދިޔައީ އާދަޔާ ޚިލާފު މަންޒަރުތަކެކެވެ.
ދީން ހިމާޔަތް ކުރުމަށްޓަކައި ލާދީނީ މީހުންނާ ދެކޮޅަށް ކުރި މުޒާހަރާ އާއި، ލާދީނީ މީހުންނަކީ ބަޣާވާތް ކުރި މީހުން ކަމަށް ބުނެ ކުރި މުޒާހަރާ ކުރިއަށް ދިޔައީ އެއް ވަގުތެއްގަ އެވެ. ދެކޮޅުވެރިކަމުގެ ޝުޣޫރުތައް ފާޅު ކުރަމުން އައި ދެ ލަޝްކަރު ބައްދަލުވީ ހިސާބުގައި، ހުޅު ރޯނުވީ ހަމަ ކިރިޔާ އެވެ. ހަނގުރާމައިގެ މައިދާނަކަށް އެތަން ބަދަލުނުވި ސަބަބަކަށް މެދުވެރިވީ ފުލުހުންނެވެ. އެކަމަށްޓަކައި ފުލުހުންނަށް ޝުކުރު އަދާކުރަމެވެ.
އެ ދުވަހު ފެނުނު މަންޒަރުތަކަށާއި، އިވުނު އަޑުތަކަށް ބަލާއިރު، އެ މުޒާހަރާއަކީ ދީނާއި އެއްވެސް ގުޅުމެއް ނެތް ސިޔާސީ މުޒާހަރާއެކެވެ.
ނަމަވެސް ސިޔާސީ މީހުންގެ މަޤްސަދުތައް ހާސިލް ކުރުމަށްޓަކައި، ދީން ހަތިޔާރަކަށް ހައްދަވައިގެން، ރައްޔިތުންގެ މެދުގައި ބައިބައިވުން އުފެއްދުމުގެ ބޭނުމުގައި ކުރި މުޒާހަރާއެކެވެ. ތެދެކެވެ. މަންޒަރު ސިފަވެގެން ދިޔައީ ދީނީ މީހުން ކާފަރުންނާއި ދެކޮޅަށް ކުރި މުޒާހަރާއެއްގެ ގޮތުގަ އެވެ. އަދި އަޑު އުފުލަމުން ދިޔައީ ވެސް މި ދެންނެވި ގޮތަށެވެ.
އެމްޑީޕީ އަށް ތާއީދުކުރާ މީހުންވެސް ބުނަމުން ދިޔައީ ބަޣާވާތް ކުރީ ލާދީނީ މީހުން ކަމަށެވެ. އެހެން ކަމުން މުޒާހަރާ ކުރިއަށް ދިޔަ އިރު މިދެބައި މީހުންގެ ތެރެއިން ދީނީ މީހުންނާއި ލާދީނީ މީހުންނަކީ ކޮން ބައެއްކަން އެނގޭނެ ގޮތެއް ވެސް ނެތެވެ.
މި ގައުމަކީ ލިޔެކިއުންތަކުގައި އަބަދުވެސް %100 މުސްލިމް ގައުމެކެވެ. އެހެން ނަމަވެސް ރާއްޖޭގައި އިސްލާމީ ޝަރިއްޔަތެއް ނުހިންގަ އެވެ.
އިސްލާމް ދީނަށް އުޅެވޭތޯ މަސައްކަތް ކުރާ ބަޔަކު އެގޮތުގައި ދެމިތިބެ އެވެ. އަނެއްބަޔަކު އެބައި މީހުންނަށް ފެންނަ ގޮތަކަށް އުޅެތެވެ. މިހެން ކަންހިނގަމުން އައި ގައުމެއްގައި، ހަމަ ކުއްލިޔަކަށް އިސްލާމް ދީން ހިމާޔަތް ކުރަން ބަޔަކު ނިކުމެ މުޒާހަރާ ކުރަން ފެށީމަ، ދީން ހިމާޔަތް ކުރަން އެ ނިކުންނަ މީހުންނަކީ، ކިހާ ވަރެއްގެ ދީންވެރި ބައެއްތޯ ސުވާލުކޮށްލާ މީހުން ވެސް އުޅޭނެތާއެވެ.
ފެންނަ ފެނުމަށް ދީން ހިމާޔަތްކުރަން ނިކުތީވެސް ހަމަ އަހަރެމެން ކަހަލަ އިންސާނުންނެވެ. އިންސާނުންނަށް ވީތީ އެ މީހުންނަށް ވެސް ކުށް ކުރެވޭނެ އެވެ.
ކުށްތަކަށް ތައުބާ ދެއްވައި ފާފަ ފުއްސަވަނީ މާތްﷲ އެވެ. ނަމަވެސް ﷲގެ ދީން ހިމާޔަތްކުރުމުގެ ނަމުގައި މުޒާހަރާކޮށް ހަނގުރާމައަށް ނިކުމެ ވަޑައިގަންނަވާއިރު، ވިސްނަވާލައްވަންޖެހޭ ކަމެއް އެބަ އޮތެވެ. އެއްމެ ފަހުން ﷲ އަށް ސަޖިދަކުރީ ކޮން ދުވަހަކުތޯ އެވެ.
މި ސުވާލުގެ ޖަވާބުގައި، ތިމަންނާއަށް ނަމާދު ނުކުރެވެނީ ފައިގެ ހުޅަށް ތަދުވާތީއޭ ބުނެފަ މުޒާހަރާއަށް ދިޔާމަ، ތީތި ކަޑައޭ ލާދީނީ މީހުން ބުނާނެ އެވެ. އަޑު އަހާނެ ބަޔަކު ނެތި އެމްޑީޕީ މީހުންނަށް ޖެއްސުން ކުރުމުގެ ނިޔަތުގައި އަޑު ހަރުކޮށް ޕާޓީ ހަރުގޭގައި ގުރުއާން ޖެހީމަ ތިޔަ ޖެއްސުން ކުރެވެނީ ކޮން ފަރާތަކަށް ހެއްޔެވެ. ﷲގެ ދީން ހިމާޔަތް ކުރުމުގެ ނަމުގައި ތިކުރައްވާ ކަމަކީ ﷲ އަށް ފުރައްސާރަ ކުރެއްވުމޭ ލާދީނީ މީހުން ބުނާނެ އެވެ.
ނޯޓް: "ލާދީނީ" މި ބަހުގެ މާނަ ބަލާނެ ކަމެއް ނެތެވެ. މި ރާއްޖޭގެ ސިޔާސީ މީހުން ލާދީނީ މާނަ ކުރައްވަނީ އެއްވެސް ދީނަކަށް ނޫޅޭ މީހުންނަށް ނިސްބަތްކޮށްގެނެއް ނޫނެވެ. ލާދީނީ އަކީ ސިޔާސީ ބަހެކެވެ. ހުރިހާ ސިޔާސީ މީހުން ވެސް މި ބަސް ބޭނުން ކުރައްވާނެ އެވެ.
"ލާދީނީ" މި ބަހަކީ ސިޔާސީ ބަރު ހަތިޔާރެކެވެ.