ކެމްޕޭން ކުރެއްވުމަށް މިދިޔަ ހުކުރު ދުވަހު އައްޑު އަށް ވަޑައިގެންނެވި ޕީޕީއެމްގެ ރަނިންމޭޓް ޑރ. މުހައްމަދު ޖަމީލް އަހުމަދު އައްޑު އަށް ކުރެއްވި ދަތުރު ނިންމާލުމަށް ފަހު މިއަދު ފުރާވަޑައިގެންފި އެވެ.
ރިޔާސީ ކެންޑިޑޭޓް އަބްދުﷲ ޔާމީނާ ނުލައި، ޑރ. ޖަމީލް އައްޑު އަށް ވަޑައިގެން ފޭދޫގައި ވަނީ ބައްދަލުވުމެއް ވެސް ބާއްވައިފަ އެވެ. އަދި ގުޅިފައިވާ ރަށްތަކަަށް ވަޑައިގެން ޕާޓީ އަށް ތާއީދު ހޯދުމުގެ މަސައްކަތާއި މެމްބަރުން އިތުރު ކުރުމުގެ މަސައްކަތް ވެސް ޑރ. ޖަމީލް ކުރައްވާފައިވެ އެވެ.
ޑރ. ޖަމީލް އައްޑު އަށް ކުރެއްވި ދަތުރުގައި އޭނާ އާ އެެކު ބައިވެރިވެ ވަޑައިގެންނެވީ ހޯމް މިނިސްޓްރީގެ ސްޓޭޓް މިނިސްޓަރަކަށް ހުންނަވާ ހުސަައިން މަނިކު ދޮންމަނިކު އާއި ހިޔަލީ މުހައްމަދު ރަޝީދު އެވެ.
ޑރ. ޖަމީލް ވިދާޅުވީ ޕީޕީއެމަށް އައްޑޫން ބޮޑު ތަރުހީބެއް ލިބެމުން އަންނަ ކަމަށާއި ގިނަ އަދަދެއްގެ ޒުވާނުން އެ ޕާޓީ އާ ގުޅެމުން އަންނަ ކަމަށެެވެ.
ޖަމީލް އަދި ވިދާޅުވީ ކުރިއަށް އޮތް ދުވަސްތަކުގައި ރިޔާސީ ކެންޑިޑޭޓާ ނުލާ އޭނާ ކެމްޕޭން ކުރައްވަމުން ގެންދާތަން ވަރަށް ބޮޑަށް ފެނިގެން ދާނެ ކަމަަށެެވެ.