ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި މެއި 19، 2013 ވަނަ ދުވަހު ޝާއިއުކޮށްފައިވާ ލިއުމެކެވެ. ކިޔުންތެރިން އިންސާފުކޮށްލައްވާށެެވެ.
—————————————————-
އަޅުގަނޑު އަބަދުވެސް އެއްބަސް ވަނީ ދެބަސްވުމަށެވެ. ހުރިހާ އެއްމެންގެ ޚިޔާލު އަޅުގަނޑާ އެއްގޮތްވާކަށް ނުޖެހެ އެވެ. އަދި އަޅުގަނޑު ފާޅު ކުރާ ކޮންމެ ޝުޢޫރަކީ ތިޔަ ބޭފުޅާ އަށް ކަމުދާ ޝުޢޫރަކަށްވުން ލާޒިމެއް ނޫނެވެ. އެހެންކަމުން، މި ބްލޮގްގައި (ވެލްކަމް ޓް ޝާއިދު ލައިވް) އަޅުގަނޑު ލިޔެ ފާޅުކޮށްފައިވާ ޝުޢޫރުތަކާ މެދު ހިތްހަމަޖެހިވަޑައި ނުގަންނަވާ ނަމަ، އެއީ އަޅުގަނޑުގެ މައްސަލައެއް ނޫނެވެ. އެއީ ތިޔަ ބޭފުޅާގެ އަމިއްލަ މައްސަލައެކެވެ.
ކޮންމެއަކަސް، މިދިޔަ ހުކުރު ދުވަހު މިރަށުގެ މިސްކިތްތަކުގައި ކިޔެވި ހުކުރު ޚުޠުބާ އާއި ގުޅޭގޮތުން އަޅުގަނޑު ހިތުގައި އުފެދުނު ޝުޢޫރުތަކެއް "ޚުޠުބާ ލިޔުއްވާ މަނިކުފާނަށް" މި ސުރުޚީގެ ދަށުން ހުޅުވާލެވިފައިވާ ސިޓީއެއްގެ ގޮތުގައި ހާމަ ކުރީމެވެ.
އަޅުގަނޑު އެ ލިޔުން ލިޔުނީ އެއްވެސް ގޮތަކަށް، އެދުވަހުގެ ޚުޠުބާ ލިޔުއްވި ފަރާތަކީ ކާކުތޯ ބަލައި، އެ ފަރާތަކަށް އަމާޒުކޮށްގެންނެއް ނޫނެވެ. އަދި ހަމަ އެހެންމެ އަޅުގަނޑުގެ މަޤްސަދަކީ، ޚުޠުބާ ލިޔުއްވާ ބޭފުޅުންގެ ޢިލްމީ ޤާބިލްކަމާ މެދު ސުވާލު އުފެއްދުމެއް ވެސް ނޫނެވެ.
ނަމަވެސް ޒަމާނުއްސުރެ މި ރާއްޖޭގައި ޚުޠުބާ ލިޔެ ކިޔުމުގައި އޮންނަ ހިފެހެއްޓިފައިވާ ސިޔާސަތު އަޅުގަނޑަށް ކަމުނުދާ ވާހަކައާއި، އެއްވުރެ ބޮޑަށް ޚުޠުބާއަކީ، ހުޅުވާލެވިފައިވާ އެއްޗަކަށް ވާން ޖެހޭނެ ވާހަކަ އެވެ.
އަދި ހަމައެއާއެކު، ޚުޠުބާ ވާންޖެހޭނީ އެޚުޠުބާ އަޑުއަހަން ތިބޭ ބައެއްގެ މެދުގައި ހުންނަ މައްސަލަތަކަށް (މިރަށުގެ މިސްކިތްތަކުގައި ކިޔާ ޚުޠުބާގައި މިރަށު ރައްޔިތުންގެ މެދުގައި ހުންނަ މައްސަލަތަކަށް) ރިއާޔަތްކުރެވިފައިވާ ޚުޠުބާއަކަށް ވާންޖެހޭނެ ވާހަކައެވެ. ވަކިން ޚާއްސަކޮށް އަޅުގަނޑު ފާހަގަކުރަން ބޭނުންވީ، ކޮންމެ ހަފްތާއަކު އެއް ފަހަރު އަޅުގަނޑުމެން އަޑު އަހާ ޚުޠުބާއަކީ ޤުރުއާނާއި ސައިންސާއި، އިންސާނީ ތަޖްރިބާގެ މައްޗައް ބިނާ ކުރެވިގެން އިންސާނާގެ ސިކުނޑިއަށް އަސަރު ފޯރުވޭ ފަދަ ގޮތަކަށް ބައްޓަން ކުރެވިފައިވާ ޚުޠުބާއަކަށް ވުން މުހިއްމުކަމުގެ ވާހަކަ އެވެ. (މިތާގައި ދެން ތިޔަބޭފުޅާ ކުރައްވާނެ ސުވާލަކީ ކޮބައިހޭ ހަދީޘާއި ސުންނަތުގެ ވާހަކަ؟ އިންސާނީ ތަޖްރިބާއޭ އަޅުގަނޑު ލިޔެފައި އެ އޮތީ ހަދީޘާއި ސުންނަތުގެ ވާހަކައަށެވެ.)
އަޅުގަނޑުވެސް އެއްބަހެވެ. ޚުޠުބާ ކިޔަންް ގެންގުޅުއްވާ ރާގު (ސަބްލިމިނަލް މެތޮޑް ހިމެނޭ) ވަރަށް ފުރިހަމަ އެވެ. ހުރިހާ ދީންތަކެއްގައި ވެސް ވަޢުޘާއި ނަސޭހަތް ދިނުމުގައި، ބޭނުންކުރާ ރާގު ތަކަކީ، އިންސާނާގެ ސިކުނޑިއާއި ކުޅެލުމަށް ބޭނުން ކުރާ ހަތިޔާރެކެވެ.
ވަކިން ޚާއްސަކޮށް ދެއްވާ ނަސޭހަތްތަކުގައި ސިސްޓަމެޓިކް ކޮށް ސަބްލިމިނަލް މެސެޖްތައް ހިމަނައެވެ. ނަމަވެސް އަޅުގަނޑުމެންގެ ޚުޠުބާތަކުގައި މިދެންނެވި ގޮތައް ސަބްލިމިނަލް މެސެޖް (ޙިކުމަތާއި ރިވެތި ވައުޘު) ހިމަނާފައި ނުވާކަން ތަކުރާރުކޮށް ފާހަގަކުރެވެއެވެ. ނަތީޖާއަކަށްވަނީ ޚުޠުބާގައި ކިޔާއެއްޗަކަށް ސިކުނޑި އިޖާބަނުދިނުމެވެ. ސިކުނޑިއަށް އެޚުޠުބާ ނަގަނީ ހަމައެކަނި އިވޭ އަޑެއްގެ ގޮތުގަ އެވެ.
ކޮންމެއަކަސް ޚުޠުބާ އާ ގުޅޭ ގޮތުން އަޅުގަނޑުގެ ޚިޔާލު ހާމަކުރުމުން މިވީ އެހެން ގޮތެކެވެ. ސިޔާސީގޮތުންނާއި ޒާތީގޮތުން އަޅުގަނޑަށް ހަމަލާތައް އަމާޒުވާން ފެށީ އެވެ. އެ ބޭނުމަށްޓަކައި، އަޅުގަނޑުގެ ބްލޮގުގައި ހުރި އެ ބާވަތުގެ ލިޔުންތައް ނަގައިގެން ސޯޝަލް މީޑިއާގައި ހިންގަން ފެށީ އެވެ. އެއީ އެކަން ވާނެ ވެސް ގޮތެވެ. ކުރިއަށް ގެންދަވާށެވެ. އަޅުގަނޑުގެ ފަރުވާލެއް ނެތެވެ.
ކުރީގެ ލިޔުމެއްގައި ވެސް އަޅުގަނޑު ބުނެފައިވާނެ ފަދައިން "ލާދީނީ" މި ބަހަކީ މި ރާއްޖޭގައި ތިބި ދީނީ ގޮތުން ހައްދުފަހަނަޅާފައިވާ ބަޔަކު އުފައްދައިގެން އުޅޭ ސިޔާސީ ބަރު ހަތިޔާރެކެވެ.
އެ މީހުންގެ ފިކުރަށް ތަބާނުވާ ކޮންމެ މީހަކީ ލާދީނީ މީހެކެވެ. އެއީ އެމީހުންގެ ދީނުގައި އެކަން އޮންނަ ގޮތެވެ. ވަކިން ޚާއްސަކޮށް އެ މީހުންނަކީ އެއްވެސް ކުށެއް ނުކުރާ ސާފު ތޯހިރު ބައެއްގެ ގޮތުގައި އަޅުގަނޑުމެންގެ މައްޗަށް ފޮނުއްވާފައިވާ ބައެއް ކަމަށް ގަބޫލުކޮށްފުމަށް ދާންދެން، އަޅުގަނޑުމެންނަކީ ލާދީނީ މީހުން ކަމުގައި އެ މީހުން ދެކޭނެ އެވެ.