ރައްޔިތުންގެ މަޖިލީހަށް މެމްބަރުން ހޮވުމަށް އަންނަ އަހަރު ބާއްވާ އިންތިހާބުގައި އެމްޑީޕީން ކެންޑިޑޭޓުން ނެރޭނެ ދާއިރާތައް އަންނަ ހުކުރު ދުވަހު އިއުލާނު ކުރާނެ ކަމަށް އެ ޕާޓީން މިއަދު ބުނެފި އެވެ.
މިއަދު އާންމުކުރި ރައްޔިތުން މަޖިލީހުގެ ޕްރައިމަރީ ޓައިމްލައިނުގައި އެމްޑީޕީން ވަނީ އެކަން އިއުލާން ކޮށްފައެވެ. އެ ޓައިމްލައިނުގައި ބުނެފައިވާ ގޮތުން، އެމްޑީޕީން ވާދަކުރާ ދާއިރާތައް ހުކުރު ދުވަހު އިއުލާނު ކުރާއިރު، ޕްރައިމަރީގެ ވޯޓުލުން އޮންނާނީ ޖެނުއަރީ 18، 2019 ގަ އެވެ.
ޕްރައިމަރީގައި ބައިވެރިވުމާއި، ވޯޓު ލުމުގެ ހައްގު ލިބޭނީ އަންނަ މަހުގެ ހަތް ވަނަ ދުވަހުގެ ކުރިން މެމްބާޝިޕް ފޯމް ހުށަހަޅާ މީހުންނަށް ކަމަށް އެމްޑީޕީން ބުނެ އެވެ. އަދި ޕްރައިމަރީގައި ވާދަކުރުމުގެ ފުރުސަތު ހުޅުވާލާނީ ވެސް އެ ދުވަހު ކަމަށް އެ ޕާޓީން ބުނެ އެވެ.
އެމްޑީޕީން ބުނީ ޕްރައިމަރީގެ ވޯޓާސް ލިސްޓް ޑިސެންބަރު 13 ގައި އާންމުކޮށް، ޝަކުވާ ހުށަހެޅުމަށް ހުޅުވާލާނެ ކަމަށެވެ. އަދި ޝަކުވާ ހުށަހެޅުމުގެ ފަހު މުއްދަތުގެ ގޮތުގައި ކަނޑައަޅާފައި ވަނީ ޑިސެންބަރު މަހުގެ 16 ވަނަ ދުވަސް ކަމަށް އެ ޕާޓީން ބުނެ އެވެ.
ޝަކުވާތައް ބެލުމަށް ފަހު، ފައިނަލް ވޯޓާސް ލިސްޓް އާންމު ކުރާނީ ޑިސެންބަރު 18 ވަނަ ދުވަހު އެވެ. އަދި ޕްރައިމަރީގައި ވާދަ ކުރުމުގެ މުއްދަތު ޑިސެންބަރު 19 ވަނަ ދުވަހު ހަމަވާނެ އެވެ.
އެމްޑީޕީން ބުނީ ޕްރައިމަރީގައި ވާދަ ކުރާއިރު، އެ މީހަކު ވާދަކުރާ ދާއިރާ އަކުން އޭނާ އަށް ތާއީދު ކުރާ 200 މީހުންގެ "ތާއީދު ފޯމް" ހުށަހަޅަން ޖެހޭނެ ކަމަށެވެ.
މަޖިލިސް އިންތިހާބުގެ ޕްރައިމަރީ ޓައިމްލައިން އެމްޑީޕީން އާންމުކުރި އިރު، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ކޯލިޝަނުން އެއްކޮށް ނުކުންނަން ނިންމާފައިވީ ނަމަވެސް، ބައެއް ދާއިރާތަކުގައި ކޯލިޝަނުގެ ހަތަރު ޕާޓީއަށްވެސް އެއްކޮށް ވާދަކުރެވޭނެ ގޮތް ހެދުމަށް ވަނީ މަޝްވަރާތައް ފަށާފަ އެވެ.