ރެއާލް މެޑްރިޑްގެ އާ ކޯޗު ސަންޓިއާގޯ ސޮލާރީގެ އިރުޝާދުގެ ދަށުން ކުޅުނު ފަސް ވަނަ މެޗުން ސްޕެނިޝް ލީގުގެ ތާވަލްގެ 15 ވަނައިގައި އޮތް އެއިބާ އަތުން 3-0 އިން ރެއާލް ބަލިވެއްޖެއެވެ.
ރެއާލްގެ ކޯޗުކަމާއި ސޮލާރީ ހަވާލުވެ އެ ޓީމު ކުޅުނު ފުރަތަމަ ހަތަރު މެޗުން ފަސޭހަކަމާއެކު މޮޅުވެފައިވާއިރު މިއީ ލީގުގައި ރެއާލް އެންމެ ފަހުން ކުޅުނު ހަ މެޗުގެ ތެރެއިން ބަލިިވި ހަތަރުވަނަ މެޗެވެ.
މި މެޗުން ރެއާލް އަތުން މޮޅުވެ 18 ޕޮއިންޓާއެކު އެއިބާ ތާވަލްގެ ހަތްވަނަ އަށް ޖެހިލިއިރު ރެއާލް އަދިވެސް އޮތީ 20 ޕޮއިންޓާއެކު ހަވަނައިގައެވެ.
އެއިބާގެ ދަނޑުގައި މިރޭ ކުޅުނު މެޗުގައި ކުރީން ލީޑް ނެގީ ވެސް އެ ޓީމުންނެވެ. މެޗުގެ 16 ވަނަ މިނެޓުގައި ގޮންޒާލޯ އެސްކަލަންޓޭ މިލަނޑު ކާމިޔާބުކުރީ އެ ޓީމުގެ ކީކޭ ފޮނުވާލި ބޯޅަ ރެއާލްގެ ގޯލްކީޕަރު ތިބައުޓް ކޯޓުއާ މަތަކުރުމުން ދެވަނަ ފަހަރަށް އެ ބޯޅަ ގޯލްގެ ތެރެއަށް ފޮނުވާލައިގެންނެވެ.
މިހާފުގައި ރެއާލަށް ނަތީޖާ ހަމަހަމަކުރުމަށް ގަރެތު ބޭލް އާއި ލޫކާ މޮޑްރިޗަށް ލިބުނު ފުރުޞަތުތަކުގެ ބޭނުންހިފޭގޮތެއްނުވިއެވެ. މެޗުގެ 35 ވަނަ މިނެޓުގައި ރެއާލަށް ލިބުނު ހިލޭޖެހުމަކުން ޕެނަލްޓީއޭރިޔާބޭރުން ބޭލް ފޮނުވާލި ބޯޅަ އެއިބާގެ ގޯލްކީޕަރު އަސިއާ ރިއެސްގޯ މަތަކުރިއިރު އޭގެ މިނެޓެއްފަހުން މޮޑްރިޗް ފޮނުވާލި ހަމަލާއިގެ ހުރަހަކަށްވީ ވެސް ރިއެސްގޯ އެވެ. މިމެޗުގެ ފުރަތަމަ ހާފު ނިމުނީ 1-0 އިން އެއިބާ ކުރީގައިއޮވެގެންނެވެ.
ދެވަނަ ހާފު ފެށިގެން ހަތްވަނަ މިނެޓުގައި ރެއާލްގެ ފުލްބެކް އަލްވާރޯ އޮޑްރިއޮޒޯލާ އަށް ހެދުނު ގޯހެއްގެ ފައިދާނަގައި އެއިބާގެ ދެވަނަ ލަނޑު ސާޖީ އެންރީކް ޖަހައިދިންއިރު މެޗުގެ 57 ވަނަ މިނެޓުގައި ކިކޭ ގާސިއާ ވަނީ އެންރީކް ތަނަވަސްކުރި ފުރުޞަތަކުން މެޗުގެ ނަތީޖާ 3-0 އަށް ބަދަލުކޮށްލާފައެވެ
އޭގެފަހުން، އެއިބާގެ ލީޑް އިތުރަށް ފުޅާކުރުމަށް ފަބިއަން އޮރެޔާނާ އާއި ޗާލްސް އަށް ލިބުނު ފުރުޞަތުތަކުގައި ފޮނުވާލި ހަމަލާތައް ރެއާލްގެ ކީޕަރު ކޯޓުއާ މަތަކުރިއެވެ.
މިހާފުގައި ރެއާލްގެ ފަރާތުން މާއެދެވޭ ކުޅުމެއް ފެނިފައިނުވާއިރު އެ ޓީމުން ތަނަވަސްކުރި ގިނަ ފުރުޞަތުތަކުގައި ކަރީމް ބެންޒެމާ އޮފްސައިޑްވުމުގެ ސަބަބުން ބޭނުންހިފޭގޮތްނުވިއެވެ.
މި މުބާރާތުގައި ރޭ ކުޅުނު މެޗުގައި ލެގަނޭސް އަތުން 1-0 އިން ޑިޕޯޓިވޯ އަލަވެސް ބަލިވެ އެ ޓީމަށް ވަނީ ތާވަލްގެ އެއްވަނަ އަށް އެރުމަށް ލިބުނު ފުރުޞަތު ގެއްލިފައެވެ.
ސްޕެނިޝް ލީގުގައި މިރޭ ކުޅުމަށް ހަމަޖެހިފައިވާ މެޗުތަކުގެ ތެރެއިން އެންމެ ފާހަގަކޮށްލެވޭ މެޗުގައި ބައްދަލުކުރާނީ ބާސެލޯނާ އާ އެތުލެޓިކޯ މެޑްރިޑެވެ. އެތުލެޓިކޯގެ ދަނޑުގައި ކުޅޭ މިމެޗު ފެށުމަށް ހަމަޖެހިފައިވަނީ ރާއްޖޭގަޑިން މިރޭ 00:45 ގައެވެ.