ޒުވާން ކުދިންގެ މެދުގައި މަޝްހޫރު، ކޮރެއާގެ ބޭންޑް "ބީޓީއެސް" 23 ނޮވެމްބަރު ގައި އެ ގްރޫޕްގެ ފިލްމް "ބާރން ދަ ސްޓޭޖް: ދަ މޫވީ" އަނެއްކާވެސް ތިއޭޓަރު ސްކްރީން ތަކުން މުޅި ދުނިޔެއަށް ފެނިގެން ދާނެ ކަމަށް މަޝްހޫރު ވެބްސައިޓް ވެރައިޓީގެ ރިޕޯޓެއްގައި ވަނީ އިޢުލާން ކޮށްފައެވެ.
ޑިސްޓްރިބިއުޓަރ ތްރަފަލްގާ ރިލީޒިންގ އިން ހާމަ ކޮށްފައިވާ ގޮތުގައި، ބާރން ދަ ސްޓޭޖް: ދަ މޫވީ ގެ ދެއްކުންތައް ދުނިޔޭގެ އެކި ކަންކޮޅުތަކުގައި 1400 ސިނަމާގައި، މުޅި އެއްކޮށް 2696 ސްކްރީންތަކުން ފެނިގެން ދާނެއެވެ. މިފިލްމު އެންމެ ފުރަތަމަ ފެށިގެން ދާނީ ކުރިޔަށް އޮތް ދެދުވަހުގައި ޔުނައިޓެޑް ކިންގްޑަމްގައެވެ. އަދި އެހެން ގައުމު ތަކުގައި ކުރިޔަށް އޮތް ދެތިން ހަފްތާގައި މިފިލްމު ދައްކާނެއެވެ.
މިފިލްމު ޔުނައިޓެޑް ސްޓޭޓްސް، ޖަރުމަން، ލެޓިން އެމެރިކާ،އަދި އިންޑޮނޭޝިއާގެ އިތުރުން އެހެނިހެން އެތައް ގައުމެއްގައި ދައްކާނެއެވެ. އަދި މީގެ އިތުރުން މިފިލްމު ފުރަތަމަ ފަހަރަށް އިންޑިއާގެ ތިއޭޓަރުތަކުގައި ވެސް އަޅުވާ ގޮތަށް ވަނީ ހަމަޖެހިފައެވެ.
ބާރން ދަ ސްޓޭޖް: ދަ މޫވީ މިމަހުގެ ކުރީކޮޅުގައި ޙާއްސަ ވަކި މުއްދަތަކަށް ދެއްކިގެން ދިޔައިރު، މިފިލްމުން ވަނީ އެންމެ ގިނަ މީހުން އެއެއްޗެއް ބަލަން ދިޔަ "އިވެންޓް-ސިނަމާ ޕްރޮޑަކްޝަން" ގެ މަގާމު ހޯދައި، "ވަން ޑިރެކްޝަން: ވެއަރ ވީ އަރ" ގެ ރެކޯޑު މުގުރާ އާރެކޯޑެއް ހަދާފައެވެ.
2014 ގައި ވަން ޑިރެކްޝަންގެ ކޮންސަރޓް ފިލްމުން 1.2 މިލިއަން އެޑްމިޝަން ހޯދާފައިވާއިރު، ބީޓީއެސްގެ ފިލްމުންވަނީ ދުނިޔޭގެ އެކި ކަންކޮޅުތަކުން 1.4 މިލިއަން އެޑްމިޝަން ހޯދާފައެވެ.ވެރައިޓީ ވެބްސައިޓުގައި ލަފާކުރާގޮތުގައި، ބީޓީއެސްގެ ބާރން ދަ ސްޓޭޖް: ދަ މޫވީގެ އަލުން އަޅުވާ ނިމިގެން ދާއިރު، މިފިލްމަށް ބޮކްސް އޮފިސްގައި ދަމަހައްޓާލެވޭ އިވެންޓް-ސިނަމަރ މޫވީ ރެކޯޑެއް ހެދޭނެއެވެ.
ފުރަތަމަ ދައްކާލުމުގައި 14 މިލިއަން ޑޮލަރާއި އެކު ރެކޯޑު ހަދާފައިވާ މިފިލްމުން، ދެވަނަ ސްކްރީނިންއަށްފަހު މިރެކޯޑު އަނެއްކާވެސް މުގުރާލެވޭނެ ކަމަށް ލަފާކުރެވެއެވެ.
ބާރން ދަ ސްޓޭޖް: ދަ މޫވީ އިން ބެލުންތެރިންނަށް ބީޓީއެސް 2017ވަނަ އަހަރު ކުރިޔަށް ގެންދިޔަ "ވިންގްސް" ވޯލްޑް ޓުއަރގައި، ސްޓޭޖް މަތިންނާއި ސްޓޭޖު ފަހަތުން ވެގެންދިޔަ ކަންތައްތައް ފެނިގެން ދާނެއެވެ.