އައިޖީއެމްއެޗްގައި ވޭޖް އެމްޕްލޯއިމަންޓް އުސޫލުން މަސައްކަތްކުރާނެ ވިހި ރެޖިސްޓާޑް ނަރުހުން ހޯދަން އިއުލާނުކޮށްފި އެވެ.
އައިޖީއެމްއެޗުން މިއަދު ކުރި އިއުލާނުގައި ބުނީ، ވޭޖް އެމްޕްލޯއިމަންޓް އުސޫލުން މަސައްކަތް ކުރައްވާ ފަރާތްތަކުން މަސައްކަތް ކުރަން ޖެހޭނީ ދުވާލަކު 8 ގަޑިިއިރު ހަފްތާއަކު 5 ދުވަހު ކަމަށެވެ. އަދި އެފަރާތްތަކުގެ މުސާރަ ކަނޑައެޅޭނީ މަސައްކަތްކުރާ ގަޑިއަށް ބެލުމަށްފަހު ކަމަށް ވެސް ބުނެފައިވެއެވެ.
މީގެ އިތުރުން އެ ވަޒީފާއަށް ކުރިމަތިލާ ފަރާތްތަކަކީ މޯލްޑިވްސް ނާސިން އެންޑް މިޑްވައިފްރީ ކައުންސިލް ގަބޫލްކުރާ ނާސިން ދާއިރާއިން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 5 ނުވަތަ 6 ގެ ސަނަދެއް ހާސިލު ކޮށްފައިވާ ފަރާތްތަކަށް ވާންޖެހޭ ކަމަށް ވެސް އެ އިއުލާނުގައި ބުނެފައިވެއެވެ.
އެމަގާމަށް ކުރިމަތިލާން ބޭނުންވާ ފަރާތްތަކުން ހުށަހަޅަން ޖެހޭ ހުރިހާ ލިޔެ ކިޔުމެއް އަންނަ މަހުގެ ދެވަނަ ދުވަހުގެ 13:00 ގެ ކުރިން އައިޖީއެމްއެޗުގެ 11 ވަނަ ފަންގިފިލާގެ، ހިއުމަން ރިސޯސަސް ޑިޕާޓްމަންޓަށް ހުށަހަޅަން ޖެހޭނެ ކަމަށް ވެސް އިއުލާނުގައި ބުނެ އެވެ.