މިހާރު މާލޭގެ ކުޅިވަރު އެކުވެނީގައި ކުރިޔަށްދާ 11 ވަނަ އެޓޯލް ލީގް ބެޑްމިންޓަން މުބާރާތުގެ ސެމީ ފައިނަލަށް އައްޑޫ ސިޓީ ބެޑްމިންޓަން ފިރިހެން ޓީމް ދަތުރު ކޮށްފިއެވެ.
އައްޑޫ ސިޓީ ބެޑްމިންޓަން ޓީމް ސެމީއަށް ދަތުރު ކޮށްފައިވަނީ ވަނީ ގްރޫޕް ސްޓޭޖްގައި ކުޅެވުނު 3 މެޗް ވެސް ކާމިޔާބުކުރުމަށް ފަހުގައެވެ.
އައްޑޫ ސިޓީ ބެޑްމިންޓަން ފިރިހެން ޓީމްގައި 8 ކުޅުންތެރިން ހިމެނެއެވެ. އެއީ، ނާތިޖް ޢަލީ، އިބްރާހީމް ނަޝީދު، އިބްރާހީމް މުހައްމަދު، މުހައްމަދު ފަޒީލް، އަހުމަދު މުނީޒް، އައްފާން ޚާލިދު، މުހައްމަދު އިނާން އަދި އަހުމަދު ފަވާޒް އެވެ. ޓީމްގެ ކޯޗަކީ މަޝްހޫރު ބެޑްމިންޓަން ކުޅުންތެރިޔާ ހުސައިން ރިޔާޒް(ބަބާ) އެވެ. އަދި ޓީމްގެ މެނޭޖަރަކީ މޫސާ ފަތުހީއެވެ.
މި މުބާރާތުގައި ކުޅެވުނު ގްރޫޕް ސްޓޭޖް މެޗްތަކުގައި އައްޑޫ ސިޓީ ވަނީ މޮޅު ކުޅުމެއް ދައްކާލާފައެވެ. އެގޮތުން ތޮއްޑޫ އަދި ވާވު އަތޮޅުގެ ބްލޫ ސްޓާރ ޓީމާއި ވާދަ ކުރި ދެ މެޗްވެސް ސީދާ 5 ޓައި ހޯދައިގެން އައްޑޫ ސިޓީ ޓީމް ވަނީ ކާމިޔާބު ކޮށްފައެވެ. މީގެ އިތުރުން ހޮޅުދޫ ޓީމާއި ބައްދަލުކޮށް 3-2 ޓައި ގެ ނަތީޖާއަކުން ވަނީ އެ މެޗްވެސް ކާމިޔާބު ކޮށްފައެވެ.
މިރޭ 8:00ގައި ފެށުމަށް ހަމަޖެހިފައިވާ ސެމީ ފައިނަލް މެޗްގައި އައްޑޫ ސިޓީ ޓީމާއި ވާދަ ކުރާނީ ހދ. އަތޮޅު ބެޑްމިން ޓީމެވެ.