ކުރީގެ ރައީސް އަބްދުﷲ ޔާމީނާއި ވަރަށް ގާތް ގުޅުމެއް އޮންނަ، މުހައްމަދު ޖުނެއިދު މިއަދު ވެރިކަން ކުރާ ޕާޓީ، އެމްޑީޕީއާ ގުޅިވަޑައިގަތީ އެއްވެސް މަގާމެއް ބޭނުންވެގެން ނޫން ކަމަށް އޭނާ ވިދާޅުވެއްޖެއެވެ.
އެމްޑީޕީއަށް ސޮއި ކުރެއްވުމަށްފަހު ޖުނެއިދު ވަނީ، އޭނާ ހުންނެވި ކޮމިޝަނަރ ޖެނެރަލް އޮފް ކަސްޓަމްސްގެ މަގާމުން އިސްތިއުފާ ދެއްވާފައެވެ. އިސްތިއުފާ ދެއްވަމުން ޖުނެއިދު ވިދާޅުވީ އެމްޑީޕީއަށް ސޮއިކުރެއްވީ މަގާމެއް ހޯދުމަށް ނުވަތަ ހުރި މަގާމު ޔަގީން ކުރުމަށް ނޫން ކަމަށެވެ.
ނަމަވެސް ކުރިއަށް އޮތް ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޕްރައިމަރީގައި އައްޑޫ މީދޫ ދާއިރާއަށް ވާދަކުރައްވަން އިމާދު ސޯލިހް ނިންމަވާފައިވާތީ އޭނާއަށް ތާއީދު ހޯދަން ބޭނުންވާ ކަމަށް ޖުނެއިދު ވިދާޅުވިއެވެ. އެކަން ކުރުމަށް އާއިލާ މެމްބަރުން ވެސް އެމްޑީޕީއާ ގުޅޭނެ ކަމަށް ޖުނެއިދު ވިދާޅުވިއެވެ.
ނިމިގެން ދިޔަ ސަރުކާރުގައި އެމްޕީއެލް އަދި ކަސްޓަމްސްގެ އިސް މަގާމުތަކުން އެކި ފަހަރު މަތިން ފެނިވަޑައިގަތް ޖުނެއިދު ވަނީ އާއިލާއަށް ވަގުތު ނުދެވޭ ކަމަށް ވިދާޅުވެ ސިޔާސީ މަގާމުތަކުން އިސްތިއުފާ ދެއްވާފައެވެ. ނަމަވެސް ދުވަސްކޮޅެއް ފަހުން ކަސްޓަމްސްގެ ވެރިޔާގެ މަގާމު ޖުނެއިދަށް ވަނީ އަރުވާފައެވެ.