ޔުއެފާ ޗެމްޕިއަންސް ލީގުގައި ރޭ ކުޅުނު މެޗުތަކުން މޮޅުވެ އިޓަލީގެ ޔުވެންޓަސް އާއި ސްޕެއިނުގެ ރެއާލް މެޑްރިޑްގެ އިތުރުން އިނގިރޭސި ކްލަބު މެންޗެސްޓާ ޔުނައިޓެޑް ވެސް މި މުބާރާތުގެ ދެވަނަ ބުރުން ޖާގަ ހޯދައިފިއެވެ.
މި މުބާރާތުގައި ރޭ ކުޅުނު މެޗުގައި އަމިއްލަ ދަނޑުގައި ސްޕެއިނުގެ ވެލެންސިއާ އަތުން 1-0 އިން ޔުވެންޓަސް މޮޅުވިއިރު ރެއާލް ވަނީ ރަށުން ބޭރުގައި 2-0 އިން އިޓަލީގެ އޭއެސް ރޯމާ ބަލިކޮށްފައެވެ. ޔުނައިޓެޑް ވަނީ ސްވިޒަލެންޑްގެ ޔަންގް ބޯއީސް އަތުން 1-0 އިން މޮޅުވެފައެވެ.
ޔުވެންޓަސްގެ އެލިއާންޒް ސްޓޭޑިއަމްގައި ކުޅުނު މެޗުގެ ފުރަތަމަ ހާފުގައި ދެ ޓީމަށްވެސް ގޯލެއް ކާމިޔާބުކުރެވިފައެއްނުވެއެވެ. މިހާފުގައި ޔުވެންޓަސް އަށް ލިބުނު އެންމެ ރަނގަޅު ފުރުޞަތުގައި މެޗުގެ ކުރީކޮޅު އެ ޓީމުގެ ކްރިސްޓިއާނޯ ރޮނާލްޑޯ ފޮނުވާލި ހަމަލާ ވެލެންސިއާގެ ގޯލްކީޕަރު ނޯބާޓޯ ނެޓޯ ވަނީ މަތަކޮށްފައެވެ.
އޭގެފަހުން، ފުރަތަމަ ހާފުގެ އިތުރުވަގުތުގައި ވެލެންސިއާގެ ޑިފެންޑަރު މޫކްތަރު ޑިއަކާބީ އަށް ވަނީ ލަނޑުޖަހާނެ ރަނގަޅު ފުރުޞަތެއްލިބި ބޭކާރުވެފައެވެ. އެ ޓީމުގެ ޑެނިއަލް ޕަރޭހޯ ނަގައިދިން ހުރަހަކުން ގޯލްކުރިމަތީގައި ހުރެ ޑިއަކާބީ ބޮލުން ފޮނުވާލި ބޯޅަ ޔުވެންޓަސްގެ ގޯލްކީޕަރު ވޮޝިއެކް ޝެޒްނީ މަތަކުރިއެވެ. މިހާފު ނިމުނީ ލަނޑެއްނުޖެހި ދެ ޓީމު އެއްވަރުވެގެންނެވެ.
މި މެޗުގައި ޔުވެންޓަސް އިން ކާމިޔާބުކުރި ހަމައެކަނި ލަނޑު، 59 ވަނަ މިނެޓުގައި ޖަހައިދިނީ ކްރޮއޭޝިއާގެ ފޯވާޑް މާރިއޯ މަންޒުކިޗް އެވެ. މިއީ ރޮނާލްޑޯ ދިން ބޯޅައަކުން އޭނާ ކާމިޔާބުކުރި ގޯލެކެވެ.
ޔުވެންޓަސްގެ ލީޑް ފުޅާކުރުމަށް ރޮނާލްޑޯ އާއި މަންޒުކިޗްގެ އިތުރުން ޕައޮލޯ ޑިބާލާ އަށް ވަނީ ރަނގަޅު ފުރުޞަތުތަކެއްލިބި ބޭނުންހިފޭގޮތްނުވެފައެވެ. މި މެޗުގައި ޔުވެންޓަސްގެ ކުޅުންތެރިން ފޮނުވާލި ގިނަ ހަމަލާތައް ހުއްޓުވުމުގައި މުހިއްމު ދައުރެއް އަދާކުރީ ވެލެންސިއާގެ ކީޕަރު ނެޓޯ އެވެ.
މި މުބާރާތުގެ މިދިޔަ ތިން އަހަރުގެ ޗެމްޕިއަން ރެއާލް ކުޅުނު މެޗުން 2-0 އިން ރޯމާ އަތުން މޮޅުވިއިރު އެ ޓީމުގެ ލަނޑުތައް ޖަހައިދިނީ ގަރެތު ބޭލް އާއި ލޫކަސް ވަޒްކޭޒް އެވެ.
މި މެޗުން މޮޅުވެ އެ ޓީމު ވަނީ 12 ޕޮއިންޓް ހަމަކޮށް ބާކީ އެއް މެޗު އޮއްވާ ގްރޫޕް ޖީގެ އެއްވަނަ ޔަގީންކޮށްފައެވެ. ދެވަނައިގައި އޮތީ 9 ޕޮއިންޓާއެކު ރޯމާ އެވެ. މި ގްރޫޕުގައި ދެން ހިމެނޭ ދެ ޓީމުކަމަށްވާ ސީއެސްކޭއޭ މޮސްކޯ އާއި ވިކްޓޯރިއާ ޕްލެޒެން އަށް ހަތަރު ޕޮއިންޓް ލިބިފައިވާއިރު މި ދެޓީމު ރޭ ބައްދަލުކުރި މެޗު 2-1 އިން ކާމިޔާބުކުރި ޕްލެޒެން އެވެ.
އޯލްޑް ޓްރެފޯޑްގައި ރޭ ޔަންގް ބޯއީސް އާ ދެކޮޅަށް ޔުނައިޓެޑް ކުޅުނު މެޗުގައި އެ ޓީމުގެ ފަރާތުން މާ އެދެވޭ ކުޅުމެއް ފެނިގެންގޮސްފައިނުވާއިރު އެ ޓީމުން ކާމިޔާބުކުރި ހަމައެކަނި ގޯލް މެޗުގެ އިތުރު ވަގުތުގައި ޖަހައިދިނީ ބެލްޖިއަމްގެ މިޑްފީލްޑަރު މަރުއާން ފެލައީނީ އެވެ.
ރޭ ކުޅުނު މެޗުތަކަށްފަހު، ގްރޫޕް އެޗްގައި ހިމެނޭ ޔުވެންޓަސް އަށް 12 ޕޮއިންޓް ލިބިފައިވާއިރު ދެވަނައިގައި އޮތީ 10 ޕޮއިންޓާއެކު ޔުނައިޓެޑެވެ. ތިންވަނައިގައި އޮތް ވެލެންސިއާ އަށް 5 ޕޮއިންޓް ލިބިފައިވާއިރު އެންމެ ފުލުގައި އޮތީ އެއް ޕޮއިންޓާއެކު ޔަންގް ބޯއީސް އެވެ.