ސައުތު އެފްރިކަން އެއާލައިންސް (އެސްއޭއޭ)ގެ ޑައިރެކްޓް ފްލައިޓެއް މިއަދު އައްޑޫ ސިޓީ ގަން އިންޓަނޭޝަނަލް އެއާޕޯޓްގައި ޖައްސައިފިއެވެ.
މިއަދު ގަމުގައި ޖެއްސި އެސްއޭއޭގެ ފްލައިޓަކީ ޗާޓަރު ފްލައިޓެކެވެ. މި ފްލައިޓުން 300 ފަސިންޖަރުން ގަމަށް މިއަދު ފޭބިއެވެ. މި ފްލައިޓް ގަމުގައި ޖެއްސިއިރު ޓްރާންސްޕޯޓް މިނިސްޓަރު އާމިނަތު ނަހުލާ، ރައްޔިތުންގެ މަޖިލީހުގެ ރައީސް ޤާސިމް އިބްރާހީމް އަދި ގަން އިންޓަނޭޝަނަލް އެއާޕޯޓްގެ ހިއްސާ އޮންނަ ކާސާ ހޯލްޑިން ކުންފުނީގެ ހިއްސާދާރެއް ކަމަށްވާ ޗަމްޕާ ޙުސައިން އަފީފްވެސް އެ ފްލައިޓަށް މަރުޙަބާ ދެންނެވުމަށް އެއާޕޯޓަށް ވަޑައިގެންނެވިއެވެ. ކާސާ ހޯލްޑިން ކުންފުންޏަކީ ގަން އިންޓަނޭޝަނަލް އެއާޕޯޓްގެ 30 އިންސައްތަ ހިއްސާ އޮންނަ ކުންފުންޏެކެވެ.
އެސްއޭއޭގެ ފްލައިޓްތަކުގެ ދަތުރު ފެށުމުން މެދުއިރުމަތިން ރާއްޖެއަށް ކުރަމުން އަންނަ ދަތުރުތައް 16 ގަޑިއިރުން 7 ގަޑިއިރަށް ދަތުރުގެ ވަގުތު ކުރު ވެގެންދާނެއެވެ. ޖޮހަނަސްބާގްއިން ސީދާ ރާއްޖެއަށް އައުމަށް ފަތުރުވެރިންނަށް މަގުފަހިވެގެންދާނެއެވެ.
ފާއިތުވި އަހަރު ސައުތު އެފްރިކާއިން 9000 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. ދަތުރުތަކަށް ލިބޭ މިފަދަ ފަސޭހަތަކުގެ ސަބަބުން ކުރިޔަށްއޮތް ތަނުގައި ރާއްޖެއަށް އެ ގައުމުން ދަތުރުކުރާ ފަތުރުވެރިން ގިނަވެގެންދާނެ ކަމަށް ބެލެވެއެވެ.