ފުވައްމުލަކަށް ވައިގެ މަގުން މަސްތުވާތަކެތި އެތެެރެކުރަން އުޅުނު މީހަކު މަސްތުވާތަކެއްޗާއެކު ހައްޔަރުކޮށްފިއެވެ.
މި މީހާ ހައްޔަރުކޮށްފައިވަނީ މަސްތުވާތަކެއްޗާއި ދެކޮޅަށް ފުލުހުން ކުރަމުންދާ މަސައްކަތްތަކުގެ ތެރެއިން ޏ.ފުވައްމުލަކު ޕޮލިސް ސްޓޭޝަނުން ހިންގި އޮޕަރޭޝަނެއްގައެވެ.
ވައިގެ މަގުން ފުވައްމުލަކު ސިޓީއަށް މަސްތުވާތަކެތި އެތެރެކޮށްދޭން އުޅޭކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން ފުވައްމުލަކު ޕޮލިސް ސްޓޭޝަނުން ހިންގި މިއޮޕަރޭޝަނެއްގައި ހައްޔަރުކޮށްފައިވަނީ 43 އަހަރުގެ ދިވެހި ފިރިހެނެއް ކަމަށް ފުލުހުން މައުލޫމާތު ދެއެވެ.
އެ މީހާ ފުލުހުންގެ ބެލުމުގެ ދަށަށް ގެންގޮސްފައިވަނީ ނޮވެމްބަރ 30ވަނަ ދުވަހުގެރޭ 21:35 ހާއިރު ފުވައްމުލަކު އެއަރޕޯރޓުންނެވެ. ފުލުހުންގެ ބެލުމުގެ ދަށަސް ގެނެސް ހަށިގަނޑު ބަލައިފާސްކުރިއިރު، ފުރަގަސްފަރާތުގައި ފޮރުވާފައި ހުރިކަން ފާހަގަކުރެވިގެން، ފުވައްމުލަކު ހޮސްޕިޓަލަށް ގެންގޮސް ބެލިބެލުމުން، މަސްތުވާތަކެތި ކަމަށް ޝައްކުރެވޭ އެއްޗެއް ހުރި ރަބަރު ކޮތަޅަކާއި މަސްތުވާ ތަކެތި ކަމަށް ޝައްކުރެވޭ އެއްޗެއް އަޅާފައިވާ ދެ ރަބަރު ޕެކެޓު ފެނިފައިވާ ކަމަށް ޕޮލިހުން މައުލޫމާތު ދެއެވެ.
ފުލުހުން، އެ މީހާގެ ބަންދާއި މެދު ގޮތެއް ނިންމުމަށް ޏ. ފުވައްމުލަކު މެޖިސްޓްރޭޓް ކޯޓަށް ހާޒިރުކުރުމުން، މިނިސްޓްރީ އޮފް ހޯމް އެފެއާރޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 15 ދުވަހުގެ މުއްދަތެއްދީފައިވާ ކަމަށް މައުލޫމާތު ލިބެއެވެ.
މި މައްސަލަ ފުވައްމުލަކު ޕޮލިސް ސްޓޭޝަނުން ދަނީ ތަޙުޤީޤު ކުރަމުންނެވެ.