ސްޕެނިޝް ލަލީގާގައި ރޭ އަމިއްލަ ދަނޑުގައި ކުޅުނު މެޗުގައި 2-0 އިން ވިޔާރެއާލް ބަލިކޮށް ބާސެލޯނާ އަލުން ލީގު ތާވަލްގެ އެއްވަނަ އަށް ޖެހިލައިފިއެވެ.
ބާސެލޯނާ އަށް އަލުން އެއްވަނަ ލިބުނީ، ކުރިން އެއްވަނައިގައި އޮތް ސެވިއްޔާ ރޭ ކުޅުނު މެޗުގައި ރަށުން ބޭރުގައި 1-1 އިން ޑިޕޯޓިވޯ އަލަވެސް އާ އެއްވަރުވުމުންނެވެ.
ރޭގެ މެޗުން މޮޅުވެ ބާސެލޯނާ އަށް ވަނީ މިހާތަނަށް ކުޅުނު 14 މެޗުން 28 ޕޮއިންޓް ލިބިފައެވެ. އެއް ޕޮއިންޓް ފަހަތުން ސެވިއްޔާ ދެވަނައިގައި އޮތްއިރު، 25 ޕޮއިންޓާއެކު އެތުލެޓިކޯ މެޑްރިޑް އޮތީ ތިންވަނައިގައެވެ. ހަތަރުވަނައިގައި އޮތީ އަލަވެސް އެވެ. އެ ޓީމަށް ލިބިފައިވަނީ 24 ޕޮއިންޓެވެ. ރެއާލް މެޑްރިޑް އޮތީ 23 ޕޮއިންޓާއެކު ފަސްވަނައިގައެވެ.
ބާސެލޯނާގެ ކޭމްޕް ނޯގައި ކުޅުނު މި މެޗުގެ ކުރީކޮޅު އެ ޓީމަށް ލީޑް ނަގައިދިނުމަށް ކެޕްޓަން ލިއޮނަލް މެސީ އަށް ލިބުނު ފުރުޞަތުގެ ބޭނުންހިފޭގޮތެއްނުވިއެވެ. މެޗުގެ 8 ވަނަ މިނެޓުގައި ޕެނަލްޓީއޭރިޔާބޭރުން މެސީ ފޮނުވާލި ބޯޅަ ވިޔާރެއާލްގެ ގޯލްކީޕަރު ސާޖިއޯ އަސެނިއޯ ވަނީ މަތަކޮށްފައެވެ.
އޭގެފަހުން، ވިޔާރެއާލްގެ މާރިއޯ ގަސްޕާ އާއި ސެމުއެލް ޗުކްވުއެޒޭ ފުލުފުލުގައި ފޮނުވާލި ދެ ހަމަލާވެސް ބާސެލޯނާގެ ގޯލްކީޕަރު މާކް އަންދްރޭ ޓަ ސްޓެގަން މަތަކުރިއިރު ބާސެލޯނާގެ އޮސްމާނޭ ޑެމްބެލޭ އާއި މެސީ ފޮނުވާލި ހަމަލާތަކުގެ ހުރަހަކަށްވީ ވެސް ވިޔާރެއާލްގެ ކީޕަރު އަސެނިއޯ އެވެ.
މި މެޗުގައި ބާސެލޯނާ އިން ކާމިޔާބުކުރި ފުރަތަމަ ގޯލް، މެޗުގެ 36 ވަނަ މިނެޓުގައި ޖަހައިދިނީ ޖެރަޑް ޕީކޭ އެވެ. މިއީ އެ ޓީމުގެ ފްރާންސް ވިންގާ ޑެމްބެލޭ ތަނަވަސްކުރި ފުރުޞަތަކުން ލިބުނު ބޯޅައެއް ޕީކޭ ބޮލުން ފޮނުވާލައިގެން ކާމިޔާބުކުރި ގޯލެކެވެ.
ފުރަތަމަ ހާފު ނިމުމުގެކުރީން، ބާސެލޯނާގެ ލީޑް ފުޅާކުރުމަށް މެސީ އަށް ލިބުނު ފުރުޞަތުގައި އޭނާ ފޮނުވާލި ބޯޅަ ވިޔާރެއާލްގެ ކީޕަރު އަސެނިއޯ މަތަކުރިއެވެ. މި ހާފު ނިމުނީ 1-0 އިން ބާސެލޯނާ ކުރީގައިއޮވެގެންނެވެ.
މި މެޗުގެ ދެވަނަ ހާފުގައި ދެ ޓީމުގެ ފަރާތުން މާ ރަނގަޅު ހަމަލާތަކެއް ފެނިގެންގޮސްފައިނުވާއިރު މެޗުގެ ފުރިހަމަ ވަގުތު ހަމަވާން ތިން މިނެޓަށްވެފައިވަނިކޮށް، ބާސެލޯނާ އަށް ލިބުނު އެންމެ ރަނގަޅު ފުރުޞަތުގައި އެ ޓީމަށް ތިން ޕޮއިންޓް ކަށަވަރުކޮށްދިނީ ޒުވާން ކުޅުންތެރިޔާ ކާލްސް އަލޭނާ އެވެ. މިއީ މެސީ ދިން ރީތި ޕާހަކުން އޭނާ ކާމިޔާބުކުރި ގޯލެކެވެ.
ލީގުގައި ރޭ އަލަވެސް އާ ދެކޮޅަށް ރަށުން ބޭރުގައި ސެވިއްޔާ ކުޅުނު މެޗު 1-1 އިން އެއްވަރުވިއިރު އެ ޓީމަށް ލަނޑުޖަހައިދިނީ ވިސާމް ބެން ޔެޑާ އެވެ. މި މެޗުގައި އަލަވެސް އިން ޖެހި ގޯލް ކާމިޔާބުކޮށްދިނީ ޖޯނީ އެވެ.
މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ރެއާލް ސޮސިއެޑާޑް އަތުން 1-0 އިން ރެއާލް ބެޓިސް މޮޅުވިއިރު ރަށުން ބޭރުގައި އެތުލެޓިކޯ ވަނީ ޖިރޯނާ އާ 1-1 އިން އެއްވަރުވެފައެވެ.