ރައްޔިތުންގެ މަޖިލީހުގެ މެމްބަރުންނަށް ސިފައިން ހުރަސް އަޅައި މަޖްލިސް ހުއްޓުވި މައްސަލާގައި ކުރީގެ ޑިފެންސް މިނިސްޓަރ އާދަމް ޝަރީފު އުމަރު، ރައްޔިތުންގެ މަޖިލީހުގެ އިމްތިޔާޒު ކޮމެޓީއަށް ހާޒިރު ކުރުމަށްފަހު ލިޔެކިއުން ނުލިބިގެން ސުވާލު ނުކުރެވި ބައްދަލުވުން ކެންސަލްކޮށްފިއެވެ.
މީޑިއާއަށް ސިއްރުކޮށް ރޭ ބާއްވަން އޮތް ކޮމެޓީ ބައްދަލުވުމަށް އާދަމް ޝަރީފު އުމަރު ހާޒިރުވެވަޑައިގެންނެވިއެވެ. ނަމަވެސް ކޮމެޓީ ބައްދަލުވުން ފަށަން ހަމަޖައްސާފައިވާ ވަގުތު ޖެހުނު އިރުވެސް އެކަމާއި ގުޅުން ހުރި ލިޔެކިއުންތައް ކޮމެޓީއަށް ނުލިބެއެވެ.
މަޖްލިސްގެ އިމްތިޔާޒު ކޮމެޓީއަށް އާދަމް ޝަރީފު ހާޒިރު ކުރަނީ 2017 ޖުލައި 24 ވަނަ ދުވަހު ރައްޔިތުންގެ މަޖިލީހުގެ އޭރުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލައިގެ އަޑުއެހުމެއް ބޭއްވުމަށް އޭރުގެ އިދިކޮޅު މެމްބަރުން މަޖްލިސް ކުރާގެއަށް ވަޑައިގަތުމުން މަޖްލިސްއަށް ވެދެވިޔަ ނުދީ ހުރަސް އެޅި މައްސަލާގައެވެ.
މި މައްސަލާއި ގުޅިގެން އާދަމް ޝަރީފުގެ އިތުރުން ކުރީގެ ހޯމް މިނިސްޓަރ އަޒްލީން އަހުމަދު އާއި ކުރީގެ ޗީފް އޮފް ޑިފެންސް ފޯސް މޭޖާ ޖެނެރަލް އަހުމަދު ޝިޔާމު ހާޒިރު ކުރުމަށް ވަނީ ނިންމާފައެވެ.
އާދަމް ޝަރީފު އުމަރު ވިދާޅުވީ އޭނާ މިހާތަނަށް ގާނޫނާއި ހިލާފު އެއްވެސް އަމަލެއް ހިންގާފައި ނުވާނެކަމަށެވެ.