އިޓާލިއަން ސެރިއޭގައި ރޭ ކުޅުނު މެޗުގައި ރަށުންބޭރުގައި އެޓަލާންޓާ އަތުން 2-1 އިން މޮޅުވެ ލީގުގެ އެއްވަނައިގައި އުޅޭ ޔުވެންޓަސް އާ ދެމެދު އޮތް ލީޑު ނަޕޯލީ އިން ކުޑަކޮށްފިއެވެ.
އެއްވަނައިގައި އޮތް ޔުވެންޓަސް ވަނީ ހޮނިހިރު ދުވަހުގެރޭ ފިއޮރެންޓީނާ އަތުން މޮޅުވެ 11 ޕޮއިންޓުގެ ލީޑެއް ނަގައިފައެވެ. އެ ޓީމަށް 40 ޕޮއިންޓް ލިބިފައިވާއިރު ދެވަނައިގައި ނަޕޯލީ މިހާރު އޮތީ 32 ޕޮއިންޓާއެކު އެވެ. ތިންވަނައިގައި 29 ޕޮއިންޓާ އެކު އިންޓަ މިލާން އޮތްއިރު އޭގެ ހަތަރު ޕޮއިންޓް ފަހަތުން ވާދަވެރި އޭސީ މިލާން އޮތީ ހަތަރުވަނައިގައެވެ. ނަޕޯލީ އަތުން ބަލިވި އެޓަލާންޓާ އުޅެނީ 18 ޕޮއިންޓާއެކު ލީގުގެ 11 ވަނައިގައެވެ.
އެޓަލާންޓާގެ ދަނޑުގައި ރޭ ކުޅުނު މި މެޗުގައި ގިނަވަގުތު ބޯޅަ ގެންގުޅެ ލަނޑުޖަހާނެ ގިނަ ފުރުޞަތުތައް އެ ޓީމުން ތަނަވަސްކުރި ނަމަވެސް ގޯލަށް އަމާޒުކޮށް ގިނަ ހަމަލާތައް ފޮނުވާލައިފައިވަނީ ނަޕޯލީ އިންނެވެ. އެގޮތުން، މި މެޗުގައި ކުރީން ލީޑްނެގީވެސް އެ ޓީމުންނެވެ. މެޗު ފެށިގެން ދެވަނަ މިނެޓުގައި ނަޕޯލީ އަށް މިލަނޑުޖަހައިދިނީ ފަބިއެން ރުއިޒް އެވެ. މިއީ އެ ޓީމުގެ ލޮރެންޒޯ އިންސީނިއޭ ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ. މިހާފުގައި ދެ ޓީމަށް އިތުރު ގޯލެއް ކާމިޔާބުނުކުރެވި ނިމުނީ 1-0 އިން ނަޕޯލީ ކުރީގައިއޮވެގެންނެވެ.
ދެވަނަ ހާފުގެ ކުޅުން ފެށިތާ ކުޑަވަގުތުކޮޅެއްގެ ތެރޭގައި، އެޓަލާންޓާ އަށް ނަތީޖާ ހަމަހަމަކޮށްދިނީ ޑުވާން ޒަޕާޓާ އެވެ. އޭގެފަހުން، ނަޕޯލީ އަށް އަލުން ލީޑް ނަގައިދިނުމަށް އެ ޓީމުގެ އިންސީނިއޭ އަށް ވަނީ ރަނގަޅު ދެ ފުރުޞަތުލިބި ބޭކާރުވެފައެވެ. އެގޮތުން، މެޗުގެ 67 ވަނަ މިނެޓުގައި ވަރަށް ހަނި އޭންގަލަކުން އޭނާ ފޮނުވާލި ބޯޅަ އެޓަލާންޓާގެ ގޯލްކީޕަރު އެރިޓް ބެރީޝާ މަތަކުރިއިރު އޭގެ ދެ މިނެޓުފަހުން ޕެނަލްޓީއޭރިޔާބޭރުން އިންސީނިއޭ ފޮނުވާލި ހަމަލާގެ ހުރަހަކަށްވީވެސް ބެރީޝާ އެވެ.
މެޗު ނިމެން ފަސް މިނެޓަށްވެފައިވަނިކޮށް، ނަޕޯލީ މޮޅުވި ލަނޑު ޖަހައިދިނީ ބަދަލުކުޅުންތެރިއެއްގެ ގޮތުގައި ކުޅެން ނިކުތް ޕޮލެންޑްގެ ފޯވާޑް އާކަޑިއުޝް މިލިކް އެވެ. މިއީ އެ ޓީމުގެ މާރިއޯ ރުއީ ދިން ބޯޅައަކުން ވަރަށް ރީއްޗަށް ކޮންޓްރޯލް ކޮށްލުމަށްފަހު އެއްފަހަރުން ގޯލްގެތެރެއަށް ފޮނުވާލައިގެން އޭނާ ކާމިޔާބުކުރި ރީތި ގޯލެކެވެ. މިއީ ލީގުގައި މިލިކް ކާމިޔާބުކުރި ފަސްވަނަ ގޯލެވެ.
އޭގެފަހުން، ނަޕޯލީގެ ލީޑް ފުޅާކުރުމަށް އިންސީނިއޭ އަށް ލިބުނު ބޯޅަ އޭނާ ފޮނުވާލުމުން އެޓަލާންޓާގެ ކީޕަރު ބެރީޝާ މަތަކުރިއެވެ.
މެޗަށްފަހު ވާހަކަ ދައްކަމުން ނަޕޯލީގެ ކޯޗު ކާލޯ އަންޗެލޯޓީ ބުނީ އެޓަލާންޓާގެ ދަނޑުގައި ކުޅުމަކީ ފަސޭހަކަމެއް ނޫންނަމަވެސް ކުޅުންތެރިންގެ ފަރާތުން ރަނގަޅު ޖަވާބެއް ދީފިކަމަށާއި އަބަދަކު މޮޅު ކުޅުން ނުދެއްކޭނެކަމަށެވެ. މީގެއިތުރުން، އަންޗެލޯޓީ ވަނީ އެ ޓީމު މޮޅުވި ލަނޑުޖަހައިދިން މިލިކް އަށް ތައުރީފްކޮށް ވާހަކަ ދައްކާފައެވެ.
"ގަވާއިދުން ކުޅުމުގެ ފުރުޞަތު ނުލިބޭތީވެ، އޭނާ ހޭދަކުރަމުން އެދަނީ ވަރަށް އުނދަގޫ ދުވަސްތަކެއް. އޭނާ އަށް ބޭނުންވޭ މި ކަހަލަ ދުވަހެއް." އަންޗެލޯޓީ ބުންޏެވެ.
އިޓާލިއަން ލީގުގައި ދެން ކުޅޭ މެޗުގައި އަންނަ ހުކުރު ދުވަހުގެރޭ ޔުވެންޓަސްގެ ދަނޑުގައި އެ ޓީމު ނިކުންނާނީ އިންޓަ އާ ދެކޮޅަށެވެ.