އެއް އަހަރާއި ހަތް މަހާއި ހަ ދުވަހަށް ޖަލަށްލުމަށް ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދުގެ މައްޗަށް ކޮށްފައިވާ ހުކުމް ހައިކޯޓުން މިއަދު ބާތިލު ކޮށްފި އެވެ.
އެކެއް ފެބްރުއަރީގެ އަމުރާ ގުޅިގެން، އަލީ ހަމީދު ޖަލަށް ލާން ހުކުމް ކުރީ ތަހުގީގަށް އޭނާގެ ފޯނު ދޭން ދެކޮޅު ހެދުމުން އޭނާއާ ދެކޮޅަށް ކުރި، އަދުލު އިންސާފު ގާއިމުކުރަން ހުރަސް އެޅުމުގެ ދައުވާ ސާބިތުވުމާ ގުޅިގެންނެވެ.
އަލީ ހަމީދުގެ ފަރާތުން ހައިކޯޓުގައި އެ ހުކުމް ވަނީ އިސްތިއުނާފް ކޮށްފައެވެ. އަދި މިއަދު އެ މައްސަލައިގައި ހައިކޯޓުގެ ހުކުމް ވަނީ އިއްވާފަ އެވެ.
ތަހުގީގަށް ފޯނު ނުދިން މައްސަލައިގައި ކުރީގެ ރައީސް މައުމޫނާއި ކުރީގެ އުއްތަމަ ފަނޑިޔާރު އަބްދުﷲ ސައީދުގެ މައްޗަށް ވެސް އަދުލު އިންސާފު ގާއިމުކުރަން ހުރަސް އެޅުމުގެ ދައުވާ ކުރި އެވެ. އެ ތިން ބޭފުޅުންގެ މައްސަލަ ބަލައި، ތިން ބޭފުޅުންގެ މައްޗަށް ކްރިމިނަލް ކޯޓުން ހުކުމް ކުރީ މިިދިޔަ ޖޫން މަހުގެ 13 ވަނަ ދުވަހު އެވެ.