ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި މެއި 20، 2013 ވަނަ ދުވަހު ޝާއިއުކޮށްފައިވާ ލިއުމެކެވެ. ކިޔުންތެރިން އިންސާފުކޮށްލައްވާށެެވެ.
—————————————————-
ދެހާސް ނުވަ ވަނަ އަހަރުގެ ޖޫން މަހު މީދޫ އޮފީސް ހިންގުމާއި ހަވާލުވުމަށް ފަހު އެންމެ އިސްކަމެއް ދީގެން އަޅުގަނޑު ކުރި އެއް މަސައްކަތަކީ، ހުޅުމީދޫގެ ދަނޑުވެރިންގެ އުފެއްދުންތެރިކަން އިތުރުކުރުމަށް ކުރެވެންހުރީ ކޮން ކަމެއްތޯ ބަލާ، އެ ކަންކަން ހާސިލް ކުރެވޭތޯ އެވެ.
އެގޮތުން ދަނޑުވެރިންގެ އެއްމެ ބޮޑު ޝަކުވާއަކަށް އޭރު އޮތީ ދަނޑުވެރިންގެ އުފައްދާ އެތިކޮޅު ވިއްކާލެވޭނެ ގޮތެއް ނެތި ތިބެން ޖެހުމުގެ ޝަކުވާ އެވެ. މިކަމަށް ހައްލެއް ހޯދައި ދިނުމުގެ ގޮތުން، ޝަންގްރިއްލާ ރިސޯޓާއި ވާހަކަ ދައްކައިގެން، މާކެޓް ހޯދޭތޯ މަސައްކަތް ކުރީމެވެ.
އެގޮތުން އޭރުގެ އެފްއެމްޑީ އާއި ޝަންގްރިއްލާ އާ ދެމެދު އެއްބަސްވުމެއް ހަދައި، މަސައްކަތް ކުރެވުނެވެ. ނަމަވެސް މާ ގިނަ ދުވަސްތަކެއް ނުވެ، އެކި ސަބަބުތަކާ ހެދި ޝަންގްރިއްލާގެ އޯޑަރުތައް ލިބުން ހުއްޓުނެވެ. މިހެން ދިމާވުމުން ޝަންގްރިއްލާގެ އޯޑަރުތައް ލިބުން ހުއްޓުނު ސަބަބުތައް ބަލައި، ދަނޑުވެރިންނާ ގުޅިގެން ދެން އަޅުގަނޑު މަސައްކަތްކުރީ، ދަނޑުވެރިންގެ ކޯޕަރޭޓިވް އެއް އުފެއްދޭތޯ އެވެ.
މިކަމުގައި ދަނޑުވެރިންގެ ޚިޔާލު އެއްގޮތް ކުރުމަށްޓަކައި، ގިނަ ބައްދަލުވުންތަކެއް ބޭއްވުމަށް ފަހު، ކޯޕަރޭޓިވް އުފެއްދުމަށް އެއްބަސްވި ދަނޑުވެރިންނާ އެކު، ކޯޯޕަރޭޓިވް ރަޖިސްޓްރީ ކުރެވުނީ 2010 ވަނަ އޮކްޓޯބަރު މަހު އެވެ.
ދަނޑުވެރިކަން ފުޅާކޮށް ކުރިއެރުވުމަށްޓަކައި ކުރެވުނު މަސައްކަތުން އެއަހަރުގެ ދަނޑުވެރިންގެ ދުވަސް ރަސްމީކޮށް ފާހަގަ ކުރީ ހުޅުމީދޫގަ އެވެ.
މީގެ އިތުރުން ރަށު އޮފީހާއި، ރަށުގެ ކްލަބް ޖަމިއްޔާތަކާއި ގުޅިގެން ކުރެވުނު މަސައްކަތުން ޔޫއެންޑީޕީ ޕްރޮޖެކްޓެއްގެ ތެރެއިން އޮޓޯ ޕޮޓް ސިސްޓަމެއް ލިބި، ކޯޕަރޭޓިވް އާއި ގުޅިގެން އެސިސްޓަމުން އުފައްދާ ތަކެތި އެދަނީ މާކެޓް ކުރެވެމުންނެވެ.
ދަނޑުވެރިކަން އިތުރަށް ފުޅާކުރުމަށްޓަކައި، ދަނޑު ބިންތައް ހަމަ ހަމަ އުސޫލުން ވީހާ ވެސް ގިނަބަކަށް ލިބޭނެގޮތް އިންތިޒާމް ކުރުމަކީ މުހިއްމު ކަމެކެވެ. މިކަން ކުރުމަށްޓަކައި، ދަނޑުވެރިންގެ މަޝްވަރާ ވަނީ ހޯދިފަ އެވެ.
އައްޑޫ ސިޓީ ކައުންސިލް އިންތިޚާބު ވުމަށްފަހު އެންމެ ފުރަތަމަ ކުރި މަސައްކަތަކީ، އައްޑޫގެ ތަރައްޤީގެ ޕްލޭން އެކުލަވާލުމުގެ މަސައްކަތެވެ.
ތަރައްޤީގެ ޕްލޭންގައި ހިމެނޭ އެކި ބައިތަކުގެ ތެރެއިން، ދަނޑުވެރިކަން ތަރައްޤީ ކުރުމާއި ގުޅޭގޮތުން އެކުލަވާލި ޕްލޭނަށް، ދަނޑުވެރިންގެ ފަރާތުން ޚިޔާލާއި މަޝްވަރާ ހޯދުމަށް ބޭއްވި ބައްދަލުވުން ބާއްވާފައިވަނީ 26 މާޗް 2011 ވަނަ ދުވަހު ހުޅުމީދޫ އަވަށުގެ ސ. އަތޮޅު މަދަރުސާގަ އެވެ.
އައްޑޫގެ ހުރިހާ ދަނޑުވެރިންނަށް ދަޢުވަތު ދީގެން ބޭއްވި މި ބައްދަލުވުން، ހުޅުމީދޫ އަވަށުގައި ބާއްވަން ކައުންސިލުން ނިންމީ، މިއަ ވަށަކީ އައްޑޫގައި ދަނޑުވެރިކަން އެއްމެ ފުޅާކޮށް ކުރަމުންދާ، އެއްމެ ގިނަ ދަނޑުވެރިން ތިބި އަވަށް ކަމަށް ވާތީ އެވެ. މި
ބައްދަލުވުމުގައި ވެސް ހުޅުމީދޫ ދަނޑުވެރިންގެ ފަރާތުން އެއްމެ މުހިއްމު ކަމެއްގެ ގޮތުގައި، ދަނޑު ބިންތައް ހަމަހަމަ އުސޫލުން ދޫކުރެވޭނެ އިންތިޒާމް ހަމަޖެއްސުމަށް އެދިފައިވެ އެވެ. އެހެން ކަމުން ދަނޑުވެރިކަން ތަރައްޤީ ކުރުމަށް އެކަށައެޅި ސިޔާސަތުގެ، މުހިއްމު މަސައްކަތެއްގެ ގޮތުގައި ހިމެނުނެވެ.
ދެން ބަލާލަން ޖެހެނީ، އައްޑޫ ސިޓީ ކައުންސިލްގެ ޑިޕާޓްމަންޓްތަކުގެ ތެރެއިން، ދަނޑުވެރިކަމާއި ގުޅޭ މަސައްކަތް އޮތީ ކޮންޑިޕާޓްމަންޓެއްގެ ދަށުގައި ތޯ އެވެ.
މިގޮތުން ބަލާ އިރު ޑިޕާޓްމަންޓް އޮފް އެންވަޔަރންމަންޓް ގެ މެންޑޭޓްގެ އެއްމެ ފުރަތަމަ މަސަ އްކަތަކަށް އޮތީ މަސްވެރިކަމާއި ދަނޑުވެރިކަމާ ބެހޭ އެންމެހާ ޕްރޮގްރާމްތައް ހިންގުމުގެ މަސައްކަތް ކުރަންޖެހޭ ވާހަކަ އެވެ. ކައުންސިލުން ވަނީ މި މަސައްކަތް ކުރުމަށް ހިނގާނެ ޚަރަދު ކައުންސިލްގެ 2012 ވަނަ އަހަރުގެ ބަޖެޓްގައި ހިމަނާފަ އެވެ.
އެގޮތުން ހިތަދޫގެ ދަނޑު ބިންތައް ސާވޭކޮށް ކަންމުޑި އެޅުމަށްޓަކައި 2 ލައްކަ ރުފިޔާ، ހުޅުމީދޫ ދަނޑުތަކަށް 3 ލައްކަ ރުފިޔާ ބަޖެޓް ކޮށްފައިވެ އެވެ.
ނަމަވެސް މި މަސައްކަތް ކުރިއަށް ނުދާތީ 01 އޮގަސްޓް 2012 ވަނަ ދުވަހު ބޭއްވި ކައުންސިލްގެ 22 ވަނަ ބައްދަލުވުމަށް މިމައްސަލަ އެޖެންޑާ ކުރެވި، އެމަސައްކަތް ކުރިއަށް ގެންދިއުމަށް ފާސްކޮށް، މަސައްކަތާއި ގުޅުން ހުރި ޑިޕާޓްމަންޓްތަކަށް އެންގުނެވެ.
އެހެންކަމުން މި މަސައްކަތް ކުރުމަށްޓަކާ ކައުންސިލުން ކުރަން ޖެހޭ ކަންކަން އެ ވަނީ ފުރިހަމަވެ ފައެވެ. ދެން އޮތީ ކައުންސިލުން އެކުލަވާލި ތަރައްޤީގެ ޕްލޭނާއި، ކައުންސިލްގެ ނިންމުންތައް ތަންފީޒު ކުރުމުގެ މަސައްކަތެވެ. ގާނޫނީ ގޮތުން މި މަސައްކަތް ހިންގައި ދޭން ޖެހޭ ބަޔަކީ، ކައުންސިލްގެ އިދާރީ މުވައްޒަފުންނެވެ.
މި ހުރިހާ ކަމެއް ކައުންސިލުން ކުރުމުންވެސް، އެ މަސައްކަތް ތަންފީޒުނުވެ، 2012 ވަނަ އަހަރު ނިމިގެން ދިއުމުން، 2013 ވަނަ އަހަރުގެ ބަޖެޓްގައި ވެސް، އެ މަސައްކަތް ކުރުމަށް ކައުންސިލުން ވަނީ ހިމަނާފަ އެވެ. 2013 ގެ މެއި މަސް މި ނިމެނީ އެވެ. އިސް ނަގައިގެން މިމަސައްކަތްކޮށް ދޭނެ މުވައްޒަފަކު އައްޑޫ ސިޓީ ކައުންސިލްގައި ނެތެވެ.
މިދިޔަ ހޮނިހިރު ދުވަހު އެމްޑީޕީގެ އެގްރިވިޔަފާރި މެނިފެސްޓޯ ތަޢާރަފު ކުރި ބައްދަލުވުމުގައި، ދަނޑުވެރިންގެ ސުވާލުތަކަށް ޖަވާބު ދިނުމުގައި، ދަނޑު ބިންތައް ވަކިނު ކުރެވިވާ ސަބަބު އަޅުގަނޑު ހާމަ ކުރީމެވެ. އެ ވާހަކަތައް ދަނޑުވެރިންނަށް ހާމަކޮށް ދިނީމަ ގޯސްވީ އަޅުގަނޑެވެ.
ޑިޕާޓްމަންޓް އޮފް އެންވަޔަރަންމަންޓްގެ ބައެއް މުވައްޒަފުން އެކަމާ ހިތްހަމަނުޖެހިއްޖެ އެވެ. ހިތްހަމަޖެހިވަޑައި ނުގަތަސް އަދިވެސް އަޅުގަނޑު ތިޔަ ބޭފުޅުންގެ ގާތުން އެދެނީ ކައުންސިލްގެ މި ނިންމުން ތަންފީޒުކޮށް ދެއްވުމަށެވެ.