ރާއްޖޭގެ އެކި ހިސާބަށް ވިއްސާރަ ކުރާނެ ކަމަށާއި އުތުރުގެ ބައެއް ރަށްތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާ ކުރެވޭ ކަމަށް މޫސުމާއިބެހޭ ޤައުމީ އިދާރާ މޯލްޑިވްސް މީޓިއޮރޮލޮޖިކަލް ސަރވިސަސް އިން ބުނެފިއެވެ.
މިއަދު ހަވީރު 6 އާއި ހަމަޔަށް މޫސުމާއިބެހޭ އިދާރާގެ ލަފާކުރުންތަކަށް ބަލާއިރު ހުޅަނގު އުތުރާއި އުތުރުން ގަޑިއަކު 5 މޭލާއި 13 މޭލާއި ދެމެދުގެ ބާރުމިނުގައި ވައިޖެހޭނެއެވެ. އަދި ކަނޑު އާދައިގެ ވަރަކަށް މަޑުވާނެއެވެ.
ބުދަ ދުވަހު މާލޭއަށް ރެކޯޑު އަދަދަށް ވާރޭ ވެހުމުގެ ސަބަބުން މީހުންށާއި، ފިހާރަތަކަށާއި، އަދި އަގުބޮޑު މުދަލަށް ވަރަށް ބޮޑެތި ގެއްލުން ތަކެއް ލިބިފައިވެއެވެ. އެގޮތުން 160 އާއިލާ އަކަށް ވިއްސާރައިގެ އަސަރު ކޮށްފައިވާއިރު ޑިޒާސްޓަރ މެނޭޖްމެންޓް ސެންޓަރުން ބުނީ ވިއްސާރައިގައި ލިބުނު ގެއްލުމުގެ މައުލޫމާތު އެއްކުރަމުން ދާކަމަށެވެ.
ގިނަ ރައްޔިތުންނަށް ގެއްލުންވެފައިވާ މި ދަނޑިވަޅުގައި، އާންމުންނަށް އެކި ގޮތްގޮތުން އެހީތެރިކަން ފޯރުކޮށްދެއްވާ ފަރާތްތަކަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް(އިބޫ) ވަނީ ޝުކުރު އަދާކުރައްވާފައެވެ.