ގއ ކަނޑުހުޅުދޫގެ ބަނދަރު ހެދުމުގެ މަސައްކަތުގައި އުޅުނު ބިދޭސީ މީހެއް އެސްކަވޭޓަރަކުން ޖެހި އަނިޔާވެގެން މަރުވެއްޖެ އެވެ.
މި ހާދިސާ ހިނގާފައިވަނީ މިއަދު ހެނދުނު 8:45 ހާއިރު ކަމަށް މައުލޫމާތު ލިބެއެވެ. މި ހާދިސާގައި މަރުވެފައިވަނީ އިންޑިއާ އަށް ނިސްބަތްވާ 35 އަހަރުގެ ފިރިހެނެކެވެ. އޭނާ އަކީ އެރަށުގައި އެމްޓީސީސީ އިން ކުރިއަށްގެންދާ ބަނދަރު ހެދުމުގެ މަސައްކަތުގައި އުޅޭ މީހެކެވެ. އޭނާ މަރުވެފައިވަނީ އެސްކަވޭޓަރުން ޖެހި އަނިޔާވުމުން ކަނޑުހުޅުދޫ ސިއްހީ މަރުކަޒަށް ގެންގޮސް ފަރުވާ ދެމުން ދަނިކޮށް 9:35 ހާއިރު ކަމަށް މައުލޫމާތު ލިބެއެވެ.
އެސްކަވޭޓަރުން ޖެހި މަރުވި މީހާގެ ބޭރުފުށުން މާ ބޮޑެތި ޒަހަމްތަކެއް ފެންނަން ނެތް ކަމަށާއި އެހެން ނަމަވެސް އޭނާގެ އެތެރެހަށްޓަށް ލިބިފައިވަނީ ކިހާ ވަރެއްގެ އަނިޔާއެއް ކަމެއް ނޭނގޭ ކަމަށް ކަނޑުހުޅުދޫ ކައުންސިލްގެ ރައީސް، އަހުމަދު ޝަހީމްއާއި ހަވާލާދެއްވާ ދިވެހި އޮންލައިން ނޫސް "އަވަސް" އިން ރިޕޯޓްކޮށްފައިވެއެވެ.
މަރުވި ބިދޭސީ މީހާ މާލެ ގެނައުމުގެ މަސައްކަތް އެމްޓީސީސީއާއި އެރަށު ސިއްހީ މަރުކަޒް ގުޅިގެން ވަނީ ފަށާފައި ކަމަށް ވެއެވެ.