ރައީސް އިބްރާހީމް މުހައްމަދު ސޯލިހު އއ. އަތޮޅުގެ ދެ ރަށަކަށް ކުރައްވާ ދަތުރުފުޅު ފައްޓަވައިފިއެވެ.
ރައީސްގެ މި ދަތުރުފުޅުގައި ވަޑައިގަތުމަށް ހަމަޖެހިފައިވަނީ އއ. އަތޮޅުގެ ދެ ރަށް ކަމަށްވާ، އުކުޅަހަށާއި، ފެރިދޫއަށެވެ.
މި ދަތުރުފުޅުގައި އެންމެ ފުރަތަމަ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވަޑައިގެންނެވީ އުކުޅަހަށެވެ. އުކުޅަހަށް އެމަނިކުފާނު ވަޑައިގަތުމުން އެ ރަށުގެ ރައްޔިތުން ވަނީ އެމަނިކުފާނަށް ހޫނު މަރުހަބާއެއް ދަންނަވާފައެވެ.
ރައީސް އޮފީހުން ބުނި ގޮތުގައި، ރައީސް ސޯލިހުގެ މި ދަތުރުފުޅުގައި އުކުޅަހާއި ފެރިދޫގެ ރައްޔިތުންނާ ބައްދަލު ކުރައްވައި، އެ ދެ ރަށުގެ އެކި މުއައްސަސާތަކަށް ޒިޔާރަތް ކުރެއްވުމަށް ހަމަޖެހިފައި ވެއެވެ.
ރައީސް އޮފީހުން ބުނި ގޮތުގައި، ރައީސްގެ މި ދަތުރުފުޅު ނިންމަވާލެވުމަށްފަހު، އެނބުރި މާލެ ވަޑައިގަންނަވަނީ މިއަދު ހަވީރުގެ ވަގުތެއްގައެވެ.
ވެރިކަމާއި ހަވާލުވެވަޑައިގަތުމަށްފަހު އެ މަނިކުފާނު ފުރަތަމަ ވަޑައިގެންނެވީ އަލިފުޅު ތުއްތު ފައުންޑޭޝަން ދިއްފުށީގައި ގާއިމު ކުރި ފެނާއި ނަރުދަމާގެ ނިޒާމުގެ ހިދުމަތް ރަސްމީކޮށް ފަށްޓަވައިދެއްވަން އެ ރަށަށް ވަޑައިގެންފައެވެ. މިއީ ރާއްޖެތެރެއަށް އެ މަނިކުފާނު ކުރައްވާ ދެވަނަ ދަތުރުފުޅެވެ.