ތުރުކީގައި ބާރު ސްޕީޑުގައި ދުއްވާފައި ދިޔަ ރޭލެއް ސްޓޭޝަނުގައި ބަހައްޓާފައި ހުރި އިންޖީނެއްގައި ޖެހި ބޮޑު އެކްސިޑެންޓެއް ހިނގައިފިއެވެ.
މި އެކްސިޑެންޓުގައި 4 މީހުން މަރުވެ 43 މީހުން ވަނީ ޒަޚަމްވެފައެވެ. ވީޑިއޯ ފުޓޭޖް ތަކުން ފެންނަ ގޮތުގައި މީހުން ސަލާމަތް ކުރުމުގައި މަސައްކަތު ގިނަ ބަޔަކު ހަރަކާތްތެރިވަމުންދެއެވެ. އެކްސިޑެންޓް ހިނގާފައިވާ މާސަންޑިޒް ސްޓޭޝަނުގެ ދަގަނޑުތަކުގެ ދަށުގައި ތާށިވެފައިތިބި ފަރާތްތައް ސަލާމަތްކުރުމުގައި އުނދަގޫތަކާއި ވަނީ ކުރިމަތިލާން ޖެހިފައެވެ.
މި އެކްސިޑެންޓް ހިނގާފައިވަނީ މިއަދު ހެނދުނު ތުރުކީ ގަޑިން 6:30 ހާއިރު ކަމަށް މައުލޫމާތު ލިބެއެވެ. މި އެކްސިޑެންޓް ހިނގާފައިވަނީ ރޭލު، އާންކާރާ އާއި ތުރުކީގެ މެދުތެރޭ ޕްރޮވިންސް އެއް ކަމަށްވާ ކޮންޔާއާއި ދޭތެރޭ ދަތުރު ކުރަމުން ދަނިކޮށް ކަމަށް ރިޕޯޓްތައް ބުނެއެވެ.
އަންކާރާގެ ގަވަރުނަރު ވާސިޕް ސާހިން ބުނެފައިވާ ގޮތުގައި މި އެކްސިޑެންޓް ހިނގާފައިވަނީ ބާރު ސްޕީޑުގައި ދަތުރު ކޮށްފައިދިޔަ ރޭލު، ރޭލު ދަގަނޑުތައް ޗެކް ކުރުމަށް އެތަނުގައި ބެހެއްޓިފައިހުރި އިންޖީނެއްގައި ޖެހިގެންނެވެ، އެކްސިޑެންޓް ހިނގި އިރު ރޭލު ދަތުރުކޮށްފައިވާ ސްޕީޑް އަދި އެނގޭވަރެއް ނުވެއެވެ.