ކުރީގެ ޑިފެންސް މިނިސްޓަރު ކާނަލް ރިޓަޔާޑް މުހައްމަދު ނާޒިމްގެ ކޮޓަރިން ފިސްތޯލައެއް ފެނުުނު މައްސަލާގައި ނުރައްކާތެރި ހަތިޔާރު އެތެރެކޮށް ގެންގުޅުމުގެ ކުށުގައި އިއްވާފައިވާ ޖަލު ހުކުމް ސުޕްރީމް ކޯޓުން ބާތިލްކޮށްފިއެވެ.
މި މައްސަލައިގެ އިއްވާފައިވާ ޖަލު ހުކުމް މިއަދު ސުޕްރީމް ކޯޓުން މި ގޮތަށް ނިންމާފައިވަނީ ނާޒިމްގެ ފަރާތުން މައްސަލަ އިސްތިއުނާފު ކުރަން ހުށަހެޅުމުންނެވެ.
ސުޕްރީމް ކޯޓުން ދާދި ދެންމެއަކު ކުރި ހުކުމުގައި ބުނެފައިވަނީ ސުޕްރީމް ކޯޓުން ބެލި ބެލުމުން ނާޒިމްގެ މައްޗަށް ކުށް ސާބިތުނުވާކަމަށެވެ. އަދި ނާޒިމްގެ މައްޗަށް ކްރިމިނަލް ކޯޓުން ކޯޓުން ކޮށްފައިވާ ހުކުމާއި، ކްރިމިނަލް ކޯޓުގެ ހުކުމަށް ތާއީދުކޮށް ހައި ކޯޓުން ކޮށްފައިވާ ހުކުމް ޝަރުޢީ އަދި ޤާނޫނީ ހަމަތަކާ އެއްގޮތްނުވާތީ، އެނިންމުންތަކަކީ ބާތިލު ހުކުމްތަކެއް ކަމަށެވެ.
މިނިވަންވުމަށްފަހު ނާޒިމް ކޯޓުން ނިކުމެވަޑައިގެން ނޫސްވެރިންނާއި ބައްދަލުކުރައްވާ ދެއްކެވި ވާހަކަފުޅުގައި މިއަދަކީ އެ މަނިކުފާނަށް ވަރަށް އުފާވެރި ދުވަހެއް ކަމަށް ވަނީ ވިދާޅުވެފައެވެ. އަނިޔާވެރިކަމުގައި ގިނަ ދުވަސްތަކެއް ހޭދަކުރެއްވުމަށްފަހު މިއަދު މިނިވަންކަން އެބަ އިހުސާސް ކުރެވޭ ކަމަށް އެ މަނިކުފާނު ވިދާޅުވިއެވެ.
ކާނަލް ނާޒިމް ވަނީ އެމަނިކުފާނަށް އެހީތެރިވެދެއްވި އަދި އެ މަނިކުފާނުގެ ދިފާޢުގައި ވާހަކަފުޅު ދެއްކެވި އެންމެހާ ފަރާތްތަކަށް ޝުކުރު އަދާކުރައްވާފައެވެ.