މައިކްރޯސޮފްޓް ވިންޑޯސް 8 ނެރުނު އިރު ފެނިގެން ދިޔައީ މުޅިން ތަފާތު ޔޫޒާ އިންޓަފޭސް އަކަށް ވިންޑޯސް ބަދަލުވެގެން ދިޔަ މަންޒަރެވެ. ކުރިން އަހަރެމެން ބޭނުން ކުރަމުން އައިސްފައިވާ މައުސް އަދި ކީބޯޑް އިންޓަފޭސްގެ އިތުރަށް ޓަޗް އިންޓަފޭސް އެއް ވަނީ ވިންޑޯސް 8 އަށް ތައާރަފް ކޮށްފައެވެ.
މި ބޮޑު ބަދަލާއި އެކު ވިންޑޯސް ޕީސީ އަދި ވިންޑޯސް ހާޑްވޭއާތަކަށް ވެސް ވަނީ ބޮޑެތި ބަދަލުތަކެއް އައިސްފައެވެ. މިގޮތުން ވިންޑޯސް 8 ގެ ޓަޗް އިންޓަފޭސްގެ ބޭނުން އޭގެ އެންމެ ރަނގަޅު ގޮތުގައި ހިފޭނެ ގޮތަށް، ޓާޗް ސްކްރީން އަދި މަލްޓި ޓަޗް ޓްރެކްޕެޑް ތައް ވަނީ ޕީސީތަކަށް ތައާރަފް ކޮށްފައިއެވެ.
ވިންޑޯސް 8 ކަށް އުފެއްދި ޕީސީ ތަކުން އެންމެ ފާހަގަ ކޮށްލެވޭ އެއް ޕީސީ އަކީ ވިންޑޯސް ކޯންވާޓެބަލް ޕީސީ އެވެ. މިއީ އަލްޓްރާބުކް އަދި ޓެބްލެޓަކަށްވެސް ބޭނުން ކުރެވޭ ޑިވައިސްއެކެވެ. މިގޮތުން ދުނިޔޭގެ ގިނަ ޕީސީ އުފައްދާ ކުންފުނި ތަކުން ވަނީ ކޮންވާޓެބަލް ޕީސިީތައް ތައާރަފް ކޮށްފައެވެ. ލެނޯވޯ ޔޯގާ އަކީ ހަމަ މިފަދަ އެއް ޑިވައިސް އެވެ. 13 އިންޗީގެ މި ޕީސީ އަކީ އިންޓެލް އައި ސެވެން ސީޕީޔޫ އަދި 4 ޖީބީ ރެމް ހުންނަ ޕީސީ އެކެވެ. ފުލް ކީބޯޑް އަދި ޓްރެކްޕެޑެއްވެސް ހިމެނޭ މި ޕީސީ އަކީ ވިންޑޯސް 8 ގެ ބޭނުން އެންމެ ފުރިހަމަ ގޮތުގައި ހިފޭނެ ގޮތަށް ފަރުމާ ކުރެވިފައިވާ ޕީސީ އެކޭ ދަންނަވާލަން ޖެހެއެވެ.
ކޮންމެއަކަސް ހާޑްވެއާ ޓެކްނޮލޮޖީ އަށް އައިސްފައިވާ ބޮޑެތި ކުރިއެރުން ތަކުގެ ބޭނުން މައިކްރޯސޮފްޓުން މިވަނީ ވަރަށް ފުރިހަމަ ގޮތެއްގައި ހިފާފަ އެވެ. ކުރިއަށް އޮތް ދުވަސް ތަކުގައި މުޅިން ތަފާތު އަދި ރީތި ވިންޑޯސް ޕީސީތައް ފެންނާނެކަމުގެ ޔަގީންކަން ދުނިޔޭގެ ގިނަ ޕީސީ ހަދާ ކުންފުނި ތަކުން ވަނީ އަރުވާފަ އެވެ. ކޮންޒިއުމަރުންގެ އުއްމީދުތައް ވިންޑޯސް 8 ކާއި މެދު ވަރަށް ބޮޑެވެ.