ސްޕެނިޝް ލަލީގާގައި ރޭ އަމިއްލަ ދަނޑުގައި ރަޔޯ ވަޔެކާނޯގެ މައްޗަށް 1-0 ގެ ނަތީޖާ އިން ކުރި ހޯދައިގެން ލީގު ތާވަލުގެ ތިންވަނަ އަށް ރެއާލް މެޑްރިޑް ޖެހިލިއިރު، އެތުލެޓިކޯ މެޑްރިޑް ވަނީ ރަށުން ބޭރުގައި ވަރަށް އުނދަގުލުން ރެއާލް ވަލަޑޮލިޑް އަތުން 3-2 އިން މޮޅުވެފައެވެ.
ރޭގެ ނަތީޖާއާއެކު ރެއާލް ވަނީ 16 މެޗުން 29 ޕޮއިންޓް ހަމަކޮށް ތިންވަނައިގައެވެ. ދެވަނައިގައި އޮތީ އެތުލެޓިކޯ އެވެ. އެ ޓީމަށް ލިބިފައިވަނީ 31 ޕޮއިންޓެވެ. މިއަދަދަށް ޕޮއިންޓް ލިބިގެން އެއް މެޗު މަދުން ކުޅެގެން އެއްވަނައިގައި އޮތީ އެންމެ ފަހުގެ ޗެމްޕިއަން ބާސެލޯނާ އެވެ. ހަތަރުވަނައިގައި އޮތް ސެވިއްޔާ އަށް 28 ޕޮއިންޓެވެ.
ރެއާލުން ރޭގެ މެޗަށް ނިކުތީ ޔުއެފާ ޗެމްޕިއަންސް ލީގުގައި އެ ޓީމު އެންމެ ފަހުން އަމިއްލަ ދަނޑުގައި ސީއެސްކޭއޭ މޮސްކޯ އަތުން 3-0 އިން ބަލިވި މެޗުގެ ފުރަތަމަ އެގާރައަށް ބަދަލުތަކެއް ގެނެސްގެންނެވެ. އެގޮތުން، އެ މެޗުގެ ފުރަތަމަ އެގާރައިގައި ހިމެނުނު ކުޅުންތެރިންގެ ތެރެއިން ރޭގެ މެޗުގައި ކުޅުމުގެ ފުރުޞަތުދީފައިވަނީ ގޯލްކީޕަރު ތިބައުޓް ކޯޓުއާ އާއި މާސެލޯގެ އިތުރުން ކަރީމް ބެންޒެމާ އަދި މާކޯ އަސެންސިއޯ އަށެވެ.
ރެއާލްގެ ސެންޓިއާގޯ ބާނެބެއުގައި ރޭ ކުޅުނު މެޗުގައި ފެނިގެންދިޔަ ހަމައެކަނި ގޯލް، 13 ވަނަ މިނެޓުގައި ޖަހައިދިނީ ކަރީމް ބެންޒެމާ އެވެ. މިއީ އެ ޓީމުގެ ލޫކަސް ވަޒްކޭޒް ދިން ބޯޅައަކުން އޭނާ ކާމިޔާބުކުރި ގޯލެކެވެ. ރެއާލްގެ ލަނޑަށްފަހު ރަޔޯގެ ޑިފެންޑަރު އެމިލިއާނޯ ވެލަޒްކުއޭޒް ބޮލުން ފޮނުވާލި ބާރު ހަމަލާއަކުން އެ ޓީމު އެއްވަރުކުރުމާއި ގާތަށް ޖެހިލިއިރު ރެއާލްގެ ލީޑް ފުޅާކުރުމަށް ޖަރުމަނުގެ މިޑްފީލްޑަރު ޓޯނީ ކްރޫސް އަށް ލިބުނު ފުރުޞަތުގައި ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ. މިހާފު ނިމުނީ 1-0 އިން ރެއާލް ކުރީގައިއޮވެގެންނެވެ.
ދެވަނަ ހާފުގެ ކުރީކޮޅު، ރެއާލްގެ އަސެންސިއޯ އަށް ވަނީ އެ ޓީމުގެ ލީޑް ފުޅާކުރުމަށް ލިބުނު ފުރުޞަތުގެ ބޭނުންހިފޭގޮތްނުވެފައެވެ. ރެއާލްގެ ލޫކާ މޮޑްރިޗް ދިން ޕާހަކުން އަސެންސިއޯ ފޮނުވާލި ބޯޅަ ރަޔޯގެ ގޯލްކީޕަރު ސްޓޯލޭ ޑިމިޓްރިއެވްސްކީ މަތަކުރިއެވެ.
މި މެޗުގެ ފަހު ހާފުގެ އިތުރުވަގުތުގައި ރަޔޯގެ ކުޅުންތެރިން ފުލުފުލުގައި ފޮނުވާލި ނުރައްކާތެރި ދެ ހަމަލާއެއް ރެއާލްގެ ކީޕަރު ކޯޓުއާ ވަނީ މަތަކޮށްފައެވެ.
ލީގުގައި ރޭ އެތުލެޓިކޯ ކުޅުނު މެޗުގައި 3-2 އިން ވަލަޑޮލިޑް އަތުން މޮޅުވިއިރު އެ ޓީމުން ކާމިޔާބުކުރި ތިން ގޯލްގެ ތެރެއިން ދެލަނޑުޖަހައިދިނީ ފްރާންސްގެ އެންޓޮއިން ގްރީޒްމަން އެވެ. އަނެއް ލަނޑުޖަހައިދިނީ ކްރޮއޭޝިއާގެ ފޯވާޑް ނިކޮލާ ކަލިނިޗް އެވެ. ވަލަޑޮލިޑް ދެ ލަނޑުގެ ތެރެއިން އެއް ގޯލަކީ އެތުލެޓިކޯގެ ސައުލް ނިގުއޭޒް އަތުން ބައިކޮޅަށް ވަން ގޯލެކެވެ. އެ ޓީމުގެ އަނެއް ލަނޑުޖަހައިދިނީ ފެނާންޑޯ ކަލޭރޯ އެވެ.
މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ރެއާލް ސޮސިއެޑާޑް އަތުން 1-0 އިން ގެޓަފޭ މޮޅުވިއިރު ވެލެންސިއާ ވަނީ ރަށުން ބޭރުގައި 1-1 އިން އެއިބާ އާ އެއްވަރުވެފައެވެ.
ސްޕެނިޝް ލީގުގައި މިރޭ ކުޅޭ އެންމެ ފާހަގަކޮށްލެވޭ މެޗުގައި ރާއްޖޭގަޑިން 00:45 ގައި ރަށުން ބޭރުގައި ބާސެލޯނާ ނިކުންނާނީ ލެވާންޓޭ އާ ދެކޮޅަށެވެ.