އިޓާލިއަން ސެރިއޭގައި ރޭ ކުޅުނު ޓިއުރިން ޑާބީގައި ދެވަނަ ހާފުގައި ކްރިސްޓިއާނޯ ރޮނާލްޑޯ ވައްދާލި ޕެނަލްޓީއާއެކު ޓޮރީނޯގެ މައްޗަށް ޔުވެންޓަސް ކުރި ހޯދައިފިއެވެ. މި މެޗުން ޔުވެންޓަސް މޮޅުވީ 1-0 އިންނެވެ.
ރޭގެ ނަތީޖާއާއެކު ޔުވެންޓަސް ވަނީ 16 މެޗުން 46 ޕޮއިންޓް ހަމަކޮށް ތާވަލްގެ އެންމެ ކުރީގައި 11 ޕޮއިންޓްގެ ލީޑެއް ނަގައިފައެވެ. ދެވަނައިގައި އޮތް ނަޕޯލީ އަށް 15 މެޗުން 35 ޕޮއިންޓް ލިބިފައިވާއިރު އޭގެ ތިން ޕޮއިންޓް ފަހަތުން ތިންވަނައިގައި އޮތް އިންޓަ މިލާން ވަނީ ރޭ އުދިނޭޒީ އަތުން މޮޅުވެފައެވެ. ޔުވެންޓަސް އަތުން ބަލިވި ޓޮރީނޯ އޮތީ 22 ޕޮއިންޓާއެކު ލީގުގެ ހަވަނައިގައެވެ.
އޮލިމްޕިކޯ ޑި ޓޮރީނޯގަައި ރޭ ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުން ގޯލެއް ފެނިގެންގޮސްފައިނުވީނަމަވެސް ޔުވެންޓަސްގެ ރޮނާލްޑޯ އާއި ޖިއޯޖިއޯ ކިއެލީނީ އަށް ވަނީ ލަނޑުޖެހުމަށް ރަނގަޅު ދެ ފުރުޞަތުލިބި ބޭކާރުވެފައެވެ. މެޗުގެ 15 ވަނަ މިނެޓުގައި ރޮނާލްޑޯ ފޮނުވާލި ބޯޅަ ޓޮރީނޯގެ ގޯލްކީޕަރު ސަލްވަޓޯރޭ ސިރިގޫ މަތަކުރިއިރު މި ހާފު ނިމެން އުޅެނިކޮށް ވަރަށް ހަނި އޭންގަލަކުން ކިއެލީނީ ފޮނުވާލި ބޯޅަ މަތަކުރީ ޓޮރީނޯގެ ދެވަނަ ކީޕަރު ސަލްވަޑޯ އިޗާޒޯ އެވެ. އޭނާ ކުޅެން ނިކުތީ އެ ޓީމުގެ ތަޖުރިބާކާރު ކީޕަރު ސިރިގޫ އަށް އަނިޔާވުމުންނެވެ.
މި ހާފުގައި ޓޮރީނޯގެ ސިމޯނީ ޒާޒާ އަށް ވަނީ އެ ޓީމަށް ލީޑް ނަގައިދިނުމަށް ލިބުނު ފުރުޞަތު ނަގާލައިފައެވެ. ޕެނަލްޓީއޭރިޔާގެ ވާތްފަރާތުގައި ހުރެ އޭނާ ފޮނުވާލި ބޯޅަ ޔުވެންޓަސްގެ ގޯލްކީޕަރު މަޓިއާ ޕެރިން މަތަކުރިއެވެ.
މި މެޗުގެ ދެވަނަ ހާފުގެ ކުރީކޮޅު، ޓޮރީނޯގެ އަންޑްރެއާ ބެލޮއްޓީ އާއި ކްރިސްޓިއަން އަންސަލްޑީ އަށް ވަނީ ލަނޑުޖެހުމަށް ދެ ފުރުޞަތެއްލިބި ބޭނުންހިފޭގޮތްނުވެފައެވެ. މި ދެ ކުޅުންތެރިން ފޮނުވާލި ހަމަލާތަކުގެ ހުރަހަކަށްވީ ވެސް ޔުވެންޓަސްގެ ކީޕަރު ޕެރިން އެވެ.
މި މެޗުގައި ކާމިޔާބުކުރި ހަމައެކަނި ގޯލް، މެޗުގެ 70 ވަނަ މިނެޓުގައި ޖަހައިދިނީ ލިބުނު ޕެނަލްޓީއަކުން ޕޯޗުގަލްގެ ތަރި ރޮނާލްޑޯ އެވެ. މިއީ ޓޮރީނޯގެ ފޯވާޑް ޒާޒާ ފަހަތަށް ޖައްސާލި ޕާހެއް އެ ޓީމުގެ ކީޕަރު އިޗާޒޯ ދިފާއުކުރަން އުޅުމުގެ ތެރޭގައި ޔުވެންޓަސްގެ މާރިއޯ މަންޒުކިޗް އަށް ހުރަސް އެޅުމުން ރެފްރީ ދިން ޕެނަލްޓީއެކެވެ. މިއީ ސެރިއޭގެ ތާރީޚުގައި ޔުވެންޓަސް އިން ކާމިޔާބުކުރި 5،000 ވަނަ ގޯލެވެ. މި ގޯލާއެކު ރޮނާލްޑޯ ވަނީ ލީގުގައި ކުޅުނު 16 މެޗުގައި 11 ލަނޑު ހަމަކޮށް، ލަނޑު ލިސްޓުގެ އެންމެ ކުރީގައި އުޅޭ ޖެނޯއާގެ ފޯވާޑް ކްރިސްޓޯފް ޕިއާޓެކް އާ އެއްވަރުކޮށްފައެވެ.
އޭގެ ތިން މިނެޓުފަހުން، މަންޒުކިޗް އެ ޓީމަށް ގޯލެއް ކާމިޔާބުކޮށްދިން ނަމަވެސް ޔުވެންޓަސްގެ މިރަލެމް ޕިޔަނެޗް ހިލޭޖެހުމަކުން ނަގައިދިން ބޯޅަ ރޮނާލްޑޯ އޮފްސައިޑްގައި ހުރެ އެ ބޯޅައެއް ހަރަކާތްކުރުމުން ރެފްރީ ވަނީ އެއީ ގޯލެއް ނޫންކަމަށް ނިންމާފައެވެ. އޭގެފަހުން، މެޗުގެ އިތުރުވަގުތުގައި ޔުވެންޓަސްގެ ލީޑް ފުޅާކުރުމަށް ރޮނާލްޑޯ އަށް ލިބުނު ފުރުޞަތުގެ ބޭނުންހިފޭގޮތެއްނުވިއެވެ. އެ ޓީމުގެ ޕައޮލޯ ޑިބާލާ ދިން ޕާހަކުން ރޮނާލްޑޯ ފޮނުވާލި ބޯޅަ ޓޮރީނޯގެ ކީޕަރު އިޗާޒޯ މަތަކުރިއެވެ.
ސެރިއޭގައި ރޭ ކުޅުނު އަނެއް މެޗުގައި އުދިނޭޒީ އަތުން އިންޓަ މޮޅުވީ 1-0 އިންނެވެ. އިންޓަގެ ސެންސީރޯގައި ކުޅުނު މި މެޗުގައި އެ ޓީމުން ކާމިޔާބުކުރި ހަމައެކަނި ގޯލް، 76 ވަނަ މިނެޓުގައި ޖަހައިދިނީ ކެޕްޓަން މައުރޯ އިކާޑީ އެވެ.
މި މުބާރާތުގައި މިރޭ ކުޅޭ މެޗުތަކަށް ބަލާއިރު، ދެވަނައިގައި އޮތް ނަޕޯލީ ނިކުންނާނީ ކަލިއާރީ އާ ދެކޮޅަށެވެ. މީގެއިތުރުން އޭއެސް ރޯމާ އާ ޖެނޯއާ ބައްދަލުކުރާ މެޗު ފާހަގަކޮށްލެވެއެވެ.