އައްޑޫ ސިޓީ ފޭދޫ ޒުވާނުން އިންތިޒާމް ކޮށްގެން ބޭއްވުމަށް ހަމަޖެހިފައިވާ "ޖޯލިއަންސް މިކްސް ވޮލީބޯލް ޓޯނަމަންޓް" މި ހިނގާ ޑިސެމްބަރުމަހުގެ 20 ވަނަ ދުވަހު ފެށުމަށްވަނީ ހަމަޖެހިފައެވެ.
މި މުބާރާތަކީ ޒުވާނުންގެ މެދުގައި ކުޅިވަރުގެ ރޫޙު ދިރުވާ އާލާކޮށް، އެކުވެރިކަން ބަދަހިކުރުމަށްޓަކާ ބާއްވާ މުބާރާތެއް ކަމަށް އިންތިޒާމްކުރާ ފަރާތުން މައުލޫމާތު ދެއެވެ.
ޖުމްލަ 6 ޓީމް ހިމެނޭ މި މުބާރާތް ކުރިޔަށްދާނީ ޑިސެމްބަރުމަހުގެ 20 އިން ފެށިގެން 11 ޖެނުއަރީ 2019 އަށެވެ. މި މުބާރާތުގެ ގުރުއަތުލުން ޑިސެމްބަރު 15 ވީ ހޮނިހިރު ދުވަހުގެ ރޭ ފޭދޫ އޮފީހުގައި ވަނީ ބާއްވާފައެވެ.
މި މުބާރާތް ކުރިޔަށް ގެންދިޔުމަށް ހަމަޖެހިފައިވަނީ ފޭދޫ ވޮލީބޯޅަ ކޯޓުގައެވެ. ފޭދޫގައި މިފަދަ ގިނަ މުބާރާތްތައް ބާއްވަމުންދާކަން ފާހަގަ ކުރެވެއެވެ. ތަޖްރިބާހުރި މޮޅު ކުޅުންތެރިން މިފަދަ މުބާރާތްތަކުން ފެނިގެންދެއެވެ. އަދި ދެ ޖިންސުގެ ޒުވާނުންގެ ބޮޑު ތަރުހީބެއް ފޭދޫގައި މި ކުޅިވަރަށް ފަހަކަށް އައިސް ލިބެމުންދާކަން ވެސް ފާހަގަ ކުރެވެއެވެ.