ޖެނުއަރީ މަހު ހުޅުވޭ ޓްރަންސްފާ މަކެޓަށް ޓީމްތަކުން ތައްޔާރުވަމުން އަންނައިރު ގިނަ ކުޅުންތެރިންތަކެއް ވަނީ ކުރިން ކުޅެމުން އައިޓީމު ތައް ދޫކޮށް އާ ޓީމްތަކާއި ގުޅުމަަށް ޑީލް ހަދާފައިއެވެ. އަދި ބައެއް ކުޅުންތެރިން ހޯދުމަށް ކްލަބު ތަކުން ދަނީ ކެޑި ނޭޅި މަސައްކަތް ކުރަމުންނެވެ.
މިގޮތުން ނިއުކާސަލްގެ މަޝްހޫރު ފޯވަރޑް ޑެމްބަ ބާ ވަނީ ޗެލްސީ އަށް ދާން ތައްޔާރުކަމަށް ބުނެފައިއެވެ. އޭނާވަނީ އާސެނަލް އަށްވެސް ޝައުޤުވެރިކަން ފަޅުކޮށްފައިއެވެ. ނަމަވެސް އާސެނަލްގެ މެނެޖަރ ވެންގަރ ވަނީ ބާ އަށް އެއްވެސް ޝައުގުވެރިކަމެއް ނެތްކަމަސް ބުނެފައިއެވެ. ނަމަވެސް ޗެލްސީން ވަނީ ބާގެ ކޮންޓްރެކްޓްގައިވާ ބައިއައުޓް ކްލޯސް ޕޭކުރަންތައްޔާރަށެވެ. އެހެންކަމަށް ވެއްޖެ ނަމަ ބާ ޗެލްސީން ފެނުން ވަރަށް ގާތެވެ.
އިންޓަރ މިލާންގެ ޑަޗް މިޑްފީލްޑަރ ވެސްލީ ޝްނެއިޑަރ ވެސް ވަނީ މި ޓްރާސްފާ މޫސުމުގައި ކްލަބް ބަދަލުކުރަން ނިންމާފައިއެވެ. އިންޓަރ މިލާނުން އޭނާ ކިޔާ މުސާރަ ދޭން އެއްބަސް ނުވާތީ އޭނާވެސް ވަނީ އެހެންޓީމުތަކަށް ބަދަލުވާނެކަމަށް އިޝާރާތް ކޮށްފައިއެވެ. އެހެންކަމުން އޭނާ ހޯދުމަށް އިނގިރޭސި ކްލަބް މެންސިޓީ އާއި، ލިވަޕޫލް އަދި ރަޝިއާގެ އަންޒީ އިން ވަނީ ވާހަކަތައް ފަށާފައެވެ.
އާސެނަލްގެ ވިންގަރ ތިއޯ ވޯލްކޮޓްވެސް ވަނީ ކްލަބް ދޫކޮސްލާނެކަމަށް ރިޕޯރޓް ކޮށްފައިއެވެ. އެގޮތުން ކޮންޓްރެކްޓް ހަމަވާން ވަގުތު އޮތް ނަމަވެސް އޭނާ އެހެން ކްލަބަކުން ފެނުން ކައިރިއެވެ. މަންޗެސްޓަރ ޔުނައިޓެޑް، ޗެލްސީ އަދި ޕީއެސްޖީން ވަނީ ވޯލްކޮޓަށް ޝައުގުވެރިކަން ފައުޅުކޮށްފައިއެވެ.
ބާސެލޯނާގެ ސްޕެއިންގެ ފޯވާރޑް ޑޭވިޑް ވިއާ ވެސް ކްލަބް ދޫކޮށް ހިގައި ދާނެކަމަށް ރިޕޯރޓްތައް ބުނެއެވެ. އޭނާއަށް ވަނީ ޗެލްސީގެ އިތުރުން ލިވަރޕޫލް އަދި އާސެނަލް އިން ޝައުގުވެރިކަން ފާޅުކޮށްފައިއެވެ.
އަދި ކްރިސްޓަލް ޕެލެސްގެ 20 އަހަރުގެ އިންގިރޭސި ފޯވަޑް ވިލްފްރެޑް ޒާހާ ވެސް ވަނީ ކްލަބު ބަދަލު ކުރާނެ ކަމުގެ އިޝާރާތެއް ކޮށްފައެވެ. މިގޮތުން ލިވަޕޫލް، ޗެެލްސީ، މެންޗެސްޓާ ޔުނައިޓެޑް، ޓޮޓެންހަމް އަދި ރެއާލް މެޑްރިޑް ވެސް ވަނީ ޝައުގުވެރިކަން ފާޅުކޮށްފައެވެ.
ކޮންމެއަކަސް ކުރިއަށް އޮތް ޓްރާންސްފާ މާކެޓް އެންމެ ހަލަބޮލި ނުވި ކަމުގައި ވިޔަސް ގިނަ ކުޅުންތެރިން ތަކެއް ކުލަބް ބަދަލު ކުރާނެ ކަމަށް ގިނަ ރިޕޯޓްތައް ބުނެއެވެ.