އައްޑޫ ޑެޕިއުޓީ މޭޔާރު ހަސަން ޝާހިދް ގެ އަމިއްލަ ބްލޮގްގައި "ހުޅުމީދޫ ދަނޑު ބިންތައް ވަކި ނުކުރެވިގެން އުޅެނީ ކީއްވެ؟" މި ސުރުހީގެ ދަށުން ސިވިލް ސާވިސް މުވައްޒަފުންނަށް އަމާޒުކޮށް ލިޔުނު ލިއުމާ ގުޅިގެން ކައުންސިލްގެ މުވައްޒަފުން "ރަތަށް" އަރައިފި އެވެ.
ކައުންސިލް އިދާރާގައި މަސައްކަތްކުރައްވާ ސީނިއާ މުވައްޒަފަކު މިއަދު ވިދާޅުވީ ޝާހިދް ލިޔުއްވާފައިވާ ލިއުމަކީ ވަރަށް ތާކުންތާކު ނުޖެހޭ ވަރަށް ޒިއްމާދާރުކަން ކުޑަ ލިއުމެއް ކަމަށެވެ.
"އެއީ ވަރަށް ތާކުން ތާކު ނުޖެހޭ، ޒިންމާދާރުކަން ކުޑަ ލިއުމެއް،" އޭނާ ވިދާޅުވި އެވެ.
އޭނާ ވިދާޅުވީ މޭޔަރު އަބްދުﷲ ސޯދިގް (ސޯބެ) އާއި ޑެޕިއުޓީ މޭޔަރު ހިމެނި ވަޑައިގެންނެވި ބައްދަލުވުމެއްގައި ރާއްޖޭގެ އެންމެ ރަނގަޅަށް މަސައްކަތް ކުރާ ސިވިލް ސާވިސް މުވައްޒަފުން ތިބި ތަނަކީ އައްޑޫ ސިޓީ ކައުންސިލް ކަމަށް ބުނެފައިވާ އިރު އެފަދަ ގޮތަކަށް ލިއުނު ސަބަބެއް ނުވިސްނޭ ކަމަށެވެ.
މި މައްސަލަ އާ ގުޅިގެން އިއްޔެ ކައުންސިލް އިދާރާގައި ވަނީ ބައްދަލުވުމެއް ވެސް ބާއްވާފަ އެވެ. އަދި ޝާހިދުގެ އެ ލިއުމާ ގުޅިގެން ސޯބެ ވެސް ހިތްހަމަޖެހި ވަޑައިނުގެން ހުންނެވިކަަމަށް ވަނީ މައުލޫމާތު ލިބިފަ އެވެ.
ޑެޕިއުޓީ މޭޔަރުގެ ލިއުމާ ގުޅިގެން ނަން ނުޖަހަން ޝަރުތު ކުރައްވައި އެހެން ކައުންސިލަރަކު ވިދާޅުވީ ހަމައެކަނި ކަންކަން ސިވިލް ސާވިސް މުވައްޒަފުންގެ ބޮލަށް ކަނޑާލައިގެން ލިއުމަކީ ވަރަށް ހިތާމަ ހުރި ކަމެއް ކަމަށެވެ. އަދި އަމުދުން ޝާހިދު އެގޮތަށް ލިޔުއްވުމުން އެއީ ޖޯކެއް ކަމަށް އެ ކައުންސިލަރު ވިދާޅުވި އެވެ.
"ޝާހިދަކީ ކައުންސިލްގައި ހުރި އެންމެ ފަރުވާ ކުޑަ މީހާ، އޮފީހަކަށް ނިކުންނަނީކީއެއް ނޫން. އުޅޭ ނޫޅޭ ތަނެއް ނޭނގޭ. ބައެއް ފަހަރު އަޑު އިވޭ ހުޅުމީދޫގައި ހުންނަ ވާހަކަ، އަނެއް ބައި ފަހަރު އިވޭ ހިތަދޫގައި އުޅޭ ވާހަކަ، އެކަމަކު އެފަދަ މީހަކު ތި ގޮތަށް މި އޮފީހުގައި ތިބި މުވައްޒަފުންގެ ބޮލަށް ކަމޑާލައިގެން ހަގީގަތް އޮޅުވާނުލެވޭނެ." ކައުންސިލަރު ވިދާޅުވި އެވެ.
"އައްޑޫ ލައިވް" އަށް އެނގިފައިވާ ގޮތުގައި ހާޒިރީ އަށް އެންމެ ފަރުވާ ކުޑައީ ވެސް ޑެޕިއުޓީ މޭޔަރު އެވެ. އަދި ކައުންސިލަރުން ފިންގަ ޕްރިންޓް އެޓެންޑެންސެއް ތައާރަފް ކުރަން އުޅުމުން ވެސް އެކަމާ އެންމެ ދެކޮޅު ހެދީ ޝާހިދު އެވެ.
ކައުންސިލް އިދާރާގެ މުވައްޒަފުންނަށް އަމާޒުކޮށް ލިޔުނު ލިއުމާ ގުޅިގެން މޭޔަރުގެ ބަޔާނެއް ނެރޭނެ ކަމުގެ މައުލޫމާތު ވެސް ވަނީ ލިބިފަ އެވެ.
ހުޅުމީދޫ ދަނޑު ބިންތައް ވަކި ނުކުރެވިގެން އުޅޭ ސަބަބާ ބެހޭ ގޮތުން ޝާހިދު ލިޔުއްވާފައިވަނީ މިހެންނެވެ؛ "އެހެންކަމުން މި މަސައްކަތް ކުރުމަށްޓަކާ ކައުންސިލުން ކުރަން ޖެހޭ ކަންކަން އެ ވަނީ ފުރިހަމަވެ ފައެވެ. ދެން އޮތީ ކައުންސިލުން އެކުލަވާލި ތަރައްޤީގެ ޕްލޭނާއި، ކައުންސިލްގެ ނިންމުންތައް ތަންފީޒު ކުރުމުގެ މަސައްކަތެވެ. ގާނޫނީ ގޮތުން މި މަސައްކަތް ހިންގައި ދޭން ޖެހޭ ބަޔަކީ، ކައުންސިލްގެ އިދާރީ މުވައްޒަފުންނެވެ.
މި ހުރިހާ ކަމެއް ކައުންސިލުން ކުރުމުންވެސް، އެ މަސައްކަތް ތަންފީޒުނުވެ، 2012 ވަނަ އަހަރު ނިމިގެން ދިއުމުން، 2013 ވަނަ އަހަރުގެ ބަޖެޓްގައި ވެސް، އެ މަސައްކަތް ކުރުމަށް ކައުންސިލުން ވަނީ ހިމަނާފަ އެވެ. 2013 ގެ މެއި މަސް މި ނިމެނީ އެވެ. އިސް ނަގައިގެން މިމަސައްކަތްކޮށް ދޭނެ މުވައްޒަފަކު އައްޑޫ ސިޓީ ކައުންސިލްގައި ނެތެވެ."