ޔުއެފާ ޗެމްޕިއަންސް ލީގުގެ ދެވަނަ ބުރުގެ ގުރު ނެގިއިރު އެންމެ ފަހުގެ މުބާރާތުގެ ފައިނަލްގައި ކުޅުނު އިނގިރޭސި ކްލަބް ލިވަޕޫލް އާ ޖަރުމަނުގެ ޗެމްޕިއަން ބަޔާން މިއުނިކް ބައްދަލުކުރާން ޖެހިއްޖެއެވެ.
މި މުބާރާތުގެ ޗެމްޕިއަންކަން ހަތަރު ފަހަރު ހޯދައިފައިވާ ލިވަޕޫލް އާއި ބަޔާން ބައްދަލުކޮށްފައިވަނީ 1980/81 ވަނަ އަހަރުގެ މުބާރާތުގެ ސެމީ ފައިނަލްގައެވެ. އެ ފަހަރު މި ދެ ޓީމު ކުޅުނު ދެ މެޗުވެސް އެއްވަރުވެގެން ނިމުނުއިރު އަވޭ ގޯލުގެ އުސޫލުން އެ މުބާރާތުގެ ފައިނަލަށް ދަތުރުކޮށް ތަށި ހޯދީ ލިވަޕޫލެވެ. މި ދެ ޓީމު އެންމެ ފަހުން ބައްދަލުކޮށްފައިވަނީ 2001 ވަނަ އަހަރުގެ ޔުއެފާ ސުޕަ ކަޕްގެ ފައިނަލްގައެވެ. އެ މެޗުން ލިވަޕޫލް މޮޅުވީ 3-2 އިންނެވެ.
ޗެމްޕިއަންސް ލީގުގެ ތާރީޚު ދުށް އެންމެ ކާމިޔާބު ޓީމު އަދި އެންމެ ފަހުގެ ޗެމްޕިއަން ރެއާލް މެޑްރިޑް ކުޅެން ޖެހެނީ މި މުބާރާތުގެ ތަށި ހަތަރު ފަހަރު ހޯދައިފައިވާ ނެދަލެންޑްސްގެ އަޔެކްސް އެމްސްޓެޑަމް އާ ދެކޮޅަށެވެ.
މި މުބާރާތުގެ ދެވަނަ ބުރުގައި ކުޅޭ ފާހަގަކޮށްލެވޭ މެޗުތަކުގެ ތެރޭގައި، އިޓަލީގެ ޗެމްޕިއަން ޔުވެންޓަސް އާ ސްޕެއިންގެ އެތުލެޓިކޯ މެޑްރިޑް ބައްދަލުކުރާ މެޗުގެ އިތުރުން މެންޗެސްޓާ ޔުނައިޓެޑާ ދެކޮޅަށް ފްރާންސްގެ ޗެމްޕިއަން ޕީއެސްޖީ ކުޅޭ މެޗު ހިމެނެއެވެ.
އިޓަލީގެ ކްލަބްތަކާއި ދެކޮޅަށް އެތުލެޓިކޯ މިހާތަނަށް ކުޅުނު 9 މެޗުން ވެސް ބަލިވެފައިނުވާއިރު ޔުވެންޓަސް އިން މި ފަހަރުގެ ގްރޫޕް ސްޓޭޖުގައި ސްޕެއިނުގެ ވެލެންސިއާ އަތުން ދެ ފަހަރު ވަނީ މޮޅުވެފައެވެ. ޔުވެންޓަސް އަށް ކުޅޭ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އަށް ވެސް މި މެޗަކީ ވަރަށް ހާއްސަ މެޗެކެވެ.
ރޮނާލްޑޯ ވަނީ މި މުބާރާތުގައި އެތުލެޓިކޯ އާ ދެކޮޅަށް މިހާތަނަށް ކުޅުނު ހަ މެޗުގައި ޖުމްލަ ހަތަރު ގޯލް ކާމިޔާބުކޮށްފައެވެ. އެގޮތުން، އޭނާ ވަނީ ރެއާލްގެ ޖާޒީގައި 2016/17 ވަނަ އަހަރުގެ މުބާރާތުގެ ސެމީ ފައިނަލްގައި އެތުލެޓިކޯ ކޮޅަށް ހެޓްރިކް ހަދާފައެވެ. މީގެއިތުރުން، އޭނާ ވަނީ 2014 ވަނަ އަހަރުގެ ތަށި ރެއާލް އާއެކު އުފުލާލިއިރު ފައިނަލްގައި އެތުލެޓިކޯ ކޮޅަށް ގޯލެއް ކާމިޔާބުކޮށްފައެވެ.
ސްޕެއިނުގެ ޗެމްޕިއަން ބާސެލޯނާ ނިކުންނާނީ ފްރާންސްގެ އޮލިމްޕިކް ލިޔޯން އާ ދެކޮޅަށެވެ. މި ދެ ޓީމު އެންމެ ފަހުން ބައްދަލުކުރި ހަ މެޗުން ވެސް ބާސެލޯނާ ބަލިވެފައިނުވާއިރު އެ ޓީމު ވަނީ ހަތަރު މެޗުން މޮޅުވެ ދެ މެޗުން އެއްވަރުވެފައެވެ.
ސްވިޒަލޭންޑްގެ ނިޔޯންގައި ހުންނަ ޔުއެފާގެ މައި އިދާރާގައި މިއަދު ހަވީރު ގުރުއަތުލުން ނަގާފައިވާ އިރު ދެވަނަ ބުރުގެ ފުރަތަމަ ލެގް ކުޅޭނީ އަންނަ އަހަރުގެ ފެބްރުއަރީ 12-13 ވަނަ ދުވަހާއި 19-20 ވަނަ ދުވަހުގައެވެ. އަދި ދެވަނަ ލެގް ގެ ކުޅުން ކުރިއަށްދާނީ އަންނަ އަހަރުގެ މާޗް މަހު 5-6 ވަނަ ދުވަހާއި 12-13 ވަނަ ދުވަހުގައެވެ.
މި މުބާރާތުގެ ފައިނަލް މެޗު އޮންނާނީ އަންނަ އަހަރުގެ ޖޫން މަހުގެ 1 ވަނަ ދުވަހު މެޑްރިޑްގެ ވަންޑާ މެޓްރޯޕޮލިޓާނޯ ސްޓޭޑިއަމްގައެވެ.